پاکستان دا کشمیریاں نال اظہار یکجہتی لئی 5اگست نوں یوم استحصال منان دا اعلان

اسلام آباد: وزیر خارجہ شاہ محمود قریشی آکھیا اے کشمیریاں نال اظہار یکجہتی لئی 5اگست نوں یوم استحصال مناواں گے۔ اسلام آباد وچ وزیر اطلاعات شبلی فراز تے وزیراعظم دے مشیر برائے قومی سلامتی امور معید یوسف دے نال پریس کانفرنس دے دوران شاہ محمود قریشی آکھیا اج دے دیہاڑ جموں و کشمیر نوں 3حصیاں وچ تقسیم کرن دی سازش ہوئی، بھارت نے کشمیریاں دا جھنڈا کھویا، اوہناں دا تشخص مٹان دی کوشش کیتی، ہندو پنڈت، لداخ دا بدھ مت یا وادی دا مسلمان کسے نے تقسیم نوں قبول نہیں کیتا، اج شائننگ انڈیا سلگ رہیا اے۔ وزیر خارجہ آکھیا حق خود ارادیت دی دوجہد وچ کشمیریاں دا لہو شامل اے، اسیں ایس جدوجہد وچ کشمیریاں دے نال کھڑے آں۔ آخری فتح تک کشمیریاں دے نال کھڑے رہواں گے، نہ کشمیری جھکن گے تے نہ افواج پاکستان پچھے ہٹے گی، خون بولدا اے تے اوہ بولے گا، ایل او سی تے وکھا رہے آںکہ بھارت کیہ حرکتاں کر رہیا اے۔وزیر خارجہ نے کشمیریاں نال اظہار یکجہتی لئی 5اگست نوں یوم استحصال منان دا اعلان کردیاں آکھیا سانوں 5اگست 2020نوں رل کے کشمیریاں نوں پیغام دینا اے کہ سیاسی دھڑے بازی دے باوجود کشمیر دے معاملے تے اسیں اکٹھے آں، ساڈی نظر سری نگر اُتے اے، کشمیر ہائی وے نوں 5اگست توں سری نگر ہائی وے دا ناں دتا جائے گا۔ سری نگر ہائی وے سانوں کشمیر تک لے جائے گا۔