میرے قائد داگھر

لکھت:طیبہ ضیا

کرو وائرس دے دوران پوری دنیا وچ جیہڑا فارمولہ تجویز علاج ہدایت حکم نامہ عام ہویا اوہ ،گھر رہو محفوظ رہو، اے۔ گھر توں وڈی جنت ایس دنیا وچ نہیں۔ اللہ تعالیٰ نے وی گھر نوں ای اپنی عبادت دی علامت تے مرکز بنایا۔ انسان ساری عمر اپنا گھر بنان دا خاب ویکھدا اے۔ قائداعظم نے وی بڑے ارماناں نال اک گھر بنایا سی پر ایہناں نوں خواباں دے ایس محل وچ رہنا نصیب نہیں ہو سکیا۔ میرے عظیم لیڈر قائداعظم نے اپنا عالی شان گھر وی چھڈ دتا۔ پاکستان وچ سیاسی و غیر سیاسی کئی حکمران آئے پر قوم دا محبوب قائد تے لیڈر اک ای اے جیہڑا رول ماڈل اے جس دی زندگی دا ہر پہلو آن والیاں نسلاں لئی مثال اے۔برطانیہ دے قابل تے برصغیر دے ہونہار پیشہ ور وکیل امیر ترین تے نفیس ترین طرز زندگی دے قائل میرے قائد جدوں مسلماناں دی فلاح لئی اٹھ کھڑے ہوئے تے نہ اپنی صحت ویکھی نہ اپنے محبوب ترین گھر دی پرواہ کیتی۔ جناح دی والدہ نے لاڈلے پتر نوں یورپ گھلن توں پہلے خاندان دی کُڑی نال نکاح کر دتا کہ کدھرے پتر یورپ توں گوری نہ کر لیائے۔ پہلی بیوی دا انتقال ہو گیا پر لاڈلا پتر یورپ توں گوری نہ کر سکیا۔اللہ تعالیٰ نے ایس دے خوبرو تے قابل ترین نوجوان دے موہڈیاں اُتے پاکستان بنان دی تریخی ذمہ داری پا دتی۔ ہندوستان آئے تے پسند دی شادی کیتی، اک دھی دے پیو بنے۔ عالی شان گھر بنایا پر مسلماناں دے حقوق دی جنگ دے جنون وچ نہ گھر بچیا نہ صحت نہ گھر والے، فیر نہ شادی کیتی نہ گھر بنایا نہ پاکستان بنان یا بچان لئی کسے امیر ترین دا تعاون یا مدد حاصل کیتی۔ میرے محبوب قائد دی بھین نے دسیا کہ ایس پاکستان دی خاطر محبوب قائد نے اپنے محبوب گھر نوں وی قربان کر دتا۔ 1947 وچ تقسیم ہند توں بعد محمد علی جناح پاکستان ٹُر گئے تے ایس نوازائیدہ مملکت دے پہلے گورنر بنے پر جناح دی اک محبوب شے ہندوستان وچ ای رہ گئی تے اوہ سی ممبئی وچ جناح دا بنگلہ، انڈیا تے پاکستان دے وچکار اک جھگڑا ایس بنگلے اُتے وی اے۔ جیہڑا پچھلے 70 ورھیاں توں چلیا آ رہیا اے۔ پاکستان، جناح دے ایس بنگلے اُتے اپنا حق جتاندا اے تے پاکستان دے عام شہری دی نظر وچ جناح دا ایہہ بنگلہ ایہناں دی یادگار اے۔ ایسے رہائش گاہ وچ قیام دے دوران جناح نے پاکستان دی بنیاد رکھی سی، ایس لئی لڑائی لڑی سی تے ایسے لئی پاکستان ایس اُتے دعویٰ پیش کردا اے پر ممبئی وچ محمد علی جناح دا ایہہ بنگلہ ہندوستان دیاں اکھاں نوں کھٹکدا اے۔ اینوں ملک دے بٹوارے دی سازش دا اڈہ تصور کیتا جاندا اے۔
انڈیا نے ممبئی وچ جناح دے بنگلے نوں ایٹمی پراپرٹی یعنی دشمن دی جائیداد قرار دے رکھیا اے۔ فی الحال ایہہ عمارت ویران پئی اے تے بھارتی حکومت دا ایس اُتے قبضہ اے۔ اک مقامی سیاستدان جیہڑے رئیل سٹیٹ دا دھندہ وی کردے نیں، اوہ جناح دی کوٹھی نوں ڈیگن دی مہم چھیڑے ہوئے نیں ایہناں دا خیال اے کہ ایہہ دشمن دی ملکیت اے، ایہہ ونڈ دے ذمے دار محمد علی جناح نے بنوایا سی۔ بٹوارے دی وجہ نال کافی خون خرابہ ہویا۔ ایہہ عمارت ایس تکلیف دی یاد دلاندی اے۔ ایس لئی اینوں ڈیگ دینا چاہیدا اے۔ ایس دی تھاں اک ثقافتی مرکز بنایا جانا چاہیدا اے۔ جناح نوں ممبئی شہر نال بوہت محبت سی۔ انگلینڈ توں واپس آ کے ایتھے وس گئے سن۔ اپنی رہائش لئی اوہناں نے ایہہ شاندار عمارت بنوائی سی۔ جناح نے ایہہ بنگلہ ایس دور دے یورپی بنگلیاں دی طرز اُتے بنوایا سی۔ ایس بنگلے دا ناں سائوتھ کورٹ اے۔ ایہہ بنگلہ جنوبی ممبئی دے مالا باربلز علاقے وچ اے۔ سمندر دے پاسے بنی ایہہ عمارت نوں بنان وچ جناح نے 1930 دی دہائی وچ تقریباً دو لکھ روپئے خرچ کیتے سن۔ ایس دا ڈیزائن مشہور اآرکیٹیکٹ لارڈبیٹلے نے تیار کیتا سی۔ ایس وچ اطالوی سنگ مر مر لگے نیں۔ نال ای لکڑی دا کم وی بوہت عمدہ قسم دا اے۔ایس بنگلے نوں جناح نے اپنے خواب دی عمارت دے طور تے بنوایا سی۔ ایس دی تعمیر لئی خاص طور تے اٹلی توں کاریگر بلائے گئے سن۔ ایس ویلے اوہ شہر دے مشہور بیرسٹر سن۔ جناح نے جنے جتن تے تندہی نال ایہہ بنگلہ بنوایا سی ایس توں واضح سی کہ ایہناں دا ارادہ ممبئی وچ ای رہن دا سی۔پر بعد وچ اوہ وکالت توں زیادہ سیاست وچ الجھ گئے تے آخر وچ مسلماناں لئی علیحدہ ملک، پاکستان حاصل کیتا، فیر اوہ اپنے بنائے وطن وچ رہن چلے گئے۔
جناح نوں لگدا سی کہ ونڈ توں بعد انڈیا تے پاکستان دے تعلقات اینے چنگے ہون گے کہ جدوں دل چاہے اوہ ممبئی آ کے کجھ دن اپنے گھر وچ رہ سکن گے پر دونواں ملکاں دے وچکار سرحد دی لکیر وجن نال ای دلاں دی خلیج اسمان توں وی اُچی تے سمندر توں وی ڈونگی ہو گئی۔ جناح دا واپس اپنے سپنیاں دے بنگلے وچ آن دا خاب ادھورہ ای رہ گیا۔ ونڈ توں بعد جدوں جناح پاکستان گئے تے اوہ چاہندے سن کہ ایہناں دے بنگلے نوں کسے یورپی نوں کرائے اُتے دے دتا جائے۔ نہرو ایس لئی راضی وی ہو گئے پر جدوں تیکر ایس معاہدے اُتے دستخط نہیں ہوئے سن کہ جناح دا انتقال ہو گیا۔ایس توں بعد ای ایس شاندار بنگلہ اُتے انڈیا تے پاکستان دے وچکار رسہ کشی جاری اے۔ جناح دی دھی دینا واڈیا نے وی ایس اُتے اپنا مالکانہ حق جتایا سی۔ انڈین حکومت نے ایٹمی پراپرٹی ایکٹ نوں منظوری دتی جس دے تحت ونڈ دے ویلے جیہڑے لوک پاکستان یا چین منتقل ہو گئے سن ایہناں دے وارث ایہناں دی جائیداد دا حق نہیں رکھدے تے اوہ حکومت دی ملکیت منی جائے گی۔ ممبئی وچ وزیر اعلیٰ دے بنگلے دے ٹھیک ساہمنے کھلوتی ایہہ عمارت انڈیا تے پاکستان دے مشترکہ ادھورے ورثے وچوں اک اے۔ ایس ویلے ایہہ پراپرٹی انڈین وزارت خارجہ دے قبضے وچ اے۔ کافی عرصے توں ایس عمارت دے متعلق ایہہ تنازع وی چل رہیا اے کہ ایس دے احاطے وچ جنوبی ایشیائی آرٹ دا سینٹر قائم کیتا جائے یا نہیں۔ حکومت پاکستان تے جناح دے کجھ وارث وی ایس عمارت اُتے اپنا دعویٰ کردے رہے نیں پر لودھا دا کہنا کہ ایٹمی پراپرٹی ایکٹ دے تحت جناح دے وارث ایس اُتے اپنے دعوے توں محروم ہو جاندے نیں۔۔۔ میرے محبوب قائد تے لیڈر جہیا پاکستان نوں نہ کوئی لیڈر نصیب ہو سکیا نہ نصیب ہون دی امید اے کہ محمد علی جناح اک ای سی باقی سب مایا اے۔ جویں عوام اونج دا لیڈر۔ محمد علی جناح دے عوام وی اوہ لوک سن جنہاں نے آزادی دی خاطر اپنے گھر بار چھڈ دتے تے فیر پاکستان نوں انج انج دے حکمران ملدے چلے آ رہے نیں جیہڑے غریب عوام نوں گھر تے نہیں دے سکے البتہ ایہناں ساریاں دے اپنے گھر عالی شان نیں۔

اپنا تبصرہ گھلو