ّّّمر جائے گی مخلوق تو انصاف کرو گے

عوام کنٹینر والا عمران خان چاہندے نیں جس دے دل وچ غریباں دی محبت کُٹ کُٹ کے بھری سی جیہڑی شاید ہن فوت ہو چکی اے

لكهت:سید صفدر رضا

الحمدللہ ساڈا وطن پاکستان اینا مضبوط اے کہ ایس نوں مارشل لاء تے سیاست داناں نے مل کے کمزور ترین ریاست وچ تبدیل کرن دی کئی وار کوشش کیتی گئی پر شہداء وطن دی روحواں ہمیشہ آڑے آندی رہیاں ساڈی معصوم تے بھولی عوام ہمیشہ قربانیاں دیندی آئیاں نیں پر وطن عزیز نوں انچ نہیں آن دینی ، دور کیوں جائیے موجودہ دور وچ پی ٹی آئی دی حکومت نال امیداں لائیاں سن پر غریباں دے خواب چکنا چور ہو گئے۔ جدوں میرے کپتان نے کنٹیر اُتے مہنگی بجلی دے ناں اُتے بل ساڑے سن تے سول نافرمانی دی تحریک دا اعلان کیتا سی حکومت ملدے ای عوام دا دل ساڑ دتا 22 کروڑ عوام دا جینا محال کر دتا جانے کدوں تیکر پچھلی حکومتاں اُتے الزام تراشی چلے گی تے کدوں غریب عوام دے دکھاں دا مداوا ہوئے گا ہر شے ڈھائی سالہ حکومت وچ دو گنا قیمتاں توں تجاوز کر گئی اے۔ چولہے ٹھنڈے ہو چکے نیں پر مافیا جیہڑا کہ حکومتخود اے قابو توں باہر نیں جس شے نوں مہنگا کرنا ہوئے ایس دا نوٹس لے لیا جاندا اے۔ سونے اُتے سہاگہ آپ فرماندے نیں 22 کروڑ دا ملک چلانا مشکل کم اے مسئلے دا سمندر اے۔ ایہہ انکشاف آپ اُتے حکومت وچ آن دے بعد کیوں ہویا آپ تے فرماندے نیں 22 سالہ جدوجہد اے تسیں تے تیاری دے نال آئے سی تہانوں کافی ادراک سی فیر غریب عوام نوں خودکشی اُتے کیہ شے مجبور کر رہی اے کدھرے ماں بچیاں دے منال مہنگائی توں اکتا کے نہر وچ چھال مار کے اپنی زندگی دا خاتمہ کر رہی اے کدھرے بالاں نوں روٹی نہ دے سکن اُتے پیو خودکشی کر رہیا اے تسیں پٹرول دی قیمت ودھن اُتے حکومت نوں آڑے ہتھ لیندے سی ہن مسلسل ودھدی قیمت دا ذمہ دار کون اے، تسیں حکومت توں استعفیٰ طلب کردے سی اج ایہہ غیر آئینی کیوں اے اج ملک نوں IMF دے کول گروی رکھ دتا اے تسیں تے آئی ایم ایف دے کول جان دی بجائے خودکشی نوں ترجیح دیندے سی۔ تسیں کشکول توڑن دی بجائے کاسہ لیسی فرما رہے او غریب عوام دیاں تنخواہواں نہ ودھا کے مہنگائی دی چکی وچ پیس دتا اے اپ کنٹینر توں یکسر مختلف عمران خان نیں اوہ دعوے کتھے دفن ہو گئے آٹا بحران، چینی بحران، پیٹرول بحران نے تہاڈی گڈ گورننس دا بھانڈہ پھوڑ دتا اے۔ کدھرے حکومتی رٹ نظر نہیں آندی۔ تسیں جنہاں بندیاں نوں کسے عہدے اُتے فائز فرماندے او اوہ کجھ عرصہ لوٹ مار کر کے تہاڈے احسان دا بدلہ چکا کے رفوچکر ہو جاندا اے۔ قانون دی عملداری کدھرے ویکھن نوں نہیں ملدی جیہڑی مہنگائی پچھلے ستر سال وچ ہوئی اینی تسیں دو ورہے وچ کر دتی۔تسیں غربت ختم کرن دی بجائے غریب نوں ختم کر رہے او۔ ہن براڈ شیٹ وچ کجھ پردہ نشیناں دے ناں آ گئے نیں تہاڈے بندے کس ڈھٹائی نال کٹ منگ رہے نیں اوہ یقینا تہاڈی مرضی دے بغیر انج نہیں کر سکدے۔ بجلی دے ریٹاں وچ وادھا تہاڈی بیڈ گورننس دا ثبوت اے۔ ویلے تے LNG دے معاہدے ہوندے تے سستے ہوندے تہاڈی غلط پالیسی دی وجہ نال زیادہ قیمت ادا کرنی پئے گی۔ 122 ارب دا وادھو بوجھ غریب محب وطن عوام نوں برداشت کرنا پئے گا جیہڑا پہلے ای تہاڈی تختہ مشق بنی ہوئی اے تہاڈے مشیر غلط ویلے اُتے غلط فیصلے کردے نیں جنہاں دی قیمت مہنگائی دی صورت وچ غریب عوام نوں ادا کرنی پیندی اے۔ معصوم بالاں نال زیادتی ڈاکہ زنی چوری چکاری دی ودھدی وارداتاں تہاڈی گورنس دا منہ بولدا ثبوت نیں۔ مدینہ دی ریاست دا ناں تے لیندے او پر عملی طور اُتے تسیں ملک نوں بنانا ریپبلک بنا چکے نیں، کجھ غریب محب وطن دی تکلیفاں دا مداوا فرمائو، عوام کنٹینر والا عمران خان چاہندے نیں جس دے دل وچ غریباں دی محبت کُٹ کُٹ کے بھری سی جیہڑی شاید ہن فوت ہو چکی اے۔

اپنا تبصرہ گھلو