چنگا ہووے گا وزیراعظم اپنے آپ نوں قرنطینہ کر لین تے کوئی کم نہ کرن: بلاول بھٹو

اسلام آباد: چیئرمین پیپلزپارٹی بلاول بھٹو زرداری آکھیا وزیراعظم معیشت تباہ کرن دا اعتراف کرن تے معافی منگن کہ اوہناں نے دیس دا بیڑا غرق کر دتا۔ بلاول بھٹو نے قومی اسمبلی اجلاس دے دوران اظہار خیال کردیاں آکھیا سارے پاکستان نوں نظر آ رہیا اے کہ وزیراعظم لئی دو آپشنز نیں، وزیراعظم معافی منگن کہ اوہناں نے دیس دا بیڑا غرق کر دتا، وزیراعظم معیشت تباہ کرن دا اعتراف کرے یا تے وزیراعظم سب نوں نال لے کے تے ملک دی بہتری لئی کم کرے تے دوجا آپشن ایہ اے کہ استعفیٰ دیوے تے گھر جائے کسے قابل بندے نوں آن دیوے۔ بلاول نے آکھیا بجٹ پاس ہون توں پہلاں ای عوام تے پٹرول بمب ڈیگیا گیا، ایہ واپس اپنے حلقیاں وچ کیویں جان گے تے عوام نوں کیہ منہ وکھاون گے۔طیارے حادثے بارے بلاول نے آکھیا پائلٹ تے سول ایوی ایشن دی عالمی سطح تے کردار کشی کیتی گئی، پی آئی اے طیارے حادثے تے حکومتی ردعمل شرمناک اے، اپنی غلطیاں نوں لُکان لئی شہید پائلٹ تے ذمہ داری پا دتی، پائلٹ نوں کورونا دے دوران زبردستی جہاز تے چڑھایا گیا، طیارہ حادثے دی آڑ وچ سول ایوی ایشن تے پی آئی اے دی نجکاری دی کوشش کیتی جا رہی اے جہڑے وزیر دی اپنی ڈگری جعلی ہون دا الزام اے اوہ پائلٹاں دی ڈگریاں جعلی کیویں قرار دے سکدا اے۔