عثمان بزدار نال ارکان صوبائی اسمبلی دی ملاقات، حلقیاں دے مسئلیاں توں آگاہ کیتا

لہور: وزیراعلیٰ پنجاب نال وکھو وکھ ضلعیاں دے ارکان صوبائی اسمبلی نے ملاقات کیتی تے نویں مالی ورھے لئی ریلیف بجٹ پیش کرن تے عثمان بزدار نوں مبارکباد دتی۔ اراکین پنجاب اسمبلی نے وزیراعلیٰ نوں اپنے علاقیاں دے مسئلیاں توں آگاہ کیتا۔ سردار عثمان بزدار دا کہنا سی اراکین اسمبلی دے علاقیاں وچ ترقیاتی کم ترجیحی بنیاداں تے ہون گے، جائز کماں وچ کسے نوں رکاوٹ نہیں پان دیواں گا۔ اوہناں آکھیا کورونا وباء دا کھلار روکن لئی شدید متاثرہ علاقے سیل کیتے، اراکین اسمبلی اپنے علاقیاں وچ حکومتی ہدایات تے عملدرآمد دی مانیٹرنگ کرن۔ وزیراعلیٰ پنجاب نے ہور آکھیا کورونا دا کھلار گھٹ کرن لئی عوام دا بھرپور تعاون ضروری اے، شہری کورونا توں محفوظ رہن لئی حکومتی گائیڈ لائنز تے عمل کرن۔ پنجاب وچ حالیہ پابندیاں تے عملدرآمد دے حوصلہ افزا نتائج ساہمنے آنا شروع ہو چکے نیں، عوام احتیاطی تدابیر نوں عادت بنا لین، ایس او پیز تے عملدرآمد نہ کرن تے بازار تے مارکیٹاں بند کر دیواں گے۔ عثمان بزدار آکھیا سرکاری دفتراں سنے عوامی تھاواں تے ماسک پاؤن دی پابندی تے سختی نال عملدرآمد کرایا جا رہیا اے، شہریاں نوں کورونا دی احتیاطی تدابیر تے عمل کرکے اپنا فرض نبھانا ہووے گا۔