نگار جوہر پاکستان دی تریخ دی پہلی خاتون لیفٹیننٹ جنرل بن گئیاں

لکھت:علی عمران چٹھہ

نگار جوہر پاکستان دی وڈی فوج دی تریخ وچ لیفٹیننٹ جنرل دے عہدے اُتے تعینات ہون والی پہلی خاتون نیں۔
پاکستانی فوج دی میڈیکل کور نال تعلق رکھن والی میجر جنرل نگار جوہر نوں لیفٹیننٹ جنرل دے عہدے اُتے ترقی دے کے سرجن جنرل دے عہدے اُتے تعینات کر دتا گیا اے۔
پاکستانی فوج دے شعبہ تعلقات عامہ دی طرفوں لیفٹیننٹ جنرل نگار جوہر دی ترقی تے نویں تعیناتی دے بارے وچ ٹوئٹر اُتے اک پیغام وچ دسیا گیا اے۔
نگار جوہر پاکستان دی وڈی فوج دی تریخ وچ لیفٹیننٹ جنرل دے عہدے اُتے تعینات ہون والی پہلی خاتون نیں تے پاکستانی فوج دی تریخ وچ ایہہ وی پہلی وار ہویا اے کہ کسے خاتون نوں سرجن جنرل دا عہدہ ملیا اے۔
پاکستان دے صوبہ خیبر پختونخوا دے ضلع صوابی دے علاقے پنج پیر نال تعلق رکھن والی نگار جوہر سرجن جنرل آف پاکستان دے عہدے اُتے تعینات توں پہلاں راولپنڈی وچ ملٹری ہسپتال دے کمانڈنٹ دے طور اُتے کم کر رہیاں سن۔
آپ ہوری کسے مسلم لیگ دا ناں لین یا کسے وی ترقی پذیر ریاست دا، پاکستان اوہ اکو ملک اے جتھے دو خواتین جنرل آفیسر دے عہدے اُتے تعینات نیں۔
ڈاکٹر نگار نے کجھ ورہے پہلاں ایس ویلے اک انٹرویو وچ کہیا سی جدوں اوہ پاکستانی فوج وچ بریگیڈیئر دے عہدے اُتے تعینات سن۔ ایس ویلے ایہناں دا اشارہ میجر جنرل ریٹائرڈ شاہدہ ملک تے میجر جنرل ریٹائرڈ ڈاکٹر شاہدہ بادشاہ ول سی۔
اج اوہ آپ تھری سٹار جنرل دے عہدے اُتے ترقی پان توں بعد ملک دی پہلی لیفٹیننٹ جنرل بنیاں نیں تے ایس دے نال ای اوہ پاکستان دی پہلی خاتون سرجن جنرل تعینات ہو گئیاں نیں۔
لیفٹیننٹ جنرل ڈاکٹر نگار جوہر خان دا تعلق خیبر پختونخواہ دے ضلع صوابی نال اے۔
اوہناں نے راولپنڈی دے پریزینٹیشن دا نوینٹ نال ابتدائی تعلیم حاصل کیتی تے فیر 1985 وچ آرمی میڈیکل کالج توں گریجویشن کیتی۔
ایہناں دا تعلق آرمی میڈیکل کور دے جی ڈی ایم او یعنی جنرل ڈیوٹی میڈیکل آفیسرز برانچ نال اے۔ ایہہ میڈیکل وچ مینجمنٹ دا شعبہ اے۔
اوہناں نے ایڈوانس میڈیکل ایڈمنسٹریشن وچ آرمڈفورسز پوسٹ گریجویٹ میڈیکل انسٹیٹیوٹ توں 2015 وچ ڈپلومہ مکمل کیتا سی۔
جدوں پاکستان آرمی دے موجودہ سربراہ جنرل قمر جاوید باجوہ راولپنڈی دے کور کمانڈر سن ایس ویلے ڈاکٹر نگار جوہر سی ایم ایچ جہلم دی کمانڈنگ افسر سن جس نوں اک اہم عہدہ سمجھیا جاندا اے۔
اوہ ڈپٹی کمانڈنٹ سی ایم ایچ راولپنڈی رہیاں۔ اوہ آرمی میڈیکل کالج دی وائس پرنسپل وی تعینات رہیاں تے بطور میجر جنرل اوہ ملٹری ہسپتال راولپنڈی دی کمانڈنٹ تعینات ہوئایں۔ ایہناں نوں 2017 وچ میجر جنرل دے عہدے اُتے ترقی دتی گئی سی تے اوہ پاکستان آرمی وچ میجر جنرل دے عہدے اُتے تعینات ہون والی تیجی خاتون سن۔
