وزیراعظم دی فواد چودھری نوں سیاسی گل بات وچ احتیاط ورتن دی ہدایت

اسلام آباد: وزیراعظم عمران خان نے وفاقی وزیر فواد چودھری نوں سیاسی گل بات وچ احتیاط ورتن دی ہدایت کر دتی۔ وزیراعظم عمران خان دی زیر صدارت وفاقی کابینہ دا اجلاس ہویا جہدے وچ فواد چودھری دا اسد عمر تے جہانگیر ترین بارے بیان تے بحث ہوئی۔ وفاقی وزیر منصوبہ بندی اسد عمر دا کہنا سی فواد چودھری دا بیان انتہائی غیر ذمہ دارانہ سی، اک وفاقی وزیر نوں گل بات کردیاں خیال کرنا چاہیدا اے کہ اوہ کیہ کہہ رہیا اے۔ وسیلیاں دے مطابق اجلاس وچ وزیراعظم عمران خان نے فواد چودھری نوں آئندہ سیاسی گل بات وچ احتیاط ورتن دی ہدایت کیتی تے جدوں فواد چودھری اپنے بیان دی وضاحت دین لگے تے وزیراعظم نے موضوع بدل لیا۔ دوجے پاسے وفاقی وزیر فیصل واوڈا نے کابینہ ارکان تے تنقید کردیاں آکھیا ایتھے کابینہ وچ سب چنگا دی رپورٹ دتی جاندی اے، گراؤنڈ تے کارکردگی کجھ ہور اے، اسیں پی ٹی آئی دا نظریہ دبن نہیں دے سکدے، کابینہ نوں گمراہ کرن والیاں دی رپورٹ اسیں وی رکھنے آں۔ ذرائع دے مطابق وزیراعظم نے فیصل واوڈا نوں ہور گل کرن توں روک دتا۔