من مانی یا سول نافرمانی

پاکستان وچ سرکاری سکولاں نوں کوئی اہمیت نہیں دتی جاندی حالانکہ پاکستان دے سرکاری سکولاں چ میرٹ دے بغیر اساتذہ دی بھرتی نہیں ہوندی

فاطمہ جہاں

ساڈے رویے بڑے عجیب نیں، اسی بیک وقت امیر وی آں تے غریب وی کیوں جے اسی حکومت کولوں اپنے علاقے وچ سکول، ہسپتال ڈسپنسری دا مطالبہ تے کرنے آں پر جے اوہ سہولتاں میسر ہو جان تے اسی اوہناں توں فائدہ چکنا گوارا نہیں کردے۔
پاکستان وچ سرکاری سکولاں نوں کوئی اہمیت نہیں دتی جاندی۔ بلکہ ایڈا پیڈا لفظ اوہناں لئی استعمال کیتا جاندا اے۔ کھوتی سکول، شرم نال ڈُب مرن دا مقام اے حالانکہ پاکستان دے سرکاری سکولاں چ میرٹ دے بغیر اساتذہ دی بھرتی نہیں ہوندی۔ سرکاری سکولاں دیاں وڈیاں وڈیاں عمارتاں نیں جد کہ پرائیویٹ سکول نکے نکے نیں۔ چھوٹی چھوٹیاں کھڈاں چ سکول کھولے ہوئے نیں۔ میٹرک ایف اے پاس سٹاف رکھیا اے۔ اوہ بالاں دا مستقبل سنوارن دی بجائے وگاڑدے نیں تے جے وڈے پرائیویٹ سکولاں وچ جائیے جیہدےو چ بیکن ہائوس ، لاہور لائیم، لاہور گرائمر تے ایسطراں دے ہور سکول نیں۔ اوہناں وچ پڑھائی ممی ڈیڈی اے۔صرف اک کمپلیکس دے مارے لوکی نیں جیہڑے اندھا دھند بھیڑ چال دا شکار نیں۔ معیاری تعلیم دی ریس نہیں پیسے دی دوڑ اے۔ سرکاری سکولاں دی فلم بہترین اے۔ امریکہ چ پرائیویٹ سکول ضرور رہیگے نیں پر ایتھے ہر قوم دے لوک سرکاری سکولاں چ اپنے بال داخل کراندے نیں۔ حتیٰ کہ پاکستانی قوم وی امریکہ چ سرکاری سکولاں چ بچے پڑھاندے نیں کیونکہ ایتھے سرکاری سکولاں دا معیار بہترین اے۔ ایناں نوں P.S کہیا جاندا اے یعنی پبلک سکول، سرکاری سکول۔ پاکستانی تے آپ اپنے تے اپنے بچیاں دے دشمن نیں حکومت سہولتاں دیندی اے لینا نہیں چاہندے۔ ذرا صحت دے میدان ول ویکھو پاکستان چ سرکاری ہسپتالاں چ لوکی ڈاکٹراں کول جاندے گھبراندے نیں۔ تے شام نوں اوہناں ای ڈاکٹراں کولوں نجی کلینک چ بھاری فیس دے کے دوائی دا نسخہ لکھواندے نیں۔ ایہہ ساڈا ٹرینڈ تے سمبل آف سٹیٹس بن گیا اے۔ اسیں حکومت کولوں فائدہ نہیں چُکنا چاہندے اپنی ڈیڑھ اِٹـ دی مسیت وکھری بنان چ فخر محسوس کرنے آں۔ کیونکہ اسیں غریب عوام نہیں امیر آں۔ جے گورنمنٹ ٹرین تے سرکاری بساں دی سہولت دیندی اے تے فیر وی پواڑا اے ہر کوئی اپنی نجی گڈی کرواداں اے تے ایہدے چ فخر محسوس کردا اے۔ پیسہ جُواے۔ نالے ریس کر کے شریکاں نوں اگ وی تے لانی اے۔
