نواز شریف دا بیا نیہ بھارت نواز،شہباز شریف وی متفق نہیں: کرنل (ر)ہاشم ڈوگر

صوبائی وزیر بہبو آبادی پنجاب دی روزوار بھلیکھا نال خصوصی گل بات

انٹرویو: علی عمران چٹھہ

صوبائی وزیر بہبود آبادی پنجاب کرنل (ر) ہاشم ڈوگر دا تعلق قصور دے اک نواحی علاقے کنگن پور توں اے جس نوں ماضی دی حکومتاں نے نظر انداز کیتا جس دی وجہ نال نسبتاً پسماندہ اے۔ ایس علاقے توں کرنل ہاشم ڈوگر (ر) رکن صوبائی اسمبلی تے صوبائی وزیر منتخب ہون دے بعد جس تیزی نال سیاست وچ اپنا مقام حاصل کیتا ایس دی مثال گھٹ ای ملدی اے۔پچھلے دناں اک عرصے دے بعد ایہناں نال ملاقات ہوئی جس وچ اوہناں نے روزنامہ بھلیکھا نال گل بات کردے ہوئے قومی سیاست حکومتی کارکردگی تے علاقائی ڈویلپمنٹ اُتے خصوصی روشنی پائی۔ صوبائی وزیر بہبود آبادی حکومت پنجاب کرنل ( ر) ہاشم ڈوگر دا کہنا سی کہ مسلم لیگ ن دے قائد میاں محمد نواز شریف تے ایہناں دی دھی مریم نواز کرپشن کیساں وچ این آر او نہ ملن اُتے پریشان نیں ۔ تے ایسے عالم وچ اوہ اپنے بھارتی دوستاں دا بیانیہ عوام وچ سرائیت کرن دی کوشش کر رہے نیں ۔ مسلح فوج دے سربراہ تے آئی ایس آئی دے ڈی جی دے خلاف من گھڑت جھوٹے الزام لا کے دشمن ملک نوں خوش کیتا جا رہیا اے ایہناں دے بیانیہ دے خلاف مسلم لیگ ن وچ وی غم و غصہ پایا جا رہیا اے حتیٰ کہ مسلم لیگ ن دے صدر تے قائد حذب اختلاف وی متفق نہیں ایسے لئی اوہناں نے عدالت عالیہ توں اپنی ضمانت دی درخواست واپس لے کے جیل نوں فوقیت دتی۔سابق وزیر اعلیٰ بلوچستان ثنا اللہ زہری تے سینیٹر لیفٹیننٹ جنرل (ر) عبدالقادر بلوچ و دیگر دا پارٹی چھوڑنا ایس امر دی دلیل اے بوہت جلدی بوہت سارے لیگی رہنما اپنی حب الوطنی دا ثبوت دیندے ہوئے نواز مریم دے بیانیے توں اپنے آپ نوں وکھرا کر لین گے۔ حکومت مخالف اتحاد دے بارے وچ اوہناں نے کہیا کہ ایس وچ اختلافات کھل کے ساہمنے آ گئے نیں پی پی پی تے اے این پی سنے دیگر جماعتاں دے رہنمائواں نے وی مولانا فضل الرحمن توں نواز شریف دے بیانیہ دے متعلق حب الوطنی دے تقاضیاں دے عین مطابق شکایت اے تے آئندہ کجھ ہفتیاں وچ ایہہ اتحاد پا رہ پارہ ہو جائے گا۔ پی پی پی تے ن لیگ دے دور وچ ملک نوں بے رحمی نال لٹیا گیا۔ تے عوام نوں آئی ایم ایف دے رحم و کرم اُتے چھڈ دتا گیا ملکی معیشت دے نال گھنائونا کھیڈ کھیڈیا گیا

