گورنر پنجاب دا کامیاب دورئہ امریکہ

شاہد رشید

گورنر پنجاب چوہدری محمد سرور دی ساری زندگی سماجی خدمت نال عبارت اے۔ برطانیہ ہوئے یاپاکستان، سکارٹ لینڈ ہوئے یا پنجاب، عوام ایہناں نوں اک سماجی خدمت گار دے طور اُتے جان دے تے پہچاندے نیں۔ سرور فائونڈیشن دے تحت غریب لوکاں نوں پین دا صاف پانی فراہم کرن دی خاطر واٹر فلٹریشن پلانٹس دی تنصیب پسماندہ علاقیاں دے بالاں نوں زیور تعلیم نال آراستہ کرنا، ہنر گاہواں دا قیام تے ایہناں دے ذریعے خواتین نوں ہنر مند بنا کے معاشی لحاظ نال اپنے پیراں اُتے کھڑا کرنا، صحت عامہ دی سہولتاں عام بندے تیکر اپڑانا، ایہناں سارے فلاحی اقدامات دے پس پردہ خلق خدا دی زندگیاں وچ آسانیاں تقسیم کرن دا جذبہ تے عزم کار فرما اے۔ ایس سرزمین پاک نال ایہناں نوں انتہا درجے دا عشق اے جس دی خاطر اوہناں نے اپنی برطانوی شہریت چھڈ دتی نہیں تے برطانیہ دی پارلیمنٹ دے منتخب رکن دی حیثیت نال ایہناں نوں اوتھے دی سیاست تے معاشرت وچ بے پناہ عزت تے پذیرائی حاصل سی۔ اگست 2013 وچ اوہ گورنر پنجاب دے منصب اُتے فائز ہوئے تے پاکستان لئی جی ایس پی پلس سٹیٹس حاصل کرن لئی ان تھک جدوجہد شروع کر دتی۔ جنوری 2014 وچ ایہناں دی کوششاں رنگ لیائیاں تے یورپین کمیشن نے پاکستان نوں ایہہ سٹیٹس دے دتا جس دے نتیجے وچ 28 یورپی ملکاں نوں پاکستانی برآمدات وچ دو گنا توں وی زیادہ وادھا ہو گیا تے پاکستان دی ٹیکسٹائل دی صنعت نوں خاطر خواہ فروغ حاصل ہویا۔ حال ای وچ ایہناں دی کاوشاں نال امریکی ریاست کیلی فورنیا دی اسمبلی نے اک بل دے ذریعے کیلی فورنیا تے صوبہ پنجاب نوں سسٹر سٹیٹس قرار دے دتا اے۔ اپنی 45 سالہ سیاسی و سماجی زندگی دا بیشتر حصہ اوہناں نے دیار مغرب وچ بسر کیتا تے اپنی ان تھک محنت، خلوص تے لگن دے طفیل اہل مغرب دے دلاں وچ اپنے واسطے اک قابل رشک مقام پیدا کر لیا اے۔ ایہو وجہ اے کہ یورپ تے امریکہ دے پالیسی ساز ایہناں دی گلاں اُتے خاص دھیان دیندے نیں۔ ایہناں دی کوششاں دی بدولت برطانیہ نے پاکستان لئی اپنی سالانہ امداد وچ کئی گنا وادھا کر دتا اے۔


مقبوضہ کشمیر تے فلسطین دے مظلوم مسلماناں اُتے جس وحشیانہ انداز وچ مظالم ڈھائے گئے ایس دی وجہ نال پوری دنیا دے مسلماناں دے دل خون دے آنسو روئے نیں۔ چوہدری محمد سرور وی ایہناں حالات و واقعات اُتے خاصے مضطرب ہوئے تے ایہناں دا ایہو اضطراب ایہناں نوں پچھلے دناں ریاست ہائے متحدہ امریکہ لے گیا جتھے اوہناں نے مسئلہ کشمیر تے مسئلہ فلسطین اُتے نہ صرف پاکستانی مسلماناں بلکہ بحیثیت، مجموعی پوری امت مسلمہ دے موقف تے جذبات دی بھرپور ترجمانی کیتی تے اوتھے دی اہم شخصیات نال ملاقاتاں کیتیاں۔ ایس دورے دے حوالے نال ایہناں دے تاثرات براہ راست جانن لئی نظریہ پاکستان ٹرسٹ نے ایوان کارکنان تحریک پاکستان، لہور وچ اک خصوصی نشست دا انعقاد کیتا۔ نشست دا ویلا ساڑھے 10 مقرر سی تے اوہ عین ویلے اُتے تشریف لے آئے۔ گورنر پنجاب نے اردو تے پنجابی زبان وچ فی البدیہہ خطاب کردے ہوئے کہیا کہ میں بارہ دناں اُتے مشتمل اپنے دورے وچ امریکی معاشرے دے اک سو توں ودھ سرکردہ بندیاں نال ملاقاتاں کیتیاں تے ایہہ نتیجہ اخذ کیتا کہ امریکہ وچ مختلف سطحاں دے منتخب نمائندیاں تے رائے عامہ اُتے اثر انداز ہون دی صلاحیت رکھن والے حلقیاں دا ذہن تبدیل ہو رہیا اے تے ایہناں دے دل و دماغ وچ کشمیر تے فلسطین دے نہتے تے مظلوم عوام نال ہمدردی دے جذبات پیدا ہو رہے نیں۔ جدوں اوہ ٹی وی سکرین تے سوشل میڈیا اُتے انسانیت سوز مظالم دے مناظر ویکھدے نیں تےایہناں دے دل وی تڑپدے نیں۔ میرا خیال اے کہ ایہناں نوں کشمیر تے فلسطین دے مسائل دے اصل حقائق توں آگاہ کرن وچ خود ساڈے توں کوتاہی دا ارتکاب ہویا اے تاں ہن سانوں ایس دی تلافی لئی مربوط کوششاں  کرنیاں  ہون گیاں تے امریکی کانگریس دے اراکین تیکر اپنی اواز زیادہ زور دار انداز وچ اپڑانی ہوئے گی۔
گورنر پنجاب دا کہنا سی کہ اسرائیل تے بھارت مسلماناں دے خلاف دہشت گردی دے مرتکب ہو رہے نیں پر دنیا ایہناں نوں دہشت گرد نہیں کہہ رہی۔ جے دنیا وچ کدھرے وی کوئی مسلمان دہشت گردی دے واقعے وچ ملوث ہوئے تے ایہنوں دین اسلام دے نال جوڑ دتا جاندا اے۔ ایس دے برعکس کدھرے کوئی عیسائی، یہودی یا ہندو دہشت گردی دے واقعے وچ ملوث ہو جائے تے ایہنوں ایس دا انفرادی فعل قرار دے دتا جاندا اے۔ ایہہ صریحاً نا انصافی اے۔ میرے نیڑے دہشت گرداں دا کوئی مذہب نہیں ہوندا، تاں دہشت گردی نوں کسے خاص مذہب نال جوڑن دی بجائے پوری عالمی برادری نوں ایس عفریت دے خلاف اٹھ کھڑے ہونا چاہیدا اے تے دہشت گردی دی وارداتاں وچ ملوث درندیاں دے خلاف اک جہیا بیانیہ اختیار کرنا چاہیدا اے۔ اسلام تے سلامتی تے امن دا پیامبر اے جس نے اک انسان دے قتل نوں پوری انسانیت دا قتل قرار دتا اے۔ ایس ضمن وچ امریکہ تے یورپ وچ مقیم پاکستانی تارکین وطن اُتے بھاری ذمہ داری عائد ہوندی اے کہ اوہ کشمیر تے فلسطین دی حقیقی صورتحال تے اسلاموفوبیا دے بارے مسلماناں دا موقف اوتھے دے منتخب نمائندیاں تے عام لوکاں تیکر اپڑان تے خاص طور تے انسانی حقوق دی سنگین خلاف ورزیاں نوں ساہمنے لیان۔
