وزیراعلیٰ عثمان بزدار نے الحمرا وچ کیلی گرافک نمائش ’معجزہ فن‘ دا افتتاح کر دتا

لہور( پنجابی میڈیا گروپ) وزیراعلیٰ عثمان بزدار نے الحمرا آرٹس کونسل وچ کیلی گرافک نمائش ’معجزہ فن‘ دا افتتاح کر دتا۔ وزیراعلیٰ عثمان بزدار نے خطاطی دے راہیں اسمائے محمدؐ دے خوبصورت فن پاریاں وچ گہری دلچسپی دا اظہار کیتا۔ عثمان بزدار نے کیلی گرافک نمائش وچ رکھے گئے اسلامی خطاطی دے فن پاریاں نوں سراہیا۔ کیلی گرافک نمائش وچ پاکستان، ترکی تے دوجے اسلامی ملکاں دے خطاط دے 350فن پارے رکھے گئے نیں۔ عثمان بزدار نے کیلی گرافک نمائش دے شاندار انعقاد تے محکمہ اطلاعات و ثقافت تے الحمرا آرٹس کونسل دی کاوش دی تعریف کیتی۔ اوہناں دا کہنا سی ہفتہ شان رحمت اللعالمینؐ صوبہ بھر وچ مذہبی جوش و خروش تے عقیدت و احترام نال منایا جا رہیا اے، نبی پاکؐ دی عظمت تے شان نوں لفظاں وچ بیان نہیں کیتا جا سکدا، خطاط نے دلکش فن پاریاں دے راہیں اسمائے محمدؐ نوں اجاگر کیتا اے۔ نبی پاکؐ نے امن، تحمل، برداشت، بھائی چارے تے اتحاد دا پیغام دتا، اج وی اسوہ حسنہ تے عمل پیرا ہو کے اسیں اپنے مسئلے حل کر سکنے آں۔