کرونا توں بچو، عید سادگی نال منائو !

shahid nadeem

لیکھت:تحریر:شاہد ندیم احمد

عید اک انج دا مذہبی فریضہ اے جیہڑا نہ صرف پاکستان، بلکے پوری دنیا وچ جتھے کدھرے مسلمان آباد نیں، پوری مذہبی عقیدت تے جوش و جذبے نال منایا جاندا اے۔ خاص طور تے عبدالضحیٰ دے موقعے تے سنت ابراہیمی دی ادائیگی دے حوالے نال خصوصی جوش و خروش ویکھن وچ آندا اے۔ سنت ابراہیمی دی ادائیگی نوں سہل بنان لئی ہر ورہے خصوصی مویشی منڈیاں دا انتظام کیتا جاندا رہیا اے پر ایس وار کرونا وائرس دے ممکنہ پھیلائو دے پیش نظر مویشی منڈیاں دی تعداد گھٹ توں گھٹ رکھن تے اوتھے حفاظتی تدبیراں یقینی بنان دا فیصلہ کیتا گیا اے۔ وزیراعظم وی ہدایت دے رہے نیں کہ عید سادگی نال منائی جائے، پر وڈی عید دے نیڑے آندے ای بازاراں وچ خریداری وچ بہترین آن دے نال عوام دا رش ودھ گیا اے۔ بازاراں وچ کسے قسم دی احتیاط نہیں کیتی جا رہی، تاجر آپ حفاظتی اقدامات اُتے عمل کردے، نہ ای گاہکاں نوں ٹوکدے نیں۔ حالاں کے لاک ڈائون ختم کردے ویلے تاجر تنظیماں دے عہدیدار ہر طرح دی ضمانت تے یقین دہانیاں کرواندے رہے نیں۔ ایسے طرح مویشی مارکیٹاں وچ وی ایس او پیز دی کھلی خلاف ورزیاں ویکھن وچ آ رہیاں نیں جد کہ انتظامیہ دے اقدامات دا حال ایہہ اے کہ اول تے سرکاری عملہ موجود نہیں تے جے کدھرے ہے تے اپنے فرائض توجہ تے دیانت داری نال انجام نہیں دے رہیا ۔ ایسے طرح ہن تیکر شہراں دے اندر عارضی منڈیاں یا گلی گوچیاں تے بزاراں وچ جانور لے کے پھرن والیاں نوںوی روکیا نہیں جا سکدا۔ انج خدشہ موجود اے کہ جیہڑے ایس پیز وبائی مرضاں نوں کنٹرول کرن والے مرکزی ادارے نے بنا کے جاری کیتے نیں ایہناں اُتے قربانی دے تن دناں وچ وی عمل اوکھا ہوئے گا کیوں جے ایس او پیز اُتے عملدرآمد کروانا انتظامیہ دا کم اے، پر انتظامیہ دی لاپرواہی دا ای نتیجہ اے کہ حکومت دی ساری تر کاوشاں دے باوجود حوصلہ افزا نتیجے ساہمنے نہیں آ رہے۔
کرونا دا پھیلائو روکن لئی ضروری اے کہ وڈی عید سادگی نال منائی جائے کیوں جے عیدالفطر اُتے لاپرواہی پاروں ای کرونا دی وبا تیزی نال ودھی تے موتاں وچ وادھا ہویا سی، انج دی لاپرواہی عیدالاضحی اُتے نہیں ہونی چاہیدی۔ وفاقی تے صوبائی حکومتاںدے بہترین اقدامات پاروں کرونا کیساں وچ بتدریج کمی آنا جتھے خوش آئند اے اوتھے ایہہ امید وی اے کہ گراوٹ دا شکار معیشت وی جلدی بہتری پاسے رواں ہو جائے گی۔ کرونا وبا اُتے قابو پان دا کلیدی حل لاک ڈائون نوں گردانیا گیا جس اُتے عملدرآمد نال پوری دنیا وچ مثبت نتیجے ساہمنے آئے، تاں جتھے لاک ڈائون کرونا دی وبا روکن وچ ماون ثابت ہویا اوتھے معیشت نوں وی ناقابل تلافی نقصان اپڑان دا محرک بنیا اے۔ صنعتاں، تجارتی مراکز تے مارکیٹاں بند ہون نال بیروزگاری تیزی نال ودھی تے نت نویں عوامی مسئلے تے مشکل حالات نوں جنم دتا اے۔ کرونا نال نبرآزما حکومتاں ایس معاشی گراوٹ پاروں نویں حل تے طریقے سوچن اُتے مجبور ہو گئیاں کہ معیشت نوں کنج سنبھالا دتا جائے تے بیروز گار ی دے ودھدے ہوئے طوفان نوں کنج روکیا جائے۔ جے انج نہ کیتا گیا تے ودھدے ہوئے معاشی دبائو پاروںخاص طور تےترقی پذیر ملکاں دی حکومتاں بے بس ہو جان گیاں۔ ایس دا اک حل اسمارٹ لاک ڈائون دی صورت وچ ساہمنے آیا کہ سارے علاقیاں نوں بند کرن دے بجائے کرونا توں متاثر محدود علاقیاں نوں بند کر کے بتدریج مسئلے اُتے قابو پان دی کوشش کیتی جائے۔ ایس طرح معاشی پہیہ وی چلدا رہے گا تے عوام لئی وی مسئلے پیدا نہیں ہون گے۔ اسمارٹ لاک ڈائون دا طریقہ مکمل لاک ڈائون توں زیادہ بہتر ثابت ہویا تاں ہن ایسے طریقے اُتے عمل پیرا ہون اُتے زور دتا جا رہیا اے۔
ایس وچ شک نہیں کہ سمارٹ لاک ڈائون دا طریقہ کار کرونا وبا دے خلاف اک موثر حکمت عملی اے، پر عوام آئے دن دے لاک ڈائون توں بے زار ہو چکے نیں، اوہ کرونا توں ڈرنا نہیں لڑنا اے دے سلوگن نوں اپنا کے کرونا توں اینے بے خوف ہوئے نیں کہ حکومتی ایس او پیز نوں وی نظر انداز کرن لگے نیں۔ ایس موقعے اتے وزیراعظم عمران خان دا کہنا بجا اے کہ عیدالفطر اُتے عوام دی طرفوں ہون والی لاپروائی پاروں کرونا دی وبا انتہائی تیزی نال ودھی جے ایس موقعے اُتے تاجر تے عوام بے صبری دا مظاہرہ کرن دے بجائے ایس او پیز اُتے عمل پیرا ہوندے تے اج صورت حال وکھری ہوندی تے ہسپتالاں وچ طبی عملہ دبائو دا ساہمنا نہ کر رہیا ہوندا پر حکومت نوں اپنی تے اپنی انتظامیہ دی کوتاہیاں اُتے وی نظر ثانی کرنی ہوئے گی۔ حکومت دا کم اجلاس وچ فیصلے کرنا تے احکامات جاری کرنا ای نہیں انتظامیہ دے ذریعے فیصلیاں اُتے عمل درآمد کروانا وی شامل اے۔ جے انتظامیہ نے انج ای حکومتی احکامات نوں ہوا وچ اڑان دی راہ اپنائے رکھی تے کرونا توں چھٹکارے دا خاب ادھورہ ای رہ جائے گا۔ عیدالاضحی اُتے عوام دے ذمے دارانہ رویئے دے نال انتظامیہ نوں وی محرک کرنا ضروری اے نہیں تے حکومت فیر وڈے پیمانے تے لاک ڈائون کرن اُتے مجبور ہو جائے گی جس دا لامحالہ نقصان معیشت تے عوام دونواں نوں ای اپڑے گا۔ کرونا کیساں وچ کمی پاروں ای وفاقی وزیرتعلیم نے پورے ملک دے تعلیمی ادارے 15 ستمبر نوں کھولن دا مژدہ سنایا اے جس نال تعلیمی اداریاں دے مالکاں تے استاداں دے نال طلباء وچ خوشی دی لہر دوڑ گئی پر جے عیدالاضحی دے موقعے تے عوام نے ایس او پیز اُتے عملدرآمد نہ کیتا تے سابقہ روایات نوں برقرار رکھدے ہوئے لاپروائی دا مظاہرہ جاری رکھیا تے ایہہ معمولی جہی ملن والی خوشی غارت تے اک وار فیر لاک ڈائون پاروں عوامی مسئلیاں وچ وادھا ہو سکدا اے۔ ایس لئی عوام نوں وزیراعظم دی ہدایت اُتے عمل کردے ہوئے کرونا توں اپنے آپ نوں بچان لئی عیدالاضحی سادگی نال منانی ہوئے گی تاں ایس خواہش دی تکمیل پوری ہوندی وکھائی دیندی اے۔

اپنا تبصرہ گھلو