چوہدری محمد سرور نے افغانستان دی صورت حال تے امریکہ دی پاکستان وچ فضائی اڈے لین دی خواہش اُتے وی گل کیتی تے دو ٹوک الفاظ وچ کہیا کہ انج کدی نہیں ہوئے گا کیوں جے افغان جنگ پاروں اسیں پہلے ای ناقابل تلافی نقصان چُکیا اے۔ پُرامن افغانستان ساڈے سب دے مفاد وچ اے تے ایس مقصد دے حصول لئی ساڈے توں جو کجھ بن پیا اوہ ضرور کراں گے۔ گورنر پنجاب نے دسیا کہ دورئہ امریکہ دے دوران پاکستانی کمیونٹی دے نال سکھاں نے وی مختلف اجتماعات وچ پاکستان نال اپنی محبت دا اظہار کیتا۔ ایس تناظر وچ میں امریکہ وچ مقیم سکھ کمیونٹی نوں پاکستان لئی اک بوہت وڈا اثاثہ سمجھنا واں۔جے پاکستان تے سکھ بھارت دے خلاف مشترکہ جدوجہد شروع کر دین تے ناقابل شکست ثابت ہون گے۔ چوہدری محمد سرور دا کہنا سی کہ مسئلہ کشمیر دا بالکل سادہ تے فوری حل ایہہ وے کہ کشمیریاں نوں اقوام متحدہ دی قرار داداں دے مطابق ایہناں دا بنیادی حق خودارادیت دے دتا جائے۔ بھارت اک سوچے سمجھے منصوبے دے تحت مقبوضہ وادی وچ غیر کشمیریاں نوں بسا کے آبادی دے تناسب تبدیل کرن دے در پے وے جس دے خلاف کشمیری مسلمان سراپا احتجاج نیں تے پاکستان ایہناں دے اصولاں اُتے مبنی موقف دی بھرپور تائید و حمایت کردا اے۔
گورنر پنجاب نے نظریہ پاکستان ٹرسٹ دے سابق چیئر مین محترم مجید نظامی دی خدمات نوں شاندار الفاظ وچ خراج عقیدت پیش کردے ہوئے کہیا کہ ایہہ مشعل اوہناں ای دی روشن کیتی ہوئی اے تے ایس دی لَو نوں مزید تیز کرن لئی میرا ہر قسم دا تعاون ایس قومی نظریاتی ادارے دے ہمیشہ شامل حال رہوے گا۔ قبل ازیں نشست دے صدر تے نظریہ پاکستان ٹرسٹ دے وائس چیئر مین میاں فاروق الطاف نے اپنے خطاب وچ واشگاف الفاظ وچ کہیا کہ کشمیر تے فلسطین دے مسائل اسلام دشمن قوتاں دے پیدا کردہ نیں۔ مسئلہ کشمیر برطانیہ، تے بھارت دی بے ایمانی جد کہ مسئلہ فلسطین برطانیہ تے دیگر استعماری قوتاں دے مکروہ گٹھ جوڑ دا شاخسانہ اے۔ اوہناں نے فلسطین دے حالیہ بحران دے دوران حکومت پاکستان دے دیگر اسلامی ملکاں دے تعاون نال سفارتی محاذ اُتے سرگرم کردار نوں سراہندے ہوئے امید ظاہر کیتی کہ ساڈے کشمیری تے فلسطینی بھراواں دی جدوجہد تے قربانیاں دے طفیل اوہ بوہت جلدی بھارتی تے صیہونی استبداد توں نجات حاصل کر لین گے۔ نشست وچ معروف تجزیہ کار سلمان غنی نے وی اظہار خیال کیتا۔

اپنا تبصرہ گھلو