یوٹیوب دِیاں لوڑاں تے تھوڑاں

فاطمہ جہان

سوشل میڈیا اج کل دے دور دا بڑا وڈا تے طاقتور پلیٹ فارم اے۔ ساری دنیا سوشل میڈیا دے نال چلدی پئی اے۔ کوئی وی ذی روح انج دا نہیں جیہڑا ایدے بارے وچ نہ جاندا ہووے۔ ایہہ سب سائنس دی کرامات نیں۔ ٹیلیفون، فیکس توں بعد کمپیوٹر آ گئے نیں تے ہُن سوشل میڈیا دے ذریعے ہر بندہ اپنے چینل بنا رہیا اے تے یوٹیوب اک ایسا پلیٹ فارم اے جیہڑا کسے وی بندے نوں منع نہیں کردی۔ ہر کوئی اپنی پوسٹ، آڈیو یا ویڈیو بنا کے یوٹیوب تے پا دیندا اے، اک دوڑ لگی ہوئی اے۔
بالخصوص اج دا نوجوان طبقہ سوشل میڈیا دا زیادہ استعمال کردا اے۔ ماضی وچ لوکاں کول اپنی رائے دا اظہار کرن لئی نہ کوئی بہت زیادہ پلیٹ فارم سن نہ ای مواقع سن۔ لیکن اج دے دور وچ ایہدا استعمال ود رہیا اے۔جیہڑیاں ویب سائٹس ایس ویلے بہترین سوشل میڈیا دی نیںاوہناں وچ بلوگرز، مائیکرو بلاگرز، لنکڈاِن، مائی سپیس ، گوگل، فیس بُک، ٹوئٹر وغیرہ شامل نیں۔
سوشل میڈیا نوں اچھے کم لئی وی استعمال کیتا جا سکدا اے۔ یو ٹیوب دا چینل سب توں زیادہ مقبول کم اے۔ہن کسے نوں اپنی کہانی یا کوئی وی گل دسنی ہووے اوہ یوٹیوب تے اپنی ویڈیو اپ لوڈ کر دیندا اے۔ یعنی کوئی پردہ نہیں رہ گیا۔ اصل حقائق جانے بغیر بہت ساریاں فلماں چلا دتیاں جاندیاں نیں۔یوٹیوب ہر ویڈیو چلا دیندا اے۔ کوئی اصول نہیں بنائے گئے۔ نہ کوئی پچھ پرتیت اے۔ یوٹیوب دا سٹوریج دے ڈیٹا بیس کمال نیں۔ایہناں دی کوئی ریس نہیں اے۔ ایہدے تے ہر بندے نوں اپنے حساب دا مواد مل جاندا اے۔ تعلیمی، مذہبی ، معاشرتی، تکنیکی ہر طرح دے بارے وچ پروگرام مل جاندے نیں۔
عورتاں نے سلائی، کڑھائی، ڈیزائننگ، کھانا پکانا ، گھر نوں سجانا یا کجھ وی کرنا ہووے۔ ایہدے توں مدد لیندیاں نیں۔ اید کاں تے بندیاں نے وی بڑے پکوان پکائے نیں کیونکہ Covid دی وجہ نال سب لوک گھراں وچ قید ہو گئے سن۔ مرداں نے وی کھانا پکانا کیتا۔
یوٹیوب وچ Contiributorدا میرٹ یا معیار وی کافی اوپن اے۔ صر ف ویوز دے حساب نال پیسے ملدے نیں۔ بہت سارے نوجواناں نے اینوں کمائی دا ذریعہ بنا لیا اے۔ اوہ صرف اپنیاں اپنیاں وڈیو بنا کے پاندے نیں تے خرچہ پانی چلاندے نیں۔ پیسہ کمان دی اندھی دوڑ وچ ساری دنیا ای شامل اے۔ تے جتھے کوالٹی نہ ویکھی جا وے صرف کوانٹٹی ہووے۔ اوتھے کھوتے گھوڑے اکوں میدان وچ آ جاندے نیں۔ کجھ ٹبر تے اپنی گھر دیاں تقریباں دی وی ویڈیو یوٹیوب تے چڑھا دیندے نیں۔
فیشن دی گل سن لوئو، عورتاں جدمختلف فیشن دیاں ویڈیو ویکھ دیاں نیںتے اگر اوہناں دی پسلی پورا کرن جوگ نہ ہووے تے گھر وچ لڑائیاں پیندیاں نیں تے کئی نوجوان کڑیاں منڈے خواہشاں پوریاں نہ ہون دی وجہ نال بُرے راہواں تے چل پیندے نیں۔ یوٹیوب دا چینل ہر واسطے کھلا اے اوہدے تے چنگی بُری ہر فلم ہُندی اے۔ ماں پیو ہر ویلے بچیاں دی راکھی نہیں کر سکدے۔ بچے ہر گندی تے فحش فلم ویکھدے نیں جدی وجہ نال معاشرے وچ زنا تے بدکاری پھیلدی پئی اے۔ بعض اوقات Thumb nail نوں جدوں کڈ کے ویکھی دا اے تے جو گل باہر لکھی ہُندی اے اوہ اندر ویڈیو وچ موجود ای نہیں ہوندی۔
یوٹیوب دے کول کوئی چیکنگ دا معیار یا شئے ای نہیں۔ اوہنے تے اپنا کاروبار چلانا اے۔ ہر ویڈیو چلدی پئی اے بھاویں چنگی اے تے بھاویں مندی اے۔ جھوٹی تے سچی دا کوئی پتہ ای نہیں۔ افواہاں پھیل جاندیاں نیں۔ بعض اوقات نجی محفلاں دیاں ویڈیو یار دوست چلا دیندے نیں حالانکہ اصل وچ جنہاں دی محفل ہوندی اے اوہ یوٹیوب تے چڑھانا نہیں چاہندے۔
کوئی ضابطہ اخلاق ای نہیں، غیر اخلاقی فلماں نیں، کُڑیاں منڈیا ں نوں تباہ کر دتا اے، ایہہ ترقی نہیں ایہہ تنزلی اے۔ معاشرتی وگاڑ دی اے مکروہ ترین مشکل اے۔ قدرت بُرائی نوں مسلط نہیں کردی۔ ساری گل انسان دی سوچ تے فکر تے مُک دی اے ہر شے دے منفی تے مثبت پہلو ہُندے نیں۔ ایہہ ہر بندے نے آپ سوچنا اے کہ اوہنے کیہڑی راہ تے چلنا اے۔ ایجادات تے ہُندیاں رہن گئیاں تے توہین آمیز مواد پھیلان دا ذریعہ وی یوٹیوب بنداپیا اے۔ وڈیاں وڈیاں لڑائیاں کراندا اے۔ نوجوان مشعل ہو جاندے نیں تے معاشرہ تباہ ہو جاندا اے۔
سوچن دی گل اے اوہ کیہڑے اصول بنائے جان جہدے نال ہر معاشرے دے حساب نال ویڈیوز اپ لوڈ کیتیاں جان۔ تے ہر معاشرے یا مُلک دے ہتھ وچ ایہہ کنٹرول ہووے کہ اپنے معاشرے وچ اوہ کیہ وکھانا چاہندے نیں۔ لوکاں تے وی پابندی ہوئے کہ کس کس طرح دی ویڈیو اوہ اپ لوڈ کر سکدے نیں تے کیہڑی نہیں ، پالیسیاں تے اصول بنائے جان تاکہ معاشرہ سدھار ول جاوے نہ کہ وگاڑ ول۔

اپنا تبصرہ گھلو