مسلیاں دا شکار اوور سیز پاکستانی

تحریک انصاف دی حکومت دے دور وچ پاکستان میڈیکل کونسل (پی ایم سی) نے اوورسیز
پاکستانیاں دے بالاںنوں میڈیکل سائنس دی تعلیم توں محروم کر کے رکھ دتا اے

تحریر: اکرم عامر سرگودھا

اوور سیز پاکستانی ملکی معیشت نوں سہارا دین لئی ریڑھ دی ہڈی دی حیثیت رکھدے نیں ایس ویلے لکھاں دی تعداد وچ پاکستانی ایشیائی تے یورپی ملکاں وچ کم کر رہے نیں، ایہناں وچ اکثریت غریب تے سفید پوش طبقہ دی اے۔ جیہڑے اپنے ماں پیو ، بھین بھراواں، عزیز و اقارب، بیوی بچیاں نوں چھڈ کے دیار غیر وچ محنت و مشقت کر کے کثیر زرمبادلہ اپنے ملک وچ گھل رہے نیں۔ بیرون ملکاں وچ 5 فیصد درمیانہ طبقہ اے جیہڑا اپنے کاروبار دی وجہ نال ایس پوزیشن وچ نیں کہ اوہ اپنے بچیاں نوں اعلیٰ تعلیم دلوا پان، کیوں جے امرء تے درمیانے طبقے دے کول وسائل ہوندے نیں تے اوہ اپنے بالاں دی اعلیٰ تعلیم دے نال ہر آسائش پوری کرن دی سکت رکھدے نیں، اوہ انج کردے وی نیں، ایہناں دے بچے وڈے کالجاں تے یونیورسٹیاں توں پڑھ کے اکثریت چمک دے ذریعے اعلیٰ عہدیاں تیکر اپڑ جاندے نیں تے بیورو کریسی دی صورت وچ ملک اُتے راج کردے نیں، ملک وچ ایہو طبقہ نسل در نسل سیاست اُتے چھایا ہویا اے، آن والی حکومت وچ ایہناں طبقیاں دا اہم رول ہوندا اے تے ایہناں ای وچ سینیٹر، ارکان قومی و صوبائی اسمبلی بن کے وفاقی و صوبائی وزراء حتیٰ کہ وزارت اعلیٰ و وزارت عظمیٰ تیکر اپڑدے نیں ملکی سیاسی تاریخ ایس گل دی گواہ اے کہ اج تیکر کسے غریب دا بچہ ایہناں عہدیاں تیکر نہیں اپڑیا تے جے کسے غریب نے سیاست وچ ایہناں طبقات دا ساہمنا کرن لئی پیر رکھیا تے سرمایہ دار وڈیرے جاگیردار جیہڑے سیاست نوں گھر دی لونڈی سمجھدے نیں نے غریب نوں انتقام دی صورت وچ انج دا سبق سکھایا کہ اوہ پوری زندگی سنبھل نہیں سکیا تے اوہ اپنی آن والی نسلاں نوں سیاست وچ پیر نہ رکھن دی نصیحت کردے ہوئے جہان فانی توں چلے جاندے نیں۔ ایس طرح ساڈے ملک وچ سیاست صرف کجھ خانداناں دی میراث ہو کے رہ گئی اے ایہو وجہ اے کہ ایس ملک دا نظام نہیں بدلیا جا سکیا، ایس طرح ہر دور وچ صرف اقتدار اُتے چہرے بدلدے نیں، نظام نہیں۔ پر ایہناں دا تعلق ایہناں ای خانداناں تے گھرانیاں نال ہوندا اے جیہڑا اک عرصے توں ملکی سیاست اُتے مسلط نیں، ایسے طرح تن فیصد امراء نے اپنا سرمایہ بیرون ملک منتقل کر کے ملک دی جڑاں نوں نہ صرف کھوکھلا کر دتا اے بلکہ امراء دے ایس عمل نال اقتدار وچ آن والا ہر حکمران بیرونی ملکاں تے مالیاتی اداریاں توں قرضہ حاصل کر کے ملک چلان اُتے مجبور نیں۔