گندے نالے والے لہہ جائو

لكهت: ایثار رانا

چلو جی پیپلزپارٹی نوں گالھاں کڈھن دا ویلا آ گیا اے۔ بابا بوٹا یاں جتدا اے یاں گالھاں کڈھدا اے‘ اوہنوں ہار قبول نہیں تے انج وی بابا بوٹا دے سامنے پورا پاکستانی نظام کانا اے۔ اوہنوں پتہ اے کہ دل ول کیویں لیا جاندا اے تے اوہ ترکیب ورکیب سارے جان دا اے۔ این اے 249 وچ پی ٹی آئی دے نال جو ہویا میرا یقین اے کہ اوہدے توں پی ٹی آئی کوئی سبق نہیں سکھے گی۔ سبق سکھن لئی تہاڈے کول کوئی قاعدہ‘ کوئی کتاب دا ہونا ضروری اے۔ جد کہ پی ٹی آئی کسے قاعدہ‘ کتاب دے بناں انھے واہ چلی جا رہی اے۔ اوہ تے کپتان دی قسمت اینی زبردست اے کہ ہر داغ برائٹ رائٹ کر دیندا اے۔ کراچی الیکشن وچ عبرتناک شکست دے باوجود کپتان خوش اے پر میں کہہ دینا واں تسیں عمران خان نوں ایناں ایزی نہ لوو اوہ تے سادہ مان نہیں غصے وچ تے اوہنوں پھڑنا انج وی اوکھا ہو جاوے گا۔ ایہ وی دس دینا واں کہ اوہ ٹرک تے بیٹھا زرداری تے نوازشریف توں ودھ خطرناک ہووے گا ایس لئی مسافر اپنے سامان دی آپ حفاظت کرے۔ساڈا ذمہ توش پوش پی پی تے ن لیگ دی سیاسی سوچ تقریباً 1990ء دے بوڑھ تھلے آ کے کھلو چکی اے۔ بی بی دا پُتر تے میاں دی دھی بانہواں ٹنگ چکے نیں لفظاں دی گولا باری دے بعد بس ٹکرو ٹکری ہون والے نیں۔
سنتا سنگھ بیوی دی سجری سجری قبر تے بیٹھا پکھا جھل رہیا سی کسے نے پچھیا تے بولیا مرن والی کہہ گئی سی کہ دوجا ویاہ کرن لئی میری قبر دی مٹی سُک لین دیویں‘ ہن میں پکھے نال قبر خشک کر رہیا واں۔ ہائے ہائے مریم بی بی تے بلاول بابے نے تے پی ڈی ایم دی قبر دی مٹی وی خشک ہون دا انتظار نہیں کیتا۔ افسوس سگوں صد افسوس گدی نشین‘ اعلیٰ حضرت فضل الرحمن وی کجھ نہیں کر سکے۔ سنتا سنگھ سگرٹ پی رہیا سی کہ پنڈ دے پیر صاحب نے غصے نال کہیا تہاڈے روزے نہیں ہوندے‘ سنتا سنگھ ہتھ جوڑ کے بولیا مولا خوش رکھے روزے تے تہاڈے ہوندے نیں ساڈیاں تے بس قبراں ہوندیاں نیں۔ چلو غریب بندے دا کیہ اے اوہ جیوے یاں مرے‘ ایہ ملک‘ ایہ دھرتی‘ ایہ نظام سیاسی مزاراں دے گدی نشیناں تے مجاوراں دا اے۔ بقول جسٹس قاسم صاحب دے جے سی سی پی او تے آئی جی پنجاب دے پانی ہے تے عدالت وچ حاضر ہون۔ میں تے کہنا واں ملک دے سارے اداریاں دے پانی چیک کر لینے چاہیدے نیں۔ ایہ واٹر فنڈا اک واری ہو ای جاوے۔ ایس واٹر فنڈا وچ انصاف دیاں عمارتاں توں لے کے پنڈی‘ اسلام آباد دیاں بلڈنگاں وچ بیٹھن والے کسے بندے نوں نہ بخشیا جاوے۔ فیصلہ کرن والیاں توں لے کے فیصلہ سنن والے ساریاں دا پانی چیک کیتا جاوے۔ میرا یقین اے کہ جے انج کدی ہویا تے بہت ساریاں دیاں شلواراں گلیاں نظر آئون گئیاں۔
