بے نظیر انکم سپورٹ پروگرام دا ناں بدلن دے خلاف عرضی سماعت لئی منظور

لہور: لہور ہائیکورٹ نے بے نظیر انکم سپورٹ پروگرام دا ناں بدل کے خلاف درخواست باقاعدہ سماعت لئی منظور کر لئی۔ عدالت نے وفاقی حکومت سنے دوجے فریقاں توں دو ہفتیاں وچ جواب طلب کر لیا۔ چیف جسٹس لہور ہائی کورٹ جسٹس قاسم خان نے پیپلزپارٹی دے رہنما قمر زمان کائرہ دی عرضی تے سماعت کیتی۔ چیف جسٹس نے استفسار کیتا آخری الیکشن توں پہلاں بے نظیر انکم سپورٹ پروگرام دے تحت لوکاں دی امداد کیتی سی، ایہدا ناں کدوں بدلیا گیا؟ جہدے تے سیکرٹری بے نظیر انکم سپورٹ پروگرام نے عدالت نوں دسیا کہ فروری 2020وچ کفالت تے احساس ایجنسی دے ناں توں امداد دتی جا رہی اے۔ چیف جسٹس لہور ہائی کورٹ نے ریمارکس دتے 8ورھے بعد اچانک ناں بدلن توں سوال پیدا ہوندا اے کہ شاید کدھرے سیاست ہو رہی اے۔ چیف جسٹس لہور ہائی کورٹ جسٹس قاسم خان آکھیا فوری حکم امتناع جاری کرکے غریباں دی امداد نہیں روکنا چاہندے، وفاق نوں سن کے حکم امتناع بارے فیصلہ کراں گے۔ عدالت نے درخواست باقاعدہ سماعت لئی منظور کردیاں وفاقی حکومت سنے دوجے فریقاں توں جواب طلب کر لیا۔

اپنا تبصرہ گھلو