ایسے طرح ایہہ کہنا بے جا نہیں ہوئے گا کہ پاکستان توں سرمایہ کما کے بیرون ملک اثاثے بنان تے کاروبار چلان والے سرمایہ داراں دی وجہ نال پاکستان دوجے خود کفیل ملکاں تے بین الاقوامی مالیاتی اداریاں دے کول گروی رکھیا ہویا اے تے ایسے بنا اُتے ملک دا ہر بچہ، بڈھا جوان سب ای تے مقروض نیں جد کہ 5 فیصد درمیانہ سرمایہ دار بیرونی ملکاں وچ رہ کے اپنا کاروبار کر کے اپنی آمدن دا کجھ حصہ پاکستا منتقل کر کے ایتھے اپنے اثاثے بنان دے نال اپنے کنبے دے بندیاں نوں مستحکم کرن وچ لگیا ہویا اے۔ امرا اپنے ملک وچ ہون یا بیرونی ملکاں وچ اوہ اپنے بالاں دی اکثریت نوں اندرونی و بیرونی ملکاں دے کالجاں تے یونیورسٹیاں وچ اعلیٰ تعلیم دلواندے نیں۔
سو گل کتھوں کتھے اپڑ گئی گل ہو رہی سی ایہناں اوورسیز پاکستانیاں دی جیہڑے اپنے پیاریاں توں دور سمندر پار جا کے محنت مزدوری کر کے ایس دی مد وچ کمائی گئی کل رقم زرمبادلہ دی صورت وچ اپنے ملک وچ گھلدے نیں۔ ایہہ 92 فیصد محب وطن لوک نیں جنہاں نوں وطن دی مٹی نال پیار اے تے اوہ امرا دے برعکس دوجے ملکاں توں کمایا اپنا سرمایہ ملک وچ گھل کے معیشت نوں مستحکم کر کے ایہنوں دیوالیہ ہون توں بچائے ہوئے نیں۔ ایہناں اوورسیز پاکستانیاں دی وی خواہش ہوندی اے کہ ایہناں دے بچے وی پاکستان وچ ای تعلیم حاصل کر کے ڈاکٹرز، انجینئرز، بیوروکریٹس تے دیگر عہدیاں تیکر اپڑن، کیوں جے ایہہ تے پہلے ای محنت مزدوری لئی دیار غیر گئے ہوندے نیں تے ایہہ اپنے بچیاں نوں امراء وانگوں ملکی یا غیر ملک یونیورسٹیاں، کالجاں تے دیگر تعلیمی اداریاں وچ پرائیویٹ سطح اُتے اعلیٰ تعلیم نہیں دلوا سکدے۔ ایسے طرح اوورسیز پاکستانیاں دے بالاں دی اکثریت اعلیٰ تعلیم جہی نعمت توں محروم رہ جاندی اے۔
دوجے پاسے ستم ظریفی دی گل ایہہ وے کہ تبدیلی دے ناں اُتے برسر اقتدار آن والی تحریک انصاف دی حکومت دے دور وچ پاکستان میڈیکل کونسل (پی ایم سی) نے اوورسیز پاکستانیاں دے بچیاں نوں میڈیکل سائنس دی تعلیم توں محروم کر کے رکھ دتا اے تے ہن اوورسیز کوٹہ اُتے اوہ ای بچے داخلے دے اہل ہون گے جیہڑے ایف ایس سی /اے لیول بیرون ملکاں توں کرن گے، جد کہ ایس توں پہلاں ہر پاکستانی مزدور جیہڑا اوورسیز کارڈ ہولڈر تے اپنے بالاں نوں بیرون ملک اپنے کول رکھن دی سکت نہیں رکھدا سی اوہ ایس سہولت توں فائدہ چک سکدا سی، اوہ سہولت وی اونٹ دے منہ وچ زیرہ دے برابر سی کیوں جے حکومت نے پورے پنجاب دے میڈیکل کالجاں وچ لکھاں سمندر پار پاکستانی محنت کشاں دے بالاں لئی صرف 72 سیٹاں مختص کر رکھیاں سن، جنہاں اُتے اوورسیز کارڈ رکھن والیاں دے بچے میرٹ اُتے اپلائی کر سکدے سن جد کہ ہن پاکستان میڈیکل کونسل نے ایہہ سہولت دیار غیر وچ وسن والیاں دے بچیاں توں کھوہ لئی اے جس دی وجہ نال 92 فیصد سمندر پار پاکستانی محنت کش جیہڑے اپنے بالاں دے مستقبل دی فکر رکھدے نیں وچ تشویش پائی جا رہی اے۔
