مذہبی آزادی دی خلاف ورزی دا الزام پر خطے دا محفوظ ملک

hameed ullah bhatti

گیلپ گلوبل نے 2021 دی رپورٹ جاری کردے ہوئے پاکستان تے سری لنکا نوں جنوبی ایشیا دے محفوظ ترین ممالک قرار دتا اے

کوئی ملک کسے دا پابند نہیں جس دا جس نا ل مفاد ہوندا اے ایسے نال تعلق بناندا اے جس نال مفاد نہیں ہوندا ایہنوں نظر انداز کرنا وی معیوب نہیں

تحریر حمیداللہ بھٹی

اسلامی جمہوریہ پاکستان وچ اقلیتاں تے ایہناں دی عبادت گاہواں محفوظ مندر، گوردوارے تے گرجا گھراں نوں نقصان اپڑان دا کوئی تصور وی نہیں کر سکدا کسے اقلیتی عبادت گاہ نوں نقصان اپڑن دی صورت وچ انتظامیہ تے عدالتاں نہ صرف سخت باز پُرس کردیاں نیں بلکہ ذمہ داران توں نقصان وی پورا کیتا جاندا اے انج دی مذہبی آزادی دا بھارت جہے ملک وچ تصور وی نہیں کیتا جا سکدا جتھے گاں دے گوشت دے شُبے وچ مسلماناں نوں بدترین تشدد دا نشانہ بنانا تے جان توں مار دینا معمول اے ایہناں نوں زبردستی اذان تے نماز توں روکیا جاندا اے عیسائیاں دی عبادت وچ خلل پانا تے مار کُٹ وی عام گل اے سکھاں نوں وی شک و شبے دی نظر نال ویکھیا جاندا اے دلتاں دی گل ای کیہ کریئے جیہڑے ہر تھاں تے ہر ویلے تزلیل دا ساہمنا کرن اُتے مجبور نیں۔ مسلماناں، عیسائیاں، سکھاں تے دلتاں دی مسلسل نسل کشی دے باوجود بھارت نوں امریکہ مذہبی آزادی دی خلاف ورزی والے ملکاں وچ شامل نہیں کردا اسرائیل وچ مقبوضہ بیت المقدس دی بے حرمتی تے فلسطینیاں دی نسل کشی مذہبی آزادی دی بدترین خلاف ورزی اے پر امریکی نہیں مندے البتہ پاکستان نوں مذہبی آزادی دی انتہائی خلاف ورزیاں وچ ملوث پہلی 10 ریاستاں وچ ضرور شمار کیتا جاندا اے۔ روس تے چین توں امریکی مخاسمت لُکی چھپی نہیں ایس لئی ایہناں نوں لسٹ وچ شامل کرن دی وجہ تے سمجھ وچ آندی اے جد کہ میانمار، ایران، شمالی کوریا تے ایٹریا اُتے وی ایہنوں غصہ اے۔ پر سعودی عرب، تاجکستان تے ترکمانستان دا جرم صرف اسلامی ملک ہونا اے ایسے لئی ناں شامل کیتا گیا اے ایہہ دہرا معیار ای امریکیاں نوں دنیا وچ ناقابل اعتبار بنا رہیا اے تے اقوام عالم وچ ایس دی مخالفت ودھن دا باعث اے پر سمجھن دی بجائے امریکہ جھکا کے شرائط منوان دے چکر توں باہر نہیں نکل رہیا جے پالیسی اُتے نظر ثانی نہیں کیتی جاندی تے اپنا ای نقصان کرے گا کیوں جے چین دی صورت وچ دنیا دے کول ہن متبادل موجود اے جیہڑا جنگ نہیں سرمایہ کاری دے ذریعے ریاستاں نال تعلقات ودھا رہیا اے نیز عدم مداخلت دی پالیسی اُتے عمل پیرا اے ایس لئی جھکان دی بجائے برابری دی بنیاد اُتے تعلقات استوار کرن وچ ای امریکہ دی بہتری اے۔
گیلپ گلوبل نے 2021 دی رپورٹ جاری کردے ہوئے پاکستان تے سری لنکا نوں جنوبی ایشیا دے محفوظ ترین ممالک قرار دتا اے رپورٹ وچ پاکستان دا نمبر 40 تے بھارت دا ناں 56 نمبر اُتے اے آزاد ادارے دی رپورٹ وچ پاکستان دا نمبر بھارت توں 16 درجہ بہتر اے امریکی وزیر خارجہ انٹونی بلنگن اینے لاعلم یا کمزور بصارت رکھدے نیں کہ حقیقت دا ادراک نہیں کر سکدے؟ منیا کہ کجھ ودھا وی لیندے نیں زیب داستان لئی پر سچ نوں لُکانا کتھے دی دانشمندی اے؟ ایس مہینے لسٹاں جاری ہوئیاں سولہ نومبر نوں امریکہ نے مذہبی آزادی دی انتہائی خلاف ورزیاں وچ ملوث 10 ملکاں دی لسٹ جاری کیتی جد کہ 20 نومبر نوں گیلپ گلوبل نے جنوبی ایشیا دے محفوظ ترین ملکاں دی لسٹ جاری کر دتی پہلی لسٹ امریکی جانبداری دا شاہکار اے جد کہ دوجی لسٹ اک غیر جانبدار ادارے نے مرتب کیتی اے دونواں اُتے طائرانہ نگاہ پاندے ای سچ تے جھوٹ آشکار ہو جاندا اے بہتان طرازی تے من گھڑت الزامات لا کے کیہ امریکی ساکھ بہتر کر سکدے نیں؟ ہر گز نہیں۔ بلکہ اک وار فیر ثابت ہو گیا کہ سچ تے جھوٹ نال امریکہ نوں غرض نہیں اوہ دوست ملکاں دے گناہ تے خامیاں نظر انداز جد کہ مخالف ریاستاں نوں جھکان دی کوشش وچ اے۔ سچ ایہہ وے کہ پاکستان وچ امن دی صورتحال بہترین اے مذہبی رواداری دی وجہ نال اقلیتاں محفوظ نیں فرقہ واریت تے مسلح گروپاں اُتے قابو پایا جا چکیا اے براستہ افغانستان توں پشتون تے بلوچ تحریکاں نوں بھارتی اسلحے، رقماں تے تربیت دا خاتمہ ہون نال دہشت گرداں دا زور ٹُٹ گیا جس دی وجہ نال اج پاکستان امن دے حوالے نال بھارت توں بوہت بہتر اے پر ایہہ سچ ساری دنیا نوں نظر آ رہیا اے صرف جانبدار امریکہ ویکھن توں قاصر اے۔
حال ای وچ امریکی سینٹ وچ افغانستان دے حوالے نال پیش کردہ چار بلز تے کمیشن رپورٹاں نال پاکستان دے خلاف تحفظات خارج کیتے گئے نیں جیہڑے اک اہم سفارتی پیش رفت اے پر ایہہ وی حقیقت اے کہ پاک امریکہ قربت دا موسم افغان جنگ دے دوران ای رخصت ہو چکیا ایس قربت نوں وی ختم کرن وچ امریکہ دا کلیدی کردار اے ایس وچ کوئی دورائے نہیں پاکستان دے حکمران ہر ویلے کورنش بجا لیان تے خدمات پیش کرن لئی ہمہ وقت آمادہ تیار رہن دے باوجود وقتی طور تے ای منظور نظر دا منصب حاصل کر سکے مطلب ختم ہوندے ای نظر انداز وی ہوندے رہے فیر وی ساڈے حکمراناں دی زبان اُتے کدی شکوہ و شکایات نہیں آئیاں۔ انج دی فریفتگی کسے دے عشق دی سچائی نوں پرکھن لئی کافی اے پر اج دونواں ملکاں وچ اعلیٰ سطح اُتے مراسم اینے وگاڑ دا شکار نیں کہ جوبائیڈن نے صدر دا منصب سنبھالن دے بعد توں پاکستان نوں مسلسل نظر انداز کر رکھیا اے باوجود ایس دے کہ کئی پس ماندہ ملکاں دے سربراہان نال گل بات کیتی تے پالیسیاں دے حوالے نال اعتماد وچ لیا پر دنیا دی ستویں تے اسلامی ملکاں دی پہلی ایٹمی ریاست دے سربراہ نال گل بات لئی ایہناں نوں ایس لئی ویلا نہیں مل سکیا کہ دونواں ملکاں وچ قربت دا موسم چلا گیا اے۔
کوئی ملک کسے دا پابند نہیں جس دا جس نا ل مفاد ہوندا اے ایسے نال تعلق بناندا اے جس نال مفاد نہیں ہوندا ایہنوں نظر انداز کرنا وی معیوب نہیں سمجھیا جاندا کیوں جے ریاستاں دے تعلقات مفادات دے تابع ہوندے نیں ایسے لئی پاکستان دفاعی معاہدیاں وچ شامل ہو کے وی مسئلہ کشمیر حل کرن لئی عالمی حمایت حاصل نہیں کر سکیا جد کہ بھارت جہیا ملک روسی کیمپ وچ شامل ہو کے وی امریکہ نوں کشمیر دے حوالے غیر جانبدار ہون اُتے قائل کرن وچ کامیاب رہیا کیوں جے امریکی قیادت نوں چین دے توڑ لئی کسے مناسب کردار دی تلاش سی ایسے بنا اُتے روس دے طرفدار ہون دے باوجود بھارت نوں مخالف نہ بنایا گیا اج تے حالات ای تبدیل ہو چکے نیں بھارت جہیا جنونی ملک صرف امریکہ دا ای منظورِ نظر نہیں بلکہ اوہ مغربی ملک اسرائیل، آسٹریلیا تے جاپان دے نال عرب ریاستاں نال قریبی تے گرم جوشی اُتے مبنی تعلقات استوار کر چکیا اے ایس دی خامیاں کسے نوں نظر نہیں آندیا کیوں جے سب توں زیادہ دفاعی ہتھیار خریدن والا دنیا دا آبادی دے لحاظ نال دوجا وڈا ملک اے ایس دی منڈی اُتے سب دی نظر اے ہتھیار ویچن تے چین دے ودھدے عالمی کردار نوں محدود کرن لئی عالمی طاقتاں بھارت دے ناز نخرے چُکن اُتے مجبور نیں ایہناں حالات وچ ایہہ سمجھ لینا کہ پاک امریکہ تزویراتی اتحادی نیں کسے طور ٹھیک نہیں ہاں مستقبل وچ کدی امریکیاں نوں پاکستانی کردار دی لوڑ محسوس ہوئی تے محدود مدت لئی تعلقات بہتر ہو سکدے نیں نہیں تے حقیقت ایہہ وے کہ پاک امریکہ قربت دا موسم قصہ پارینہ بن چکیا جے قربت دا موسم جوبن اُتے ہوندا تے مذہبی آزادی دی خلاف ورزی دا الزام عائد نہ کیتا جاندا گیلپ گلوبل دا پاکستان نوں جنوبی ایشیا جہے خطے دا محفوظ ترین ملک قرار دینا سچائی اے پر ایس حقیقت نوں امریکہ تسلیم نہیں کر سکدا کیوں جے نویں حالات وچ ایہنوں پاکستان دی بجائے بھارت زیادہ عزیز اے۔

اپنا تبصرہ گھلو