رہے ناں اللہ دا

پنڈی جان والیاں نوں میرا مشورہ اے کہ اوہ ایدھر اودھر گھم کے اپنا رانجھا راضی کر لین کیوں جے مڑ کے کردے پھرو ٹکور تے فائدہ کیہ۔ بادشاہو ایہ ملک ہے تے اسیں ہاں‘ تہاڈا کیہ ایتھے نہ تہاڈے کاروبار‘ نہ جائیداداں‘ نہ مستقبل۔ بے شک پاکستان حکمرانی لئی ودھیا تھاں اے پر تہاڈا ایتھے عام انساناں دے نال رہنا اوکھا نہیں ناممکن اے۔ کدی گانا سنیا سی ’’یہ ایلو ایلو کیا ہے‘‘ سانوں اج تک نہیں پتہ چل سکیا ’’یہ ایلو ایلو کیا ہے‘‘۔ مینوں تے ایہ وی نہیں سمجھ کہ گرینڈ ڈائیلاگ کیہ اے تے ڈائیلاگ کنہے کہدے نال کرنا اے تے کس ایجنڈے تے کرنا اے۔ وزیراعظم عمران خان کہندے نیں کہ جو این آر او دیوے گا اوہ ملک نال غداری کرے گا‘ تسیں کہندے او اسیں عمران خان نال ڈائیلاگ نہیں کرنے‘ تے بھیا جدوں سب کجھ تساں کرنا اے تے ایہ جمہوریت دا مذاق کیوں؟ چلو دسو کس گل تے گرینڈ ڈائیلاگ ہون۔ کیہ ملک وچ کوئی آئینی بحران اے؟ کیہ اسمبلیاں وچ کوئی ڈیڈلاک اے؟ کیہ ڈائیلاگ ایہ ہوندے نیں کہ ساڈے تے نیب کیس بند کرو‘ رہائیاں دیو‘ تے فیر ایہ وی کرو کہ عدالتاں بند کر دیو‘ آئین نوں ککڑیاں دے پنجرے وچ بند کر دیو شاید اوہ اوتھے کوئی بہتر انڈا‘ چوچا دے دیوے۔
کپتان نال ضد نہ کرو اوہ تے آپ بڑا ضدی اے ون ففٹی دی سپیڈ نال بولنگ کر رہیا اے۔ لکھ لوو اوہ این آر او نہیں دیوے گا۔ این آر او دین دا مطلب پی ٹی آئی دے نظریات دا بولورام اے ایس لئی سوچنا وی نہ کہ کپتان ٹاس جت کے پہلے تہانوں کھیڈن دا موقع دیوے گا۔ اوہنوں کھوہ وچ چھال مارن دا کوئی شوق نہیں۔ ویسے شوق دا کوئی مل نہیں ہوندا پر ایس شوق دا مُل پے جاوے گا۔ میرے عظیم قائد انقلاب (شرطیہ نویں پرنٹ نال) اج کل اک ٹکٹ وچ دو مزے دے رہے نیں بلاول تے مریم نوں سجے کھبے بٹھا کے روز گا رہے نیں۔ ’’اک میرا چاند اک میرا تارا‘ امی کی لاڈلی ابو کا پیارا‘‘۔ اوہ ہن اپنے دوستاں دا ناں نہیں لیندے بس قبیلے نوں جھولیاں چک چک کے بددعاواں دیندے نیں۔ روز جھوٹی موٹی دا ککھ پا کے پنڈی ول منہ کرکے پکاردے نیں ’’ساڈے ول تکنا سجنا‘‘ میری اوہناں اگے درخواست اے کہ پنڈی پنڈی کہنا چھڈ دیو‘ پنڈی بوائے ایویں میدان وچ نہیں آیا تے بھائی جان پنڈی دا راہ بڑا اوکھا اے۔ بلاول پہلاں ای بائے بائے کہہ چکے نیں۔ مریم بی بی وی اینی سردی وچ پنڈی نہیں جاوے گی۔ ایہ نہ ہووے پی ڈی ایم آخر وچ کہوے بندہ ہن مذاق وی نہیں کر سکدا۔ استعفیاں والا مذاق تے ہو گیا ہن پنڈی والا وی بلاک بسٹر فلاپ شو نہ ہو جاوے۔ اسیں تے ایسے لئی کہنے آں بھیا بچ موڑ توں کدھرے آخر وچ تہانوں پی ڈی ایم توں ای استعفیٰ نہ دینا پے جاوے۔
سنتا سنگھ پریشان بیٹھا سی‘ بنتا سنگھ نے پچھیا تے بولیا یار گرل فرینڈ نے میسج گھلیا I love you میں جواب وچ same to you لکھیا پر سردی دی وجہ نال کپکپاندی انگلیاں نے shame to you لکھ دتا ہن کیہ کراں‘ میسج سینڈ ہو گیا اے۔ پی ڈی ایم دے کول وقت ہے اپنے سپیلنگ چیک کر لوے۔ اجے مولانا نے پنڈی دا میسج ٹائپ کیتا اے سینڈ نہیں کیتا۔ میرا یقین اے مریم بی بی انقلاب انقلاب کھیڈے گی تے اندرو اندری بلاول نوں سیم ٹو یو دا میسج وی ٹائپ کرے گی۔ کپتان تک خیر ایہ میسج اپڑیا نہیں اوہنے اپوزیشن دا نمبر بلاک کیتا ہویا اے۔ میرا مشورہ اے کہ حکومت تے اپوزیشن چھو کٹی ختم کر دیوے پر این آر او یاں گرینڈ ڈائیلاگ دی شکل وچ نہیں جے ایس ملک وچ آئین تے قنون دی حکمرانی اے تے فیر عدالتاں نوں گرینڈ ڈائیلاگ دے ایجنڈے دا ضرور جائزہ لینا چاہیدا اے۔
این آر او بھاویں کوئی وی دیوے عدالتاں ایہدا نوٹس لین یاں فیر سانوں انصاف دے چھابے بند کر دینے چاہیدے نیں تے اعلان کر دینا چاہیدا اے کہ جہڑا وی حکومت نوں ٹف ٹائم دیوے اوہدے اگلے پچھلے گناہ معاف۔ میری دعا اے کہ جوڈیشری اک واری کوکلا پکڑے تے پکارے جہڑا اگے پچھے تکے اوہدی شامت آئی جے۔ بنتا سنگھ اپنی کولیک نوں بولیا تیری شکل میری تریجی بیوی نال ملدی اے‘ کڑی بولی تہاڈیاں کنیاں بیویاں نیں؟ بنتا سنگھ بولیا دو‘ اسیں وی ماضی وچ دو این آر والی بیویاں رکھنے آں‘ بس ہن تریجی سوکن دی لوڑ نہیں نہیں تے ایس مملکت دا ناں ای این آر او سٹیٹ رکھ دیو۔ رہے ناں اللہ دا۔(بشکریہ روزنامہ پاکستان)