تسیں چنگے اوتے پلس وی چنگی ہوئے گی

لکھت:عتیق انور راجہ

آر پی او گوجرانوالہ جناب ریاض نذیر گاڑا صاحب ایہناں دے دفتر وچ پچھلے کجھ دناں وچ دوبارہ ملاقات دا موقع ملیا تے دونواں وار ایہہ احساس ہویا کہ صاحب نہ صرف اک چنگے پلس افسر نیں بلکے اک بوہت چنگے انسان تے ادب دوست وی نیں۔ میری ایہناں نال پہلی ملاقات ون ٹو ون سی جیہڑی کافی دیر چلدی رہی، ایس ملاقات وچ اسیں ایہنں پلس دے رویاں تے عوام دے مسئلیاں اُتے گل کرن دی کوشش کیتی۔ ساڈیاں گلاں دے جواب وچ اوہناں نے اپنے محکمے دا نقطہ نظر بوہت احسن انداز وچ بیان کیتا۔ جناب ریاض نذیر گاڑا صاحب نال گل بات دا سلسلہ اگے چلیا تے اوہناں نے فرمایا کہ راجہ صاحب اج دے دور وچ ہر کوئی پلس فورس توں نراض نظر آندا اے۔ ہر کسے دے کول پلس دی کارستانیاں دے قصے ہوندے نیں۔ لوک معاشرے وچ روز ہون والے واقعے تے پلس دے کردار اُتے سوالیہ نشان لاندے نظر آندے نیں پر انج بوہت گھٹ ہوندا اے کہ اسیں کسے نال ملے تے اوہ سانوں پلس دے چنگے رویے دی رواداد سنان دی کوشش کرے۔ بوہت گھٹ یہہ دسیا جاندا اے کہ پلس نے کنے مجرماں نوں سزا دلوائی۔ آر پی او صاحب نے فرمایا کہ معاشرے وچ ایہہ ا عجیب سوچ اے کہ جس دا کوئی جانن والا پلس فورس وچ تعینات ہوندا اے اوہ اپنے ایس رشتے دار یا دوست دی کھل کے تعریف کردا اے تے ایس پلس والے دے نال تعلق نوں معاشرے وچ کیش وی خوب کراندا اے پر جدوں ایس توں مجموعی طور تے محکمہ پلس دی گل کیتی جائے تے اوہ سو طرح دیاں غلطیاں کڈن بہہ جاندا اے۔ انج لگدا اے کہ عوا وچ پلس نوں بحیثیت اک محکمہ ویکھن دا رحجان ای نہیں۔ ہر کوئی محکمے نال جڑے لوکاں دے انفرادی کماں نوں ویکھدے ہوئے اپنی سوچ بنا لیندا اے ایہہ خطرناک سوچ اے جنہوں بدلن دی بوہت لوڑ اے۔قوم نوں پلس نوں بحیثیت محکمہ عزت دینا ہوئے گی۔ اصل شے عوام دا اعتماد تے چنگے کم اُتے عوام دی شاباشی ہوندی اے۔ ایس دے نال نال ایہہ حقیقت سمجھن دی بوہت لوڑ اے کہ سال دے بارہ مہینے تے دن دے 24 گھنٹے پلس ای اک انج دا محکمہ اے جیہڑا بغیر کسے ریسٹ دے عوام دی جان تے مال دے تحفظ وچ لگیا رہندا اے۔ کسے وی واقعے دے بعد عوام سب توں پہلے پلس نال ای رابطہ کردی اے۔ بلکل ایہہ سچ اے کہ میرے جہے بوہت شہری پلس دے سپاہی توں لے افسران اعلیٰ نال تعلقات نوں بڑے فخر نال بیان کردے نیں پر کدی ایہہ توفیق نہیں ہوندی کہ اسیں بحیثیت محکمہ پلس دی ذمہ داریاں تے مجبوریاں نوں سمجھن دی کوشش کرن۔
