استاد عبدالحمید نظامی
رانا محمد اکرم شاد
ساڈا ہار شنگھار نظامی
یاراں دا سی یار نظامی
تیریاں لکھتاں وچوں آوے
اج وی پئی مہکار نظامی
انھی بونجھاں ماہ نومبر
آیا وچ سنسار نظامی
رب سوہنے دے فضل تے کرموں
مدنی دا حب دار نظامی
اصغر علی استاد پیارے
سر رکھی دستار نظامی
سردار عالم مرشد تیرا
کردا تینوں پیار نظامی
نعتاں دے پھل پیش کریندا
وچ مدنی دربار نظامی
رکھاں آگ ورھائی جیکر
بنیا دم دم ٹھار نظامی
نور دے رنگ ، مرشد دے سنگ
ہویا پُر انوار نظامی
بوہے فرید دے نال عقیدت
جاوے سو سو وار نظامی
چاء مدینے، تے سبھ لکھتاں
لکھے نیں شاہکار نظامی
چُمے جد نعلین نبی دے
پائے فیر اسرار نظامی
گلی مبارک تیری اندر
آیا منگنہار نظامی
اللہ نبی دے سوہنے ناں وی
لکھے وارو وار نظامی
کر تحریر تفسیر قرآنی
ہویا حق دا یار نظامی
قرآن پاک دا وچ پنجابی
التھا کیتا یار نظامی
سیرت النبی ایوارڈ سی پہلے
فیر ایوارڈ سردار نظامی
پت وحید ، سعید پیارے
روون ڈھائیں مار نظامی
فیر فرید ، نوید دے سینے
صدمے نال فگار نظامی
فضل الہی کنہوں آکھے
لہور پھیرا مار نظامی
خبر سنی جد یسین تے اعظم
روئے پُبھاں مار نظامی
ویکھ حفیظ تیرا اج قسمے
بیٹھا ہمت ہار نظامی
تیرے باہجوں سُنّا سُنّا
تیرا سبھ پروار نظامی
صغریٰ صدف، مدثر بٹ وی
بہہ گئے بُکل مار نظامی
وساپُوری تے کامل تیرے
سوہنے سن دلدار نظامی
ملک اکرم تے خاکی وی اج
غم تھیں ہِن لاچار نظامی
صابر ورک تے اصغر کھوکھر
سبھ نوں گیوں وسار نظامی
علیزہ روندی چپ ناں کردی
لبھدی پیو دا پیار نظامی
زین امیر وی بھجدے آئے
کرن تیرا دیدار نظامی
تیرے باہجوں راول تیرا
روندا زارو زار نظامی
کونج پکار دے سارے پُھل
لڑی پروتا ہار نظامی
مولائی دیاں لکھتاں کیتیاں
پنجابی لاء پرکار نظامی
جمعے نوں آئے اچن چیتی
سدیا سی اتوار نظامی
سُنجے دِسن تیرے باہجوں
شہر گلی بازار نظامی
اچن چیتی ادب دا سورج
جا لتھا وچ غار نظامی
تینوں اوکڑ کدے ناں آوے
رب اے بخشن ھار نظامی
اکرم مَل دوارا بیٹھا
میں صدقے بلہار نظامی
ساڈا ہار شنگھار نظامی
ماشاءاللہ بہت سوہنا تے عقیدت اچ گھنیا ہویا کلام اک پیارے لئی اینا پیارا لکھنا پیار دا حق تے بندا اے
وااااااااااہ