کپتان جی تسیں تے اقتدار توں پہلے تے وزارت عظمیٰ دا منصب سنبھالن توں بعد کہیا سی کہ اوورسیز پاکستانی ملکی معیشت نوں سہارا دین وچ ریڑھ دی ہڈی دا کردار ادا کر رہے نیں ایہناں دے مسائل ترجیح بنیاداں اُتے حل کرائے جان گے تسیں ایہناں توں سرمایہ وطن بھیجن دا کہیا تے دیار غیر توں صرف ایہناں ای محنت کشاں نے تہاڈی اواز اُتے لبیک کہیا کینسر ہسپتال ہوئے یا ملک وچ ڈیم بنان لئی فنڈز دی لوڑ، زلزلہ زدگان ہون یا سیلاب متاثرین ہر کڑے ویلے وچ ایہو طبقہ تے ہے جیہڑا آپ محنت کش ہون دے باوجود اپنے وطن نال محبت دا ثبوت دیندے ہوئے ودھ چڑھ کے عطیات دیندے نیں۔ اکثر سرمایہ داراں نے تے آپ دے دور وچ احتساب دے ڈر توں اپنا بچیا کھچیا سرمایہ وی دوجے ملکاں وچ منتقل کر کے ملک نوں دوراہے اُتے کھڑا کیتا اے تے کپتان جی ایہناں حالات وچ اوورسیز پاکستانیاں دے بچیاں نوں اعلیٰ تعلیم خاص طور تے میڈیکل دی تعلیم دی سہولت دینا ایہناں اُتے احسان نہیں ایہہ ایہناں دا حق اے تے تسیں اوورسیز پاکستانیاں نال اپنا وعدہ وفا کرو تے ایہناں دے بالاں توں میڈیکل کونسل ولوں کھوئی گئی سہولت نہ صرف ایہناں نوں واپس کرائو بلکہ پنجاب، سندھ، بلوچستان، کے پی کے، گلگت بلتستان، بشمول آزاد کشمیر دے میڈیکل کالجاں وچ اوورسیز پاکستانیاں دے بالاں لئی سیٹاں وچ وادھا کرو۔
کپتان جی تہانوں ایہہ وی چاہیدا اے کہ اوورسیز پاکستانیاں دے بالاں لئی انجینئر یونیورسٹیاں، زرعی کالجز، زرعی یونیورسٹیاں، ٹیکنیکل کالجز، یونیورسٹیاں سنے ایس طرح دے اعلیٰ تعلیمی اداریاں وچ کوٹہ مختص کرو تاں جے اوورسیز پاکستانیاں وچ پائی جان والی تشویش دی لہر ختم ہو سکے، ایہناں دے بال وی مستقبل وچ ڈاکٹر، انجینئر تے دیگر اداریاں توں پڑھ کے ڈگریاں لے کے اپنے والدین دے خواباں دی تعبیر پوری کر سکن۔
کپتان جی اودوں بنے گا نواں پاکستان تے فیر دیار غیر وچ وسن والے لکھاں پاکستانی سینہ تان کے دوجے ملکاں دی عوام نوں مثال دے کے کہہ سکن گے کہ ایہناں دے ملک وچ وی تسیں (جتھے اوہ مزدوری کر رہے نیں) وانگوں ایہناں دے بالاں نوں اعلیٰ تعلیم دی سہولت حاصل اے، ایس نال ملک دی نیک نامی وچ وادھا ہوئے گا تے دوجے ملکاں وچ ساڈے ملک بارے تعلیم دے فقدان دا جیہڑا تاثر پایا جاندا اے اوہ ختم ہوئے گا۔

اپنا تبصرہ گھلو