مچھ سانحہ اِداریاں دا امتحان

Hameed Ullah Bhatti

تحریر حمیداللہ بھٹی

مچھ سانحہ نال پورے ملک وچ غم و اندوہ دی کیفیت اے کوئٹہ توں جنوب دی سمت مچھ دے مقام اُتے ہون والی انسان کشی نال سارے سوگوار نیں، بظاہر اتھرو رواں نہیں دل خون دے اتھرو رو رہے نیں ایہہ 11 کان کناں دی ای نہیں انسانیت دی موت اے پورے دن دی محنت و مشقت توں تھکے ماندے سُتے مزدوراں نوں جگا کے سفاکانہ طریقے نال ذبح کرن دی ذمہ داری داعش نے قبول کر لئی اے ایس ظلم و بربریت دی جنہی وی مذمت کیتی جائے گھٹ اے ایہہ سانحہ ثابت کردا اے کہ دہشت گرداں دا ہجے مکمل خاتمہ نہیں ہویا باقیات دوبارہ منظم ہو کے سرگرم ہو چکیاں نیں جنہاں دا خاتمہ اداریاں دی استعداد دا امتحان اے۔
3جنوری نوں پیش آن والے مچھ سانحہ نال ایف سی تے لیویز دے ذمہ داران نوں صبح آگاہی ملی تے چار جنوری توں ہزارہ کمیونٹی لاشاں سڑکاں اُتے رکھ کے دھرنا دتے انصاف دی طلبگار اے صوبائی حکومت دی بے حسی نال معاملات مزید وگڑے سانحے دے ویلے وزیراعلیٰ جام کمال جے نجی دورے اُتے دبئی وچ دعوتاں اُڑا رہے سن تے وزیر داخلہ میر ضیا اللہ لانگو آرام کرن اسلام آباد سن کوئٹہ وچ موجود کسے وزیر یا مشیر نے متاثرہ خانداناں نال ملنا تیکر گوارہ نہیں کیتا جس نال مظاہرین سیخ پا ہوئے تے صوبائی حکومت دے وفد توں مستعفی ہون دا مطالبہ کیتا۔ دھرنے دے شرکا نے وفاقی نمائندیاں وزیر داخلہ شیخ رشید تے ڈپٹی اسپیکر قومی اسمبلی قاسم سوری ولوں قاتلاں دی گرفتاری دی یقین دہانی، 10 لکھ فی کس ادائیگی تے متاثرین نوں نال لے جا کے وزیراعظم نال ملاقات دی پیش کش وی مسترد کر دتی۔ سانحہ دا تقاضہ تے ایہہ سی کہ عمران خان مصروفیات چھڈ کے کوئٹہ جاندے تے غم و اندوہ وچ ڈبے مقتولین دے ورثہ نوں دلاسہ دیندے پر اوہناں نے دو غیر سنجیدہ بندیاں نوں گھل کے لاپرواہی دی انتہا کر دتی بعد وچ وزیراعظم نے اپنا طیارہ دے کے وفاقی وزیر علی زیدی تے زلفی بخاری نوں کوئٹہ گھلیا پر دھرنے دے شرکا نے وزیراعظم یا آرمی چیف دے آن تیکر لاشاں دفن کرن توں انکار کر دتا لگے کاری زخماں اُتے مرہم دی بجائے حکومتی بے حسی اصل وچ اشتعال دا باعث اے۔
بلاول تے مریم جہے اپوزیشن رہنمائواں نے دھرنے وچ آ کے سوگوار خانداناں نال تعزیت کیتی پر عمران خان کدوں کوئٹہ آن گے کجھ واضح نہیں ابہام اے وزیراعظم دے نہ آن دا نقصان ایہہ ہویا کہ غم نال چور دھرنے دے شرکا نوں اداریاں دے خلاف بڑھکان دی کوشش کیتی جا رہی اے تے مطالبات وچ کجھ غیر متعلقہ نکات شامل کرا دتے گئے نیں نیز مچھ سانحہ توں فرقہ وارانہ کشیدگی پیدا کرن دا خطرہ پیدا ہون دا خدشہ اے۔ نیوزی لینڈ وچ ہون والی دہشت گردی دے بعد مقتولین دی دلجوئی کرن خاتون وزیراعظم مسلماناں دے کول جا سکدی اے تے ساڈے دلیر وزیراعظم ہمدردی و یگانگت دے دو بول بولن نال جانے کیوں قاصر نیں؟ جنہی تاخیر ہوئے گی ملک وچ اتحاد و یگانگت دی فضا نوں نقصان ہوئے گا۔
مچھ سانحہ دی جنہی وی مزمت کیتی جائے گھٹ اے ایہہ انج دی وحشت و درندگی اے جس دا ذمہ دار انسان اکھوان دا حقدار نہیں مزید ظلم ایہہ کہ اپنے ای اداریاں اُتے انگلیاں چکیاں جا رہیاں نیں یاد رکھو ملک وچ داعش جہے شدت پسند گروہ جے متحرک نیں تے ایہناں دی پشتبان بدنام زمانہ خفیہ ایجنسیاں را، این ڈی ایس نیں مقصد پاکستان نوں غیر مستحکم کرنا اے، پاک فوج دی بے پناہ قربانیاں نال ملک وچ انتہا پسند عناصر دی کمر ٹٹ چکی اے ایس لئی ہن اوہ ساہمنے دی بجائے لُک کے وار کرن لگی اے جنہاں توں محتاط رہن دی لوڑ اے پاکستان کسے اک فرقے یا مذہب دا ملک نہیں ایتھے ہر وسن والا برابر تے لائق تکریم اے۔ ساڈا آئین سب دی جان و مال دا تحفظ دیندا اے ایس لئی شر پسند عناصر دے مذموم ارادیاں نوں ناکام بنان لئی اپنے اداریاں دا ساتھ دین۔
