ہدایتکار پرویز رانا دی چوتھی برسی وی لنگ گئی

برسی دا انتظام اوہناں دے پتراں حیدر رانا تے علی رانا ولوں کیتا گیا

اس موقعہ تے قران خوانی، دعا تے لنگر وی تقسیم کیتا گیا
روز نامہ بھلیکھا دے شوبز ایڈیٹر اشفاق کاظمی دی خصوصی شرکت

رپورٹ: رضوان اصغر بٹ

دنیائے فلم دے عظیم ھدایتکار پرویز رانا دی چوتھی برسی ایور نیو اسٹوڈیو وچ ھوئی ۔ایس برسی دا انتظام پرویز رانا دے پتراں حیدر رانا تے علی رانا نے وسیع پیمانے تے کیتا سی۔

ایور نیو اسٹوڈیو دے سبزہ زار نوں کرسیاں نال بھریاں ھویا سی جد کے اک اسٹیج تیار کر کے لائوڈ سپیکر وی لایا ھویا سی جس دے اوپر پرویز رانا دی تصویر دی وڈی فلیکس لائی گئی سی جتھے علماء حضرات تے قاری حضرات نے تلاوت قران پاک تے مذہبی گلاں دی وعظ فرمائی،بعد وچ مرحوم دی بخشش لئی بڑی رقت امیز دعا وی کرائی گئی۔ دعا توں بعد لنگر دا وسیع بندوبست کیتا گیا سی جیڑا شرکا وچ تقسیم کیتا گیا۔ ایس موقعہ تے فلمی تے غیر فلمی لوکاں دا اک جم غفیر موجود سی جنھاں مرحوم دے پتراں نال دلی غم دا اظہار کیتا۔ پرویز رانا دی رھائش تے بحریہ ٹاون وچ اے مگر اس دے پتر فلمی لوکاں دی سفر دی سہولت لئی ھر سال برسی اسٹوڈیو وچ رکھدے نیں۔ پرویز رانا دا تعلق فیصل آباد نال سی اوہناں دے وڈے بھرا بشیر رانا مرحوم وی ھدایتکار سن جنھاں دے پرویز رانا ھوری شاگرد وی سن۔

رانا صاحب دے اک بھرا ڈاکٹر سیلم مرحوم فلم مصنف وی سن ۔رانا صاحب دے اے دونویں پتر خود وی اداکار نیں جنھاں نوں ہیرو لے کے رانا صاحب نے (شاہ مراد) نامی فلم بنائی سی۔ ویسے تے پرویز رانا دے کریڈٹ اُتے بہت ساریاں فلماں نے پر مشہور فلماں وچوں( ھمایوں گجر)( سوھا جوڈا)( گجر دا ویر) ( چراخ بالی)( گاڈ فادر) دے ناں شامل نیں۔پرویز رانا صاحب دی ماشا اللہ بہت زیادہ تعلق داری سی جس دی وجہ اوہناں دا حسن اخلاق سی۔ اس وجہ نال جنھاں لوکاں نے برسی وچ شرکت کیتی اوہناں دی لسٹ تے بہت لمی اے پر ایتھے چیدہ چیدہ لوکاں دے ناں دیتے جا رے نیں۔ فلمساز چوھدری اعجاز کامران ،ھدایتکار الطاف حسین ،سید نور ،حسن عسکری ،نسیم حیدر، فیصل بخاری ،جرار رضوی ،مصنف محمد کمال پاشا، اداکارہ میر،ا اداکار راشد محمود، فلمساز شیخ اکرم، ھدایتکار وحید اعوان، حسن زیبری ،مراد علی، ساجد علی ساجد ،کمرہ مین رضوان احمد، ایڈیٹر زیڈ اے زلفی، ھمایوں صفدر، پاکستان کرکٹ بورڈ دے مقصود خاں، مشہور شاعر بابا نجمی، پروڈکشن کنٹرولر مختار احمد، صحافی ساجد یزدانی، مغل رفیق ،ساجد آرائیں، نصیر احمد، علی زیدی، اداکار حیدر سلطان، نواز خاں ،بلال ، علی خاں تے اچھی خاں شامل نیں، جد کہ روزنامہ بھلیکھا دے شوبز ایڈیٹر اشفاق کاظمی نے خصوصی طور تے شرکت کیتی جیہڑے کہ فلم مصنف وھدایتکار وی نیں۔ پرویز رانا دی برسی دی خبر تمام پرنٹ تے الیکٹرانک میڈیا نے بہت اچھے طریقہ نال نشر کیتی۔

اپنا تبصرہ گھلو