صاحبو، اک ماں دے دو پتر ہون، اک فوج وچ چلا جائے تے دوجا پلس وچ بھرتی ہو جائے۔ بھلے دناں دی تربیت اک ای ماں باپ نے کیتی ہوندی اے پر جدوں ایہناں نوں قانون نافذ کرن والے دو مختلف محکمیاں وچ اپنی خدمات سرانجام دین دا موقع ملدا اے تے دونواں دی کارکردگی مختلف ہو جاندی اے۔ پلس دی طرح فوج وی اک محکمہ اے پر اسیں جاندے آں کہ فوج دے اک سپاہی توں لے کے جرنیلاں تیکر ترقی تے تبدیلی محکمانہ انداز وچ ہوندی اے جد کہ پلس دے اعلیٰ افسراں دے تبادلیاں وچ سیاسی اثر تے رسوخ تے مفادات لُکے ہوندے نیں۔ ایس لئی جدوں کدھرے کوئی مسئلا ویکھو تے ایہہ وی سوچنا ہوئے گا کہ ساڈی پلس اپنے فرائض توں غفلت دی مرتکب کیوں ہوندی اے؟ کیوں اسیں ایس سوال دا جواب آپ توں اپنے معاشرے توں نہیں پچھدے؟اکثر لوک ایہہ کہندے نیں کہ منشیات فروشی بھٹہ خوری، ناجائز، قبضیاں تے دوجے جرائم دے پچھے پلس دا ہتھ ہوندا اے۔ ایہہ گل کسے حد تیکر ٹھیک وی پتا ہوندی اے پر اسیں سب جے اپنی اکھاں توں پٹیاں ہٹا کے ویکھو تے سانوں صاف صاف نظر آئے گا کہ جدوں ساڈی پلس کسے منشیات فروش، بھٹہ خور اُتے ہتھ پاندی اے تے ایہناں مجرماں نوں بچان لئی اکثر سیاست دان تے اشرافیہ مختلف طریقیاں توں محکمہ پولیس اُتے اثر انداز ہون دی کوشش کردے نیں۔ انج جیہڑے بااصول تے فرض شناس پلس والے قانون دی بالا دستی لئی کھڑے ہوندے نیں۔ ایہناں افسراں نوں دور دراز علاقیاں وچ گھل دتا جاندا اے یا کسے ہور طریقے نال محکمانہ کاروائی وچ الجھان دی کوشش کیتی جاندی اے۔ ساڈے ملک دا المیہ اے کہ ایتھے جیہڑا جنا صاحب حیثیت ہوندا جاندا اے قانون نافذ کرن والے محکمیاں نوں اوہ اینا ای اپنا غلام سمجھن لگ جاندا اے، حالت تے ایہہ اے کہ میرے ملک دے سب محکمیاں وچ سیاستدان تے صاحب حیثیت لوک اپنی پسند نال اپنی مرضی دے لوکاں نوں بھرتی کراندے چلے آ رہے نیں۔ملک وچ کوئی نواں سیاسی سیٹ اپ بنے تے سب توں پہلے محکمہ پولیس وچ اکھاڑ پچھاڑ ہوندی اے۔ چنگے بھلے کم کرن والے افسراں نوں راتوں رات دور دراز علاقیاں وچ تعیناتی دے حکم نامے جاری کر دتے جاندے نیں۔ ساڈے ایم پی ایز تے ایم این ایز علاقے وچ مرضی دے ایس ایچ او لگواندے نیں تاکے علاقے وچ اپنا اثر تے رسوخ بنا کے رکھیا جائے۔ جے محکمہ پلس توں ساڈے معاشرے نے واقعی بہتر کم لینا اے تے سیاسی مداخلت بند کرنی ہوئے گی بھرتی توں لے کے ٹرانسفر تیکر دے سب کم محکمانہ انداز وچ کرن دا طریقہ کار بنانا ہوئے گا موجودہ لاک ڈائون وچ پلس ہر ممکن کوشش کر رہی اے کہ شہریاں دے نال سختی پیش نہ آجائے۔ ایس لئی شہریا ں نوں وی احساس ہونا چاہیدا اے کہ پلس والے اپنی جاناں نوں خطرے وچ پا کے ایہناں دی زندگیاں محفوظ بنان وچ لگے ہوئے نیں، کدی انتظامیہ دے حکم اُتے دکاناں تے بازار بند کراندے نیں، تے کدی لوکاں نوں گھراں تیکر محدود رکھن لئی رات دن ناکیاں اتے کھڑے اپنا فرض ادا کردے وکھائی دیندے نیں۔ کیہ ای چنگا ہوئے کہ اسیں سب اپنی اپنی ذمے داری دا احساس کرن تے اپنی تے اپنے پیاریاں دی جان دی حفاظت لئی خود نوں پابند کرن۔ خود احتیاطی تدبیراں اُتے عمل شروع کرن۔ سانوں ایہہ خیال وی ہونا چاہیدا اے کہ پلس اہلکاراں تے افسراں دے وی خاندان نیں، ایہناں دے پیارے وی گھراں وچ ایہناں دی تندرست واپسی دا انتظام کردے نیں، کسے اک پلس افسر یا اہلکار دے غلط عمل توں پوری پلس نوں نفرت نال نہ ویکھو، غلطیاں سب توں ہو جاندیاں نیں، پنجاب پلس دے اہلکاراں دی گل کیتی جائے تے اعلیٰ افسراں سنے بوہت سارے اہلکار ایس وائرس دا شکار ہو چکے نیں بوہت سارے پلس والے ایس وبا دی وجہ نال اپنے فرض دی تکمیل کردے ہوئے شہید وی ہو رہے نیں اسیں بس ایہہ کرنا اے کہ پلس فورس نوں اک محکمے دے طور اُتے ویکھنا اے ۔ ایہناں دے چنگے کماں اُتے شاباش دینی اے تے پلس دے نال مسلسل تعاون دی فضا بنائے رکھدی اے۔ حکومت جے واقعی معاشرے نوں سدھارنا چاہندی اے تے اینوں محکمہ پلس نوں جدید انداز وچ سدھارنا ہوئے گا۔ اک اہم نقطہ جس اُتے غور کرن دی بڑی لوڑ اے جس تیزی نال ملکی آبادی ودھ رہی اے ایسے تناسب نال ایس محکمے وچ بھرتیاں نہیں ہو رہیاں ۔ گھٹ تعداد دی وجہ نال ملازماں توں زیادہ ویے کم لین دی کوشش کیتی جاندی اے۔ ایسے وجہ نال وی ایہناں دی کارکردگی متاثر ہوندی اے جدوں اسیں قانون اُتے عمل دی کوشش کراں گے تے معاشرے وچ جرم آپے گھٹ ہون لگن گے۔ آر پی او صاحب نے کہیا کہ چنگے بھیڑے لوک ہر محکمے وچ ہوندے نیں پر یاد رکھن والی گل ایہہ اے کہ ساڈے ہر محکمے وچ ساڈے ای بھرا پتر یا رشتہ دار کم کر رہے نیں۔ ایسے لئی جس طرح کسے دے چنگا کرم کرن اُتے سارا خاندان خوش ہوندا اے ایسے طرح کسے دے غلط رویے نوں ویکھ کے سارے خاندان نوں بہہ کے سوچنا بوہت پہلے اخلاقیات، روایت تے احساسات سکھ چکیا ہوندا اے۔ بچپن وچ جیہڑی تربیت والدین تے استاداں نے بچے دی کیتی ہوندی اے اوہ ساری عمر ایس دے کردار وچ نظر آندی رہندی اے ایس لئی اسیں ایہہ کہہ سکدے نیں کہ بندیاں دے چنگے بھیڑے کماں دی ذمے داری بوہت حد تیکر ایس دی بچپن دی تعلیم تے تربیت منحصر ہوندی اے۔جناب نذیر گاڑا صاحب دے نال گل بات توں اسیں ایہہ نقطہ سمجھیا کہ جے معاشرہ چنگا اے تے فیر پلس وی چنگی ہوئے گی۔ایس لئی ساڈے ساریاں اُتے لازم اے کہ معاشرے دی اصلاح لئی اپنا کردار ادا کرنا شروع کریئے۔ اونج وی اک فقرہ کہیا سنیا جاندا اے کہ جویں عوام دے اعمال ہون گے اونج دے ای ایہناں دے حکمران ہون گے۔