مہنگی بجلی دے پراجیکٹس اپنیاں نوں لگوا ئے گئے شوگر تے آٹا انڈسٹریز نوں سرکاری خزانے سبسڈی و دیگر سہولتاں دے کے مافیا بنا دتا گیا جد کہ زراعت تے غریب کسان نوں تباہی دے دہانے اُتے لا کھڑا کر دتا گیا مہنگائی دے بارے وچ گل کردے ہوئے اوہناں نے کہیا کہ اسیں مافیا نوں مات دین لئی سہولت بازاراں دا انعقاد کیتا اے جس وچ عوام نوں آٹا گھی چینی تے دیگر کھان پین والیاں شیواں وافر مقدار وچ میسر نیں تے خصوصی طور اُتے ایس دی نگرانی وزیراعظم عمران خان تے وزیراعلیٰ پنجاب سردار عثمان بزدار دی ہدایت اُتے صوبائی وزراء تے پورے صوبے دے کمشنر تے ڈپٹی کمشنرز کر رہے نیں ۔ پنجاب دی بارہ کروڑ عوام نوں ریلیف دین لئی حکومت کمربستہ اے تے ایس سلسلے وچ کسے قسم دی کوتاہی تے نااہلی برداشت نہیں کیتی جائے گی۔ اپنے محکمہ دی کارکردگی دا ذکر کردے ہوئے اوہناں نے کہیا کہ پنجاب دی تاریخ وچ پہلی وار وزیراعظم عمران خان دے ویژن دے مطابق آبادی نوں صحیح معنیاں کنٹرول کرن دی کوشش کیتی جا رہی اے۔

صوبہ پنجاب دی مردم شماری دے مطابق پنجاب دی ایس ویلے آبادی 12 کروڑ اے جیہڑی آئندہ آن والے 15 ورھیاں وچ وھ کے 20کروڑ ہو جائے گی ایس نوں کنٹرول کرنا بوہت ضروری اے ایس لئی مربوط حکمت عملی دے تحت علمائے دین نوں نال ملا کے 10 ضلعیاں وچ امام مسجداں دے ذریعے عوام بہبود آبادی دے شرعی حقائق توں آگاہ کیتا جا رہیا اے۔ ایس مقصد لئی امام مسجد نوں سرکاری وظائف وی دتے جا رہے نیں تے ایس دے مثبت نتیجے ساہمنے آن اُتے ایس دا دائرہ کار آئندہ ورھیاں وچ پورے صوبے وچ ودھا دتا جائے گا۔ اوہناں نے قرآن پاک دی آیات دا حوالہ دیندے ہوئے کہیا کہ سورۃ البقرہ وچ اے کہ ماں اپنے بچے نوں اڑھائی ورھے تیکر دودھ پلائے نبی آخر الزمان نے وی ماں تے بچے دے حقوق دی بوہت تلقین کیتی اے ساڈی قوم نوں سمجھنا چاہیدا اے کہ ساڈے وسائل ودھدی ہوئی آبادی دے لحاظ توں گھٹ اے جے بچے گھٹ ہون گے تے ایہناں دی تعلیم و تربیت بہتر انداز وچ ہو سکے گی تے اوہ معاشرے دے فعال شہری بن سکن گے۔ بہبود آبادی لئی اسیں بس اسٹینڈ، ریلوے اسٹیشناں اُتے آگاہی لئی خصوصی کائونٹر لا رہے نیں ۔

ساڈی ایہناں کاوشاں نوں صدر مملکت نے وی سراہیا اے۔ اپنے حلقے دے ترقیاتی کماں دا ذکر کردے ہوئے اوہناں نے کہیا کہ میں اپنے حلقے وچ ڈویژنل پبلک سکول دی برانچ منظور کروائی اے جس نال بچیاں دا تعلیمی معیار بلند ہوئے گا تے ایہہ برانچ اگلے ورھے تیکر فعال ہو جائے گی۔ اسیں تحصیل تے ڈسٹرکٹ ہسپتالاں دی حالت زار وی بہتر کیتی اے ہسپتالاں وچ جدید مشینری تے عملے دی کمی نوں پورا کرن دے نال نال تعمیراتی نوں وی بہتر کیتا اے۔