ویاواں دے اُتے جے ون ڈش دی پابندی لائی گئی تے ایہدے چ وی چور دروازے ہوٹلاں والیاں تے عوام نے مل کے کڈ لئے۔ بریانی دے ڈبیاں دی آڑ چ اوہناں چ ریشئن سلاد، باربی کیو، گرل تے رسملائی وغیرہ پا دتی جاندی اے۔ ڈیزرٹ دے ناں تے وی ہتھ ہلکانہ رکھیا گیا۔ آئس کریم، قلفہ تے زردہ ، متنجن شامل کیتی گئی۔ گل بریانی تے رائتہ توں ود گئی۔ پاکستانی ثقافت چ اے گل پتہ نہیں کتھوں شامل ہو گئی اے کہ جے روٹی چنگی نہ ہوئی تے نک وڈیا جائے گا۔ پاویں ایس روٹی دے چکر چ ماں پیو دا نک وڈیا جائے۔ خیر اے کوئی گل نہیں واہ واہ تے ہو گئی۔ داج چ وی ایہی کجھ ہوندا اے۔ گورنمنٹ نے داج تے پابندی لائی پر دھی نوں سارے گھر دا سامان دینا اے جویں اگلے گھر والے بھکھے ننگے نیں۔ یا اوہناں نے اپنے منڈے دا مول وٹیا اے۔ حکومت نے داج دے خلاف تے کھانے دے خلاف پابندیاں لائیاں تے لوکاں نے منن توں انکار کر دتا۔ عوام امیر اے اوہناں نوں پیسے دا چاء کرنا اے۔ دکھاوا کرنا اے۔ ویاہ شادی دے دوران رات 10 وجے ہال بند کرن دا کہیا گیا ۔ پر کون سندا اے رات دو ، تن وجے توں پہلاں جنج اپنے گھر واپس نہیں مڑدی۔ جد کہ امریکہ چ ویاہ بہتا اتوار والے دیہاڑے ہندا اے۔ چرچ جاندے نیں دن دے بارہ وجے تک ویاہ کر کے اپنے اپنے گھر چلے جاندے نیں۔ ماں پیو تے دلہا دلہن دے دوست داج دی صورت چ اک اک شے مال توں آرڈر کر دیندے نیں جیہڑی اوہناں دے گھر پہلوں ای پہنچ جاندی اے۔
کڑی منڈے تے ماں پیو تے بوجھ وی نہیں پیندا۔ گھر دی ورتن وی پوری ہو جاندی اے کیونکہ وری تاج دی نمائش دا کوئی رولا نہیں۔ پاکستان چ سرکاری بینکاں دی بجائے کمرشل بینک دا استعمال بہتا کیتا جاندا اے۔
پاکستان چ یوٹیلٹی سٹور دا معیار ساڈی عوام نے گرایا اے۔ کوئی اوتھے چیزاں نہیں خرید دا لائن چ لگنا کسے واسطے وی بڑی بے عزتی دی گل اے۔ یعنی ہر سہولت جیہڑی ساہنوں حکومت دیندی اے اسیں نہیں لینی۔ پیسہ ای بڑا اے۔ مکان بنانا ہوئے تد سیاپا۔ اسیں کدی وی نقشہ پاس کروان دی زحمت نہیں کردے۔ گورنمنٹ دی پالیسی چ بین دی بجائے باہروں باہر پیسہ دے کے نقشہ پاس کروا لینے آں پیسہ جو چوکھا اے۔ آکڑ بڑی اے۔ مکان بنن توں بعد وائرنگ دا نقشہ پاس نہیں کرواندے کیہ لوڑ اے ساڈے کول کیہڑی پیسے دی تھوڑ اے۔
بل دے نال نال PTV دا وی بل ادا کرنے آں۔ پر ہمیشہ پرائیویٹ چینل ویکھنے آں۔ گھر گھر کیبل اے۔ اوہدے پیسے تارنا فخر سمجھنے آں۔ PTV دا چینل جد تک اکو ای چینل سی افراتفری نہیں سی۔ لوکی رات 8 وجے دا ڈرامہ ویکھ کے سو جاندے سن۔ ہن تے ہر چینل دی وکھری راگنی اے۔ اوہنوں چھڈو بچیاں دے ہتھ چ موبائل اے آئی پیڈ اے ہر اک رضائی چ وکھرا ٹی وی لگیا ہویا اے۔
اسیں ٹریفک دے اصولاں چ وی ڈنڈی مارنے آں۔ جے ساڈے کول گڈی اے تے اسیں موٹر سیکل والے نوں کجھ نہیں سمجھدے انسانی جان دا کوئی مُل نہیں۔ حکومت نے پیدل ٹرن والیاں واسطے وکھ رستہ بنایا اے کیہ کریئے اسیں پل دے تھلوں ای لنگنا اے۔ بھاویں جند ساڈی مُک جاوے ۔ کوئی پرواہ نہیں خیر اے۔ پر آکڑ ساڈی نہیں ٹُٹنی چاہیدی اے۔
