پنجابیاں دا مان تہذہبی ورثہ!

سید علی عباس کاظمی

براعظم ایشیا دے ملک پاکستان دے سب توں وڈے صوبے پنجاب دے ضلع ساہیوال وچ ہسدا وسدا نکّا جیا قصبہ ہڑپہ جہڑا اپنے اندر اج توں 7 یاں 8 ہزار وریاں پہلاں دی تواریخ، ثقافت تے تہذیب نوں جہڑی کہ قدیم مصری تہذیب نال رلدی ملدی اے اپنے اندر وسائی بیٹھا اے۔ ہڑپہ ساہیوال شہر توں 25 کلومیٹر جنوب مغرب آلے پاسے وسدا پیا اے تے ایس ہڑپہ دے کھنڈرات توں وکھ وی ابادی وچ بہوں ساریاں عمارتاں اوس پرانے دور دیاں لئیاں ہویاں پکیاں اِٹّاں نال بنیاں ہویاں نیں جہناں وچوں اج وی اوس زمانے دی مٹی دی خشبو اوندی اے۔ ہڑپے نوں ہڑپہ کیوں آکھدے نیںساڈے مقامی لوکاں دے مطابق دو رویتاں نیں۔

پہلی رویت اک پرانی کتاب “رگ وید” دے حوالے نال ایس دا پرانا ناں “ہری ہوپا” سی جہڑا بعد وچ ہڑپہ بن گیا۔ دوجا کجھ ماہرین دی سوچ اے کہ ہڑپہ پنجابی زبان دے لفظ ہڑپ وچوں نکلیا اے جس دے مطلب کھا جانا یاں نگل جانا دے نیں جدوں ایس پرانے شہر دی بربادی ہون لگ پئی تے ایس دے مقامی لوکاں ایس شہر نوں ہڑپ آکھنا شروع کر دتّا جہڑا بعد وچ ہڑپہ آکھان لگ پیا۔ ایس تہذیبی مرکز دے کھنڈرات دے بارے پتا لگا اے کہ ایہ شہر بہوں ساریاں قدرتی تے لوکائی آفتاں تے دریا راوی دے سیلاب دیاں بربادیاں ہون دے نال وی کسے ناں کسے طور ہن تیکر اباد آوندا پیا اے۔ جنوبی ایشیا وچ ہڑپہ سب توں پہلا لبھیا ہویا تہذیبی اثار اے جہڑا 1856ء وچ اتفاقنً تے ڈرامے نال دریافت ہویا جدوں لہور تے ملتان دے وچالے ریلوے لاین وچھائی جاندی پئی سی اوس کجھ ویلے تیکر ایہ کھنڈرات اوہناں ٹھیکیداراں لئی اِٹّاں دی اک کان بنے رئے جہڑے ریلوے لاین وچھا رئے سن۔ ایہناں اِٹّاں نال ساہیوال توں خانیوال تیکر ٹرین دی پٹڑی تے نکے وڈے سٹیشن بنائے گئے کھنڈرات دے ملبے وچوں پرانی تہذیب دیاں مُہراں تے ہور اثار وی نکلے جناّں نوں مشہور ماہرِ اثار قدیمہ جنرل الیگزینڈر کنگھم نیں وڈی تاریخی اہمیت جہیا منیا تے جنرل کنگھم دی مداخلت نال ای ایتھوں اٹاں دی کھدوائی روکی گئی پر اوس ویلے تیکر لگ بھگ ادھے کھنڈرات تباہ تے برباد ہو چکے سن۔ ہڑپہ دے کھنڈرات دا رقبہ لگ بھگ 125 کِلے(ایکڑ) سی جہڑا ہن ایس ویلے گھٹ کے مساں 40 کِلے رہ گیا ہووے گا۔ ہڑپہ وچ اثار قدیمہ دی کھدوائی باقایدہ 1921ء وچ شروع ہوی جس دے بعد جنوبی ایشیا دی ایہ پہلی تہذیب دنیا بھر دے ماہر اثار قدیمہ تے دانشوراں دی توجھا تے دلچسپی دا محور بنی۔ ہڑپہ شہر دے شمال مغربی حصے وچ دریا راوی دے پرانے قدیمی لاگے دے کنارے ہڑپہ دی سب توں وکھ تے چوکھی عمارت “عظیم اناج گھر یاں گلہ گودام” دے اثار ملے نیں ایہ گلہ گودام 40 میٹر لمیں تے 35 میٹر چوڑے جبوترے تے بنایا گیا سی گودام وچ چھ چھ دیاں دو قطاراں وچ باہراں کوٹھیاں یاں ہال سن ایہ کوٹھیاں 4 فٹ اوچے جبوترے اوتے بنائیاں گئیاں سن ہر کوٹھی اصل وچ وڈا ہال سی جس دا فرش لکڑ نال بنایا ہویا سی کیوں جے اناج نوں نمی توں بچایا جاوے۔ ہال کھلے تے ہوا دار بنے سن تے گودام دی ایس وڈی ساری عمارت دے دو حصے سن جناں دے وچالے 23 فٹ چوڑی سڑک سی۔ ہڑپہ دے پرانے قدیمی اثار وچ چوکھی شے مُہراں سن ایہناں مُہراں توں ماہرین نے ہڑپہ دے اثار دی تواریخ دا اندازہ لایا اے بہوں ساریاں مہراں تے لکھت دے نال کسے ڈنگر دی شکل وی بنی ہوی اے جناں وچ ہاتھی، گینڈا، مگر مچھ، گاں تے شیر دیاں شکلاں چوکھیاں نیں ایہناں مہراں دی لکھت اجے تیکر پڑھی نہیں جاسکی۔ بہوں ساریاں مہراں پتھر نال بنائیاں ہویاں نیں بچیاں دے کھڈونے جہڑے مٹی نال بنے ہوئے نیں اوہناں دیاں عام شکلاں بندیاں تے ڈنگراں نال رلدیاں ملدیاں نیں ایس توں لگدا اے کہ اوہ لوکی سوکھے تے کھیڈاں دے بہوں شوقین سن بچیاں دے کھڈونیاں وچ بہوں سارے ڈنگر، پرندے، تے گڈے شامل نیں۔ ہڑپہ توں مٹی دے بھانڈیاں دی وڈی گنتری لبھی اے اوہ لوکی مٹی نال ہر طرحاں دے بھانڈے بناون دے ماہر سن کنک (اناج) سامبھن لئی وڈے مٹکیاں توں لے کے ورتن والے ہر قسم دے بھانڈے اوہ لوکی کبھار دے چاک تے بنا لیندے سن بھانڈیاں تے رتا رنگ کیتا جاندا سی تے اوتے کالے رنگ دے پُھل بوٹے وی بنائے جاندے سن ہڑپہ دیاں قبراں وچوں مردیاں دے نال نال دفنائے ہوئے بھانڈے وی لبھے نیں مردیاں دے نال باقایدہ بھانڈے تے شَیواں وی دفنائیاں جاندیاں سی جس توں ایہ اندازہ لایا جا سکدا اے کہ اوہ لوکی حیاتی بعد از مرگ تے یقین رکھدے سن تے ایس تھاں تے سو توں زیادہ اکٹھیاں تدفیناں دے اثار وی لبھے نیں تے بالاں دیاں لاشاں مٹکیاںوچ ای دفن کر دتیاں جاندیاں سن۔