صوبائی وزیر بہبود آبادی کرنل (ر) ہاشم ڈوگر نے کہیا کہ حکومت بوہت جلدی کساناں دے مسائل حل کرن جا رہی اے ایس سلسلے وچ فلیٹ ریٹ اُتے بجلی دی 24 گھنٹے دستیابی اجناس نوں معقول معاوضہ سستی کھاد، بیج دی ویلے اُتے فراہمی جدید ٹیکنالوجی دا فروغ ساڈی ترجیحات وچ اے ایہہ ثمرات آئندہ مالی ورھے توں پہلں کساناں تیکر اپڑانا شروع ہو جان گے تے ساڈی حکومت مزدور کسان دوست اے ایہناں دے مسائل دا حل ساڈی اولین ترجیح اے جد کہ کساناں نوں معیاری پیسٹی سائیڈ دی فراہمی نوں وی یقینی بناواں گے۔ ایس دے علاوہ کساناں نوں جدید ریسرچ دے ذریعے ہائیبرڈ بیج دی تیاری لئی وی کم جاری اے تے کساناں نوں ون ونڈو اپریشن دے تحت اسان قسطاں اُتے زرعی قرضہ جات دی فراہمی وی جاری اے صنعتی پہیہ چالو رکھن لئی وزیراعظم پاکستان نے بجلی قرضیاں وچ 50 فیصد کمی کیتی اے اسیں کسے نوں وی غریب دا حق کھان نہیں دیاں گے جویں کہ اسیں سارے جاننے آں کہ وزیراعظم عمران خان دی کرونا کنٹرول پالیسی نوں پوری دنیا خاص طور اُتے ورلڈ ہیلتھ آرگنائزیشن نے بوہت سراہیا اے تے بوہت سارے ملکاں نے ایہناں دی تقلید شروع کر دتی اے ہن جد کہ کرونا دی دوجی لہر دے وار جاری نیں۔تاں عوام نوں احتیاط دی لوڑ اے تاں جے اسیں پہلی وار وانگوں ایس وار وی کرونا نوں شکست دین وچ کامیابی حاصل کر سکیے۔ صوبائی وزیر بہبود آبادی کرنل (ر) ہاشم ڈوگر نے عوام نال اپیل کیتی کہ اوہ باشعور ہون دا عملی ثبوت دین تے اپوزیشن دی حکومت تے فوج مخالف کسے مہم دا حصہ نہ بنن ایہناں دے جلسیاں دا بائی کاٹ کرن ایہہ سب مفاد پرست نیں جیہڑے اپنی لٹی ہوئی دولت بچانا چاہندے نیں ایس مقصد لئی اوہ عوام نوں استعمال کر رہے نیں تاریخ گواہ اے کہ نواز شریف تے زرداری اک دوجے نوں سکیورٹی رسک تے چور کہندے سن اج مفادات دی خاطر شیر و شکر ہوئے نیں ایہہ عوام دا نہیں اپنی اولاداں دا مستقبل سنوارنا چاہندے نیں۔ دھاندلی دا نعرہ لان والیاں نوں اسیں گلگت بلتستان وچ وی عوام دی مدد نال شکست نال دو چار کراں گے۔ عوام نوں چاہیدا اے کہ اوہ ملک نوں ترقی دی راہ اُتے گامزن کرن دی خاطر وزیراعظم عمران خان دا ساتھ دین تاں جے پاکستان قائداعظم تے علامہ اقبال دے خاباں دی تعبیر بن سکے۔

بہبو د آبا دی کیلئے اقدامات کو صدرمملکت نے سرا ہا ہے،علما ء کی مدد سے آبا دی کنٹرول کرنے کی کوشش کر رہے ہیں
۔۔۔۔۔۔۔۔۔۔۔۔۔۔
کرو نا کی دو سری لہر کا وا ر جا ری ہے عوام حکومتی ہدایات پر عمل کر یں
علی عمران چٹھہ
ڈیک
ہماری کوششوں سے بچوں کے ادب پر کئی ایوارڈزجاری ہوئے: محمد شعیب مرزا

نو از شریف دا بیا نیہ بھارت نواز،شہباز شریف وی متفق نہیں: کرنل (ر)ہاشم ڈوگر
پی پی پی تے ن لیگ دے دور وچ ملک نوںبے رحمی نال لُٹیا گیا تے عو ام نوں آئی ایم ایف دے رحم و کرم اُتے چھڈیا

اپنا تبصرہ گھلو