دوجے پاسے ویکھو حکومت جے حفاظتی ٹیکے تے پولیو دے قطرے پلان دی سہولت دیندی اے تے اسیں نہیں ٹیکے لوانے نہیں پولیو دے قطرے پلانے کہ ایہہ فراڈ اے ، زہر اے۔ اسیں جا کے نجی کلینک تے 15,20 ہزار روپیہ دے کے ایہی کم کروا لینے آں پر حکومتی پالیسیاں تے اعتبار نہیں کردے۔ تے اوہناں سہولتاں توں فائدہ نہیں چکدے۔
ساڈے نال کسے نے کیہ دشمنی کرنی اے۔ اسیں اپنے دشمن آپ آں۔ ہن حکومت فری Covid یعنی کرونا وائرس دے ٹیکے لیا رہی اے۔ پر جا کے نہیں لوانے کہ دو سال بعد مر جاواں گے۔ یا پتہ نہیں کیہڑا وائرس ساڈے اندر پا دین۔ حکومت جیہڑی وی سوکھائی کردی اے اسیں اوہنوں شک دی نظر نال ویکھنے آں تے اوکھیائی بنا لینے آں۔ رب دے بندیو اپنے دشمن آپ نہ بنو۔ اوس ویلے بڑا ہاسے دا مقام ہندا اے۔ واحد شے سرکاری نوکری اے جیہڑی ہر کوئی بھالدا اے چاہندا اے۔ لیکن سرکاری سہولتاں تے کوئی اعتبار نہیں کردا۔ اسیں سارے پیسہ دے کے نجی طور تے کم کروان نوں چنگا سمجھنے آں حکومتی آسانیاں نوں قبول نہیں کردے۔ حکومت، سرکار جیہڑی پالیسی لوکاں دی بھلائی واسطے بناندی اے اسیں اوہدے تے عمل کرنا اپنی توہین سمجھنے آں۔ اصل چ سارا کھیڈ پیسے دا اے۔ اسیں باہرو باہر کم کران دے عادی آں۔ ساڈی عوام غریب نہیں امیر اے۔ ایسے چکر چ حکومتی پالیسیاں تے آسانیاں نوں رد کر دیندی اے۔ کسے نوں ساڈی ثقافت، حکومت، تے پالیسیاں نوں تباہ کرن دی لوڑ ای نہیں اسیں آپ ای ایناں تے اعتبار نہیں کردے۔ اپنے ہتھی حکومت بنا کے اسیں اوہناں دے بنائے اصولاں تے قانون نوں رد کردینے آں۔
حکومت جو سہولتاں سانوں دیندی اے اسیں اوہناں چ سوسو کیڑے پانے آں۔ حکومتی پالیسیاں تے سہولتاں دے بارے چ ایہی کہیا جا سکدا اے۔ حکومتی سہولتاں نوں اسیں دشمن سمجھنے آں۔ تے نجی سہولتاں نوں سجن۔ اصل چ سانوں سجن تے دشمن دی پہچان ای نہیں۔ اسیں اپنے دشمن آپ آں جے اسیں چار دیہاڑے حکومتی سہولتاں نوں اپنا سجن بنا کے پرائیویٹ اداریاں نوں مات کر لئے تے ساڈا پورا ملک سوہنیاں مکیناں دی کائنات تے جنت بن جائے گا۔ اپنے نال دشمنی نہ کرو۔ اپنے تے رحم نہ کرو اپنی آن والیاں نسلاں تے کرو۔ جے ساڈے معاشرے نوں ترقی دی پوڑھی تے چڑھنا اے تے حکومت دے موہڈے نال موہڈا لا کے چلنا پئے گا تے حکومتی سہولتاں تے پالیسیاں نوں اپنانا ہوئے گا تاکہ ملک آن والے سمے نال مقابلہ کر سکے۔ سانوں اپنے نال دشمنی چھڈنی پئے گی۔ سانوں اپنا دشمن آپ نہیں بننا۔ بلکہ دوستی دی راہ تے ٹُر کے وطن نوں کامیابی نال ہمکنار کرنا ہوئے گا۔ آئو سارے رل مل کے حکومتی سہولتاں نوں اپنا ئیے تے چور بازاری نوں مکائیے۔ اپنے پیراں تے آپ کلہاڑی نہ مارئیے۔ آن، بان تے شان نال جیئے۔ ہر کم سہولت تے آسانی نال کریئے جیہڑی حکومت بنائیے اوہدے تے اعتبار وی کریئے اوکھے سوکھے ویلے تے آندے ای رہندے نیں اپنے نال دشمنی تے نہ کریئے۔ جیہڑی سانوں پاتال چے سُٹ دیوے۔ ساڈے پلے ککھ وی نہ رہوے۔

اپنا تبصرہ گھلو