بنتا سنگھ اپنی بیگم دے نال بس وچ جا رہیا سی کہ کنڈیکٹر نے مینار پاکستان توں ذرا اگے آ کے آواز لائی گندے نالے لہہ جائو‘ بنتا جلدی نال لہہ گیا بیگم نے کہیا پر اسیں تے اگے جانا سی۔ بنتا بولیا‘ پہلے ایہ دس کنڈیکٹر نوں کیویں پتہ لگا میرا نالہ گندا اے؟ بنتا سنگھ بھیا تسیں غلط سمجھے اوہ گندا نالا (مینار پاکستان دے نیڑے چلن والا) کہہ رہیا سی۔ تہاڈا نالا گندا ہووے یاں صاف اوہنوں کیہ لینا دینا۔ ہن اجہی قوم جہدا مزاج ای گندے نالے پانا ہووے بھلا ایم ٹی جی دے ساڑھے پنج سو والے نالے دی فضیلت کیہ سمجھے گی۔ تقویٰ‘ سادگی تے گھٹ منافع دے فلسفے دے دھاگے نال بنے ساڑھے پنج سو دے نالے پان دے ثواب نوں تسیں دو ٹکے دے لوک کیہ سمجھو۔ تسیں کیہ جانو کہ ایہ نالا گنہگار شلواراں تے پاجامیاں نوں انج جپھا پاندا اے جیویں ماں اپنے شرارتی بچے نوں‘ ایس لئی میری پیاری قوم اپنیاں پاٹیاں پرانیاں شلواراں وچ رسیاں‘ سیبیاں دے نالے پان والی قوم‘ بچے دے نیکر توں بچن والے لاسٹک نوں نالے دی تھاں استعمال کرن والے لوک تسیں بس ٹی وی تے تقویٰ دے بھاشناں نوں انجوائے کرو باقی دڑ وٹ جائو۔
یورپی یونین نے پاکستان خلاف قرارداد منظور کر لئی۔ جہدے وچ جی ایس پی پلس تے نظرثانی دا مطالبہ کیتا اے۔ چلو جی اوہناں نوں اک پیغام گھلو کہ یاں قرارداد واپس لوو نہیں تے آیا جے غوری‘ دوڑ جا‘ چلو نسو اساں نہیں دینے تہاڈے پیسے‘ سانوں نہیں چاہیدا تہاڈا جی ایس پی پلس۔ ساڈے کول ساڈے اپنے ایس پی‘ ڈی ایس پی تے ایس ایس پی نیں۔ اوہ تہانوں جدوں چاہن لمیاں پا لین گے۔ لو جی ساڈی قومی اسمبلی کسے گل تے متفق ہووے نہ ہووے یورپین ہو گئے نیں۔ میں تحریک لبیک نوں دل دیاں گہرائیاں نال سلام پیش کرنا واں اوہناں نے جو قوم دی خدمت کیتی اے اوہدا سارے پاسے بول بالا اے۔ الحمدللہ سعد رضوی دی گرفتاری دے بعد کافراں خلاف ساڈے جہاد وچ درجناں گڈیاں‘ سینکڑوں موٹرسائیکلاں جہنم واصل ہوئیاں کئی پولیس اہلکار تے کارکن شہید ہوئے۔ اساں فرانس دی اٹ نال اٹ وجا دتی ہن جے اوہ سانوں اک ادھا وٹا مارن تے اوں آں دی گنجائش۔ جاندے جاندے بس اک گل ضرور کہواں گا۔ ایہ اسیں بار بار دیکھیا تسیں اپنے ہتھاں نال انساناں نوں ڈران لئی جن بناندے او تے فیر اکثر اوقات اوہ جن ایناں وڈا ہو جاندا اے کہ آپ بنان والا اوہنوں بوتل وچ بند نہیں کر سکدا۔ ایم کیو ایم دا جن سینکڑوں جاناں دی قربانی تے کراچی دی تباہی دے بعد وی مکمل بند نہیں ہو سکیا۔ خدارا جن بنان تے پالنے بند کر دیو۔ انساناں وچوں انساناں نوں اگے ودھ کے ملک چلان دیو ہن ہور تباہی وچ کیہ رہ گیا اے۔٭٭

اپنا تبصرہ گھلو