دیس وچ صرف اپوزیشن دا احتساب نہیں ہو رہیا، ایہ تاثر غلط اے: شہزاد اکبر

لہور( پنجابی میڈیا گروپ)مشیر داخلہ شہزاد اکبر آکھیا اے ایہ تاثر بے بنیاد اے کہ دیس وچ صرف اپوزیشن نال تعلق رکھن والے لوکاں دا احتساب ہو رہیا اے ، شوگر انکوائری وچ شامل بندیاں دا تعلق ساری جماعتاں نال اے۔ لہور وچ وزیراعلیٰ پنجاب دے نال پریس کانفرنس کردیاں اوہناں دا کہنا سی سرکاری زمیناں تے بااثر بندیاں نے قبضے کر رکھے سن۔ قبضہ مافیا ایسے سیسلین دا حصہ اے جہدا ذکر سپریم کورٹ نے کیتا سی۔ شہزاد اکبر آکھیا ساڈے دور وچ 532فیصد ریکوری وچ وادھا ہویا۔ قبضہ مافیا توں 181ارب دی اراضی واگزار کرائی گئی۔ لٹیا مال وصول کرکے خزانے وچ جمع کرایا جا رہیا اے۔ وفاق دی طرح پنجاب وچ وی کسے نوں این آر او نہیں ملے گا۔ سرکاری زمیناں تے بااثر بندیاں نے قبضے کر رکھے سن۔ اوہناں دا کہنا سی ملکی وسائل لُٹن والیاں توں وصولیاں کرکے قومی خزانے وچ جمع کراواں گے۔ ایہ تاثر غلط اے کہ صرف اپوزیشن دا احتساب ہو رہیا اے۔ اک جماعت نوں ٹارگٹ کرن دا تاثر وی غلط اے۔ شوگر انکوائری وچ لوکاں دا تعلق ساری جماعتاں نال اے۔ اوہناں آکھیا نواز شریف دے باہر جان دے فیصلے تے اسیں شورٹی بانڈ منگیا سی۔ برطانوی سرکار توں نوازشریف نوں ڈی پورٹ کرن دا مطالبہ کر چکے آں۔ نوازشریف دا کیس دوجے ملزمان توں وکھرا اے۔