بلوچستان نوں لنگھے پندرہ ویہہ ورہے توں وقفے وقفے نال دہشت گردی دا ساہمنا اے جس وچ بلاشبہ بھارتی ہتھ اے۔ حکومت توں لے کے جنرل تیکر فخر یہ اعتراف کردے نیں افغان ایجنسیاں سہولت کار نیں ایس لئی بلوچستان وچ ہون والی دہشت گردی دا مجرم جے بھارت اے تے افغانستان وی کسے طور بری الزمہ نہیں باصلاحیت دفاعی اداریاں نوں چاہیدا اے کہ سارے وسائل بروئے کار لیان تے ملک و عوام دشمن عناصر دا خاتمہ کریئے وردی نوں دہشت گردی دا باعث سمجھن والے اغیار دے کارندھے نیں جنہاں نوں فوری کچلیا جائے ایہہ سنپولیے جے زہریلے ناگ بن گئے تے ملک دے پرامن شہریاں دی جان و مال نوں لاحق خطرات وچ وادھا ہو جائے گا۔
کوئٹہ وچ لاشاں رکھ کے دھرنا دین دا ایہہ پہلا واقعہ نہیں بلوچستان وچ ہزارہ کمیونٹی دے علاوہ پختوناں، پنجابیاں تے سندھیاں نوں قتل کرن دا سلسلہ کئی ورھے توں جاری اے پر فرقہ وارانہ رنگ دینا غلط اے زمینی رستیاں توں یورپ جان والیاں نوں بلاتفریق قتل کیتا گیا بی ایل اے جہی تنظیم نے 2012 وچ ست پختون کان کناں نوں اغوا کرن دے بعد قتل کیت تے بلوچستان ہائی کورٹ دے باہر لاشاں رکھ کے دھرنا دتا گیا۔ 2013ء وچ علمدار شاہراہ اُتے ہون والے اک خود کش دھماکے وچ ہلاک ہون والے 86 بندیاں دیاں لاشاں دے نال وی دھرنا دتا گیا ایسے پاداش وچ نواب اسلم رئیسانی نوں وزارت اعلیٰ توں ہٹا کے دو مہینے لئی گورنر راج لایا گیا پر گورنر راج دے دوران اک ہور خود کش حملے وچ 100 بندے مار دتے گئے۔ 2017ء وچ کوئٹہ توں ای اغوا ہون والے دو چینی باشندیاں نوں بازیاب کران لئی سکیورٹی اداریاں نے وڈے پیمانے اُتے اپریشن شروع کیتا تے مستونگ دے پہاڑی سلسلے وچ داعش جہی شدت پسند تنظیم دے مرکز دا پتہ چلیا ہجے حال ای وچ یو این دی اک رپورٹ وچ وی ایس تنظیم دے بھارت وچ کیمپاں دی نشاندہی کیتی گئی اے۔2018ء دی انتخابی مہم دے دوران نواب سراج رئیسانی نوں خود کش حملے وچ مار دتا گیا جس نال صاف ظاہر اے کہ امن پسند تے محب الوطناں نوں نشانہ بنایا جاندا اے لوڑ ایس امر دی اے کہ بلوچستان دے امن نوں یقینی بنان لئی وطن دشمن عناصر دے خلاف اپنے اداریاں دا ساتھ دتا جائے۔
ساڈے اداریاں دی استعداد کسے توں لُکی نہیں محدود وسائل دے باوجود اوہناں نے محیر المعقول نتائج دتے نیں پر کجھ نا سمجھ لوک مچھ سانحہ دا سکیورٹی اداریاں نوں ذمہ دار ٹھہرا رہے نیں حالاں کے مچھ سانحہ توں پہلاں دہشت گرداں نے ہرنائی دے علاقے شاہرگ دی ایف سی چیک پوسٹ اُتے حملے دے دوران ست اہلکار نوں لہو وچ نہلاندے ہوئے کسے نے کسے توں مسلک دریافت نہیں کیتا ایہہ سکیورٹی اہلکار وی کسے دے پتر تے بھرا سن کسے سہاگن دے سردا تاج تے کسے ماں دے کلیجے دی ٹھنڈک سن مچھ جہے روح فرسا سانحے دی شدت لفظاں وچ بیان نہیں کیتی جا سکدی پر سکیورٹی اداریاں اُتے تنقید بوہت ای غلط راہ اے انج کرنا موقعے دی تاک وچ بیٹھے دشمن دے کارندیاں نوں ناپاک عزائم دی تکمیل لئی ہتھ بٹان دے برابر اے کیوں جے دشمن اپنے اداریاں توں بدظن کرنا چاہندا اے ایس لئی فرقہ واریت دا رنگ دے کے مسائل ودھان تے ملک دی جڑاں کھوکھلیاں کرن دی بجائے اپنے اداریاں اُتے اعتماد کیتا جائے تاں جے اوہ زیادہ یکسوئی تے اعتماد نال دشمن نوں کارندیاں سنے نیست و نابود کر سکیے۔

اپنا تبصرہ گھلو