فیاض الحسن چوہان دا گوجرانوالہ جلسے اُتے1ارب 3کروڑ دے خرچہ دا دعویٰ

لہور(بھلیکھا ٹی وی ) فیاض الحسن چوہان نے گوجرانوالہ جلسے اُتے اک ارب3کروڑ دے خرچے دا دعوی کر دتا۔ اوہناں نے آکھیا اپوزیشن جلسے اُتے اک ارب3کروڑ روپے خرچ کر رہی اے، پہلا سوال اے کہ ایہ پیسہ کیتھوں آ رہیا اے ؟۔وزیر اطلاعات پنجاب فیاض الحسن چوہان نے میڈیا نا گل بات کر دیاں آکھیا کہ کورونا دے حوالے نال صورتحال سب کے ساہمنے اے، پنجاب دے2وزیراں نوںکورونا ہوگیا اے، حساس معاملے اُتے سیاست کرن دی ضرورت نہیں، ایس او پیز تے شرائط دے نال اپوزیشن نوں جلسے دی اجازت دتی، ایہ2لکھ روپے ماسک اُتے وی خرچ کر دیں، دیکھدے آں ایہ کورونا ایس او پیز اُتے کس قدر عمل کردے نیں۔فیاض الحسن دا کہنا سی کہ اپوزیشن جماعتاں دا اتحاد مکس اچار پارٹی اے، بارہ مصالحیاں والی چارٹ تے سنی، گیارہ مصالحیاں والی مکس اچار پارٹی ہن ویکھ رہے آں، ایس مکس اچار پارٹی وچ اقربا پروری، منی لانڈرنگ دے مصالحے وی نیں، اینہاں گیارہ مصالحیا ں وچ جعلی ٹی ٹی دی دال چینی وی اے، ایس وچ جعلی اکاونٹاں دے لونگ بھی نیں، ایہ مصالحے بوہت تیکھے نیں، پہلاں ہی اینہاں مصالحیا ں نے پاکستان دی معیشت تے عوام دے معدوں نوں السر تے کینسر کیتا ہویا، اگر ہور تیکھے مصالحے استعمال کیتے تے پاکستان دی معیشت دا معدہ خراب ہوجائے گا۔

اپنا تبصرہ گھلو