مریم نواز تے نویں انتخابات

حناپرویزبٹ

ڈھائی ورھے دیاں نکامیاں نوں مان کہہ کے بڑھکاں لان والیاں دی اپنی ای حکومت وچ ذاتی کرپشن دے دفتر تیزی نال کھلنا شروع ہو گئے نیں۔ صرف معمولی جیہا پنجی ارب دا گھپلا یعنی راولپنڈی رنگ روڈ سکینڈل تبدیلی سرکار دی سچائی تے امانت دے دعویاں نوں زمین بوس کر رہیا اے۔ ذرا سوچو جدوں اوہناں دے کول اقتدار نہ رہیا تے کنے سکینڈل سامنے آن گے؟ زلفی بخاری ولوں مستعفی ہون تے غلام سرور خان دی پریس کانفرنس نے لوکاں تے سب کجھ واضح کر دتا اے کہ اوہناں نے کیہ کرنا اے؟ کسے نوں پتہ اے کہ کرپشن دے الزام وچ برطرف کیتی گئی گوگل دی سابقہ ملازم تانیہ کتھے گئی؟ مشیر صحت ظفرمرزا کتھے نیں؟ چینی سکینڈل وچ ساری تحقیقات وچ کرپشن دا کھرا جہانگیر ترین ول گیا پر مجال اے کہ نیب یاں ایف آئی اے نے اوہنوں جیل وچ سٹیا ہووے۔ مجال اے کہ کوئی انصافی واشنگ مشین وچ نہاتے دھوتیاں ول نظر چک کے وی ویکھن؟ چینی چوری‘ آٹا چوری‘ گھی چوری دے بعد روزہ چوری کرنا حکومت دے نامہ اعمال نوں ہور کالا کر گیا۔ چن ویکھن دا حلف دین والے چن دی فوٹو نہ دے سکے کہ چن ہوندا تے ثبوت دیندے ناں؟ انج وی حکمراناں دا مذہب نال کیہ لینا دینا‘ اوہ سیکولر قوتاں دے نمائندے نیں‘ ہور تے ہور جمعے نوں نماز عید دی امامت کران تے تن مسیتاں دے اماماں خلاف مقدمے درج کرکے لوکاں دے دلاں و چ نفرت بیں بو دتے گئے۔
رمضان وچ لیموں‘ مرغی تے بیف چھ سو روپیے کلو جد کہ مٹن چوداں سو روپیے کلو دی ناقابل یقین قیمت تے اپڑ کے غریب لوکاں دا منہ چڑاندا رہیا۔ یہ کھلا چیلنج کر رہے نیں کہ سانوں تھلے لاہ کے وکھائو۔ جعلی سقراطاں نے طلب تے رسد دے قنون ای بدل دتے نیں۔ کرونا وچ شادی ہال تے ہوٹل انڈسٹری بند ہون نال مرغی دی کمرشل طلب نہ ہون دے برابر رہ گئی اے تے قیمت گھٹ ہون دی تھاں اینی ودھا دتی گئی کہ اللہ دی پناہ‘ ڈالر دی قیمت ودھی تے درآمدی شیواں دی قیمت وی ودھ گئی پر جدوں ڈالر دی قیمت تن ورھے پہلاں دی سطح تک گھٹ ہوئی تے قیمتاں اوتھے دیاں اوتھے کھڑیاں رہیاں‘ غریباں دی قوت خرید ختم کرن والے کہہ رہے نیں کہ مہنگائی تے مافیا کر رہیا اے جے انج اے تے فیر حکومت کیہ کر رہی اے؟۔
مصنوعی مہنگائی دے تابڑ توڑ حملیاں نے سانجھے فیملی سسٹم نوں ایناں نقصان اپڑایا اے کہ صدر نوں تحفظ والدین آرڈیننس جاری کرنا پیا پر اوہناں نوں دس دیواں قتل دی سزا پھانسی ہون نال کیہ قتل ہونا بند ہو گئے؟ آرڈیننس جاری کرن نال نہیں سگوں معاشی حالات بہتر کرن نال عوامی حالات نارمل ہوندے نیں لوک سوال کر رہے نیں کہ کیہ ایہو اوہ 22ورھے دی محنت سی جہدا پراپیگنڈا کیتا گیا سی؟ کوئی دن اجیہا نہیں جاندا جدوں لوکاں نوں مہنگائی دا جھٹکا نہیں لگدا کھجور دی قیمت تے اوتھے اپڑ گئی اے کہ مستقبل قریب وچ کھجوراں درجن دے حساب نال وِکن کرن گئیاں۔
معاشی پالیسی دا دیوالیہ پن اسدعمر دی بقراطیاں توں شوکت ترین دے منفی تبصریاں تک اپڑ گیا اے اوہ دن وی قوم ویکھ لوے گی جدوں شبرزیدی وانگوں شوکت ترین وی بیمار ہو کے حکومتی بیڑی چوں چھال لا دین گے۔ ایماندار نے خزانے تے اجیہا جھاڑو پھیریا اے کہ اوہدے سفارتی متھا پھڑ کے بیٹھے نیں کہ اگوں تنخواہواں دا بندوبست کیویں کریئے؟ اگلے بجٹ وچ تنخواہواں کیویں ودھائیے؟ جنہے ایدھی توں وی چندا وصول کیتا ہووے اوہدے لئی سعودیہ توں خیرات وچ چاول لینا کہڑی وڈی گل اے؟ ہر کوئی بڑا غصے وچ اے کہ ایہناں لوکاں نے ملک نوں برباد کر دتا اے۔ تبدیلی دے خواہش مند لوک وی کھلے عام ایہ سوال اٹھا رہے نیں کہ کرپشن دی بتی دے پچھے لان والے تن ورھیاں وچ شریفاں دی تن روپیے دی کرپشن وی کیوں نہ ثابت کر سکے۔ لوک چنگی طرح جان چکے نیں کہ وادھو بجلی بنان دے منصوبے لانا نوازشریف دا ویژن سی تے ایہدی وجہ نال ای تن ورھیاں وچ لوڈشیڈنگ نہیں ہوئی مریم نوازشریف دے جارحانہ سیاسی لاٹھی چارج تے تنقید کرن والیاں دی سیاسی شکست واضح ہو چکی اے اوہ من چکے نیں کہ نوازشریف دے بیانیے نوں جس کامیابی تے خوبصورتی نال مریم نوازشریف نے اگے ودھایا اے اوہدی مثال نہیں ملدی۔ حقیقت ایہہ وے کہ مریم نوازشریف دی شکل وچ پاکستان نوں اک اجہی لیڈر مل گئی اے جہدی اک آواز تے عوام باہر نکل آن گے۔ انصافی وی کہن تے مجبور ہو گئے کہ جدوں اوہ اپنے حلقیاں وچ نکلدے نیں نوازشریف زندہ باد دے نعرے اوہناں دے منہ تے پیندے نیں۔ جیویں ای بلدیاتی انتخابات ہون گے اوہناں دے ووٹ اوہناں دے کارنامیاں دی عکاسی کرن گے۔ اگلے الیکشن وچ مریم نوازشریف نہ صرف مسلم لیگ دی انتخابی مہم چلان گئیاں سگوں مریم دا خطاب حلقہ وچ کامیابی دی ضمانت سمجھیا جاوے گا جہدے نال نویں تاریخ رقم ہووے گی۔٭

اپنا تبصرہ گھلو