لیفٹیننٹ جنرل ڈاکٹر نگار جوہر نوں فوج دی میڈیکل کور وچ موور کہیا جاندا اے یعنی اک انج دی افسر جیہڑی کم روکدیاں نہیں، ملٹری ہاسپٹل راولپنڈی وچ ایہناں دے ماتحت کم کرن والی اک ڈاکٹر دا کہنا اے کہ جدوں جنرل نگار کسے دفتر وچ ہون تے اوہ اوتھے چار مرد آفیسر دے برابر کم کردیاں نیں۔ ایہناں نوں پیشہ ورانہ زندگی وچ انتہائی تندہی نال کم کرن والی افسر دی شہرت حاصل اے۔
واضح رہوے کہ پاکستان آرمی دی میڈیکل کور وچ افسراں دی ترقی فوج دے دیگر شعبیاں وچ نسبت سخت مقابلے دی وجہ نال خاصی مشکل سمجھی جاندی اے۔ ایہہ وی کہیا جاندا اے کہ ایس شعبے وچ مرد ڈاکٹر افسراں دی تعداد کئی گنا چوکھی ہونی وی خواتین دی پروموشن وچ رکاوٹ اے تاں جنرل نگار جوہر دا کریئر خاصہ مختلف نظر آندا اے۔
ایہناں دی بطور کمانڈنگ آفیسر سی ایم ایچ جہلم تعیناتی وی اہم سی کیوں کہ ایہہ فیلڈ ہسپتال اے جتھے انڈیا دے نال لائن آف کنٹرول اُتے ہون والی کاروائیاں وچ زخمی ہون والیاں دا علاج وی کیتا جاندا اے۔
لیفٹیننٹ جنرل ڈاکٹر نگار جوہر دے والد دا تعلق وی پاکستانی فوج نال سی۔ ایہناں دے شوہر وی پاکستانی فوج نال میجر دے رینگ توں ریٹائر ہوئے سن تے کجھ ورہے پہلاں ایہناں دا انتقال ہو گیا سی۔
پاکستان دی تاریخ وچ میجر جنرل دے عہدے اُتے اپڑن والی پہلی خاتون افسر ڈاکٹر شاہدہ ملک سن ، جد کہ ڈاکٹر شاہدہ بادشاہ دوجی خاتون آفیسر سن جیہڑی میجر جنرل دے عہدے تیکر اپڑیاں ایہناں دے علاوہ وی شعبہ طب تے دیگر شعبیاں وچ خواتین کلیدی عہدیاں اُتے اپنی خدمات ملک تے قوم لئی سرانجام دے رہیاں نیں پاک فوج وچ پہلی وار لیفٹیننٹ جنرل دے عہدے تے خاتون دا تقرر میرٹ دی سر بلندی دے نال نال خواتین دے مرداں دے شانہ بشانہ احسن طور اتے کم کرن دیاں راہواں وی کھولے گا پاک آرمی وچ تھری سٹار جرنل دے عہدے اُتے خاتون دا تقرر ایس گل دا مظہر اے کہ مملکت خداد پاکستان وچ قائداعظم محمد علی جناح دے ویژن دے مطابق خواتین نوں ہر شعبہ زندگی وچ ترقی دے مساوی موقعے فراہم کیتے جا رہے نیں تحریک پاکستان وچ قائداعظم محمد علی جناح دی ہمیشرہ محترمہ فاطمہ جناح دی بے مثال جدوجہد نوں دنیا دی تریخ وچ سنہری حروف وچ لکھیا جاندا اے ایس ضمن و چ پاکستان دی پہلی خاتون اول بیگم رعنا لیاقت علی خان جیہڑے بعد وچ سندھ دی پہلی گورنر وی رہیاں دا کردار وی تاریخی اے ایہناں دے علاوہ محترمہ بے نظیر بھٹو جیہڑا اسلامی دنیا دی پہلی خاتون وزیراعظم سن دا تعلق وی پاکستان نال سی پاک فوج دی ایس اعلیٰ عہدہ اُتے تقریر نال جتھے میرٹ دی سربلندی ہوئی اوتھے پوری دنیا وچ اسلامی جمہوریہ پاکستان اُتے خواتین دے حوالے نال تنقید کرن والیاں دے منہ وی بند ہو گئے چیف آف آرمی سٹاف جنرل قمر جاوید باجوہ دے ایس قدم نال پوری دنیا وچ ملک و ملت دا وقار اُچا ہون دے نال پاک فوج وچ خواتین دی ترقی تے بھرتی دی نویں راہ وی کھل جائے گی تے مسلح فوجاں وچ شامل ہو کے وطن عزیز دے دفاع تے ملک و قوم دی خدمت سرانجام دین دی خاہش مند قوم دیاں دھیاں دی حوصلہ افزائی ہوئے گی۔

اپنا تبصرہ گھلو