1987ء توں لے کے ہن تیکر امریکی ماہرین اثار قدیمہ پاکستان دے محکمہ اثار قدیمہ دے تعاون نال ہڑپہ کھنڈرات دے جنوبی حصے دی کھدوائی وچ مصروف نیں جس دے نتیجے وچ بہوں سارے ودھیا اثار دریافت ہوئے نیں۔ ایہناں وچ مکان، سڑکاں، بھٹیاں تے کارخانے شامل نیں۔ اثار قدیمہ دے ماہراں دا آکھن اے کہ ہڑپہ تِن واری برباد ہویا کیوں جے زمین دے تھلیوں جہڑے مکان برآمد ہوئے اوہ اک ای نینہہ اوتے تِن وار بنائے ہوئے سن ایہناں مکاناں دے ویڑے بہوں وڈے تے کھلے تے وڈے سلیقے نال بنائے گئے سن پانی دے کڈھن دا انتظام وی چوکھا سی زمین دے تھلیوں جہڑیاں شیواں یاں کتبے لبھے سی اوہناں اوتے انج دی زبان لکھی ہوئی اے جس نوں اج تیکر کوئی نہیں پڑھ سکیا ایس لئی اج تیکر ہڑپہ دی کوئی انج دی تواریخ نہیں لکھی جاسکی جس تے اعتبار تے یقین کیتا جاوے۔ پاکستان وچ ایہو جئیاں بہوں ساریاں تواریخی تھاواں نیں جناں وچ تواریخ نال چاہ کرن والے لوکاں تے طالب علماں لئی ڈونگی دلچسپی دا عنصر رچیا وسیا ہویا اے۔ ایہ ساریاں تھاواں پرانی قدیم تہذیب دیاں شکلاں نیں تے روزوار ہزاراں دی گنتری وچ سیاح تے تواریخ دے کھوجی ایہناں تھاواں نوں ویکھن لئی آندے نیں ایہناں تھاواں وچ ہڑپہ، موہنجوداڑو، تے ٹیکسلا جئے تھاں شامل نیں جناں وچ ہڑپہ تے موہنجوداڑو نوں چوکھی اہمیت لبھی اے۔ کیوں کہ ایہناں دی تہذیب ست یاں اٹھ ہزار وریاں دے نیڑے پرانی اے ہڑپہ دا تواریخی شہر ساہیوال توں پنجھی کلومیٹر دے فاصلے تے وسدا اے۔ کجھ ماہرین آکھدے نیں کہ ہڑپہ دی تواریخ 2250 قبل مسیح تیکر اے تے کجھ آکھدے نیں کہ 2500 قبل مسیح تیکر اے۔ ہڑپہ وچ اک مزار وی اے تے ایس دی اک خاص گل ایہ وی اے کہ مزار وچ پئی قبر 9 گز لمی اے جس وجہ توں ایس مزار نوں نو گزہ آکھیا جاندا اے۔ جہڑے سیاح ایس تھاں اوندے نیں اوہ ایس مزار نوں ضرور ویکھدے نیں کھدوائی دے ٹایم جہڑیاں شیواں لبھیاں نیں اوہناں شیواں نوں اک عجائب گھر وچ رکھیا ہویا اے ایہناں شیواں وچ زیورات، بھانڈے، مردیاں دے ڈھانچے تے بالاں دے کھڈونے شامل نیں۔ سندھ دی تواریخ وی ایہدے نال رلدی ملدی اے تے اینیاں وریاں تے ای قایم اے۔ کھنڈرات دی رہتل بہتل ہون ماڑی ہوندی جاندی اے تے حکومت نوں چاہیدا اے کہ ایس نوں بچان لئی قدم چُکے کیوں جے ساڈا ایہ قیمتی تہذیبی تے ثقافتی ورثہ برباد ناں ہو جاوے۔ ایہ سچ اے کہ ہر عروج نوں زوال اے پر تہذیباں دے عروج دیاں باقیات اوہناں دے زوال وچ کدرے فخر دا باعث سمجھیاں جاندیاں نیں تے کدرے عبرت دا نشان۔ پچھلے ویلے دا ایہ سوہنا شہر ہزاراں وریاں زمین اندر دفن ریہا تے صدیاں ایس تے کوئی کم ناں ہو سکیا پر ہڑپہ دے اوچے لمیں ٹیلے تواریخ داناں، سیاحواں تے ماہرین اثار قدیمہ نوں اپنا بھیدی بناون لئی تیار نیں بس ایہناں ول تھوڑی توجھا دی لوڑ اے۔

اپنا تبصرہ گھلو