مہنگائی دا جِن بے قابو !

تحریر : پروفیسر حکیم سید عمران فیاض

اے رات مجھے ماں کی طرح گود میں لے لے
دن بھر کی مشقت سے بدن ٹوٹ رھا ھے
مہنگائی، مہنگائی، مہنگائی! جس نے ایس ویلے عوام نوں انتہائی مشکل وچ پایا ہویا اے۔ غریب تے غریب مستوسط طبقہ شدید ذہنی دبائو دا شکار اے۔ موجودہ دور وچ اپنے خاندان دی کفالت کرنا جوے شیر لیان دے مترادف اے۔ تنخواہ دار غریبی والی زندگی لنگھان اُتے مجبور اے۔ جس خاندان دے 5 توں 7 بندے نیں تے کمان والا اک ہوئے اوتھے غربت دا کیہ عالم ہوئے گا۔ موجودہ بے لگام مہنگائی۔ مہنگی کرائے داری، مہنگی اشیائے ضروریہ دے مقابلے وچ گھٹ تنخواہ آخر ایس دا حل کیہ اے۔
وطن عزیز وچ جیہڑا وی حکومت برسر اقتدار آندی اے۔ اوہ عوام نوں نکے دعویاں تے سہانے سپنے تے خیالی پلائو وکھا کے برسر اقتدار تے آ جاندی اے پر عوام نال کیتے گئے وعدیاں نوں پورا کرنا اگلے ای لمحے بھل جاندے نیں کہ شاید ایہہ اک خواب اے۔ ایہناں ولوں کیتے گئے وعدیاں دی تکمیل عوام توں کوسوں دور چلی جاندی اے۔
ہر شخص سر پر کفن باندھ کر نکلے
حق کےلئے لڑنا تو بغاوت نہیں ہوتی
اج موجودہ ویلے وچ مہنگائی دا جن بے قابو ہو چکیا اے عوام اپنے گھریلو اخراجات نوں پورا کرن وچ بُری طرح ناکام ہو چکی اے۔ اک غریب خاندان دا سربراہ اپنے بال بچیاں دی پرورش کرن وچ ایڑی چوٹی دا زور لا دیندا اے پر فیر وی اوہ اپنے گھریلو اخراجات نوں پورا نہیں کر سکدا۔ کئی لوکاں دے گھریلو اخراجات کئی کئی مہینے تیکر پورے نہیں ہوندے۔جے کوئی غمی خوشی آجائے تے فیر جان دے لالے پئے جاندے نیں۔ صحت، تعلیم، خوراک، رہائش ، یوٹیلٹی بلز، لباس، سنے کئی اخراجات اژدھے وانگوں ہر لمحہ غربت دی چکی وچ پسن والی عوام نوں نگھلن لئی ہر ویلے تیار رہندے نیں۔روز بروز اشیائے خوردونوش اشیائے ضروریہ دیاں قیمتاں اسماناں نال گلاں کر رہیاں ہوندیاں نیں پر حکمراناں دے کنہاں اُتے شاید جوں تیکر نہیں رینگی تے نہ ای ایہناں نوں ایہناں اُتے گزرن والے لمحات دا پوری طرح اندازہ ہوندا اے کیوں جے غریب دا درد صرف غریب سمجھ سکدا اے۔امیر لوک جیہڑے سونے دا چمچ منہ وچ لے کے پیدا ہوندے نیں۔ ایہناں نوں غریب تے مستوط طبقہ دیاں تکلیفاں، پریشانیاں دا اندازہ کدی نہیں ہو سکدا۔ یوٹیلٹی استوار وی عوام نوں سہولتاں فراہم کرن وچ بُری طرح ناکام ہو چکے نیں۔ ادھے اسٹورز اُتے اشیائے خورد و نوش موجود ای نہیں جتھے اُتے موجود اوتھے عوام دی پہنچ توں دور ہوندی جا رہی اے۔ ہجے رمضان المبارک آن توں پہلاں ای یوٹیلٹی اسٹوراں اُتے کجھ اشیائے ضروریہ دیاں قیمتاں اسمان نال گلاں کرن لگیاں نیں۔
ضلعی حکومت ولوں جاری کیتی جان والی پراسیس لسٹاں عوام لئی اک مذاق بن کے رہ گئی نیں۔دکانداراں لسٹاں دے مطابق عوام نوں شیائے ضروریہ دین توں انکاری نیں۔ سبزی ، گوشت، دالاں، گھیو، چینی، شکر ددھ، سرف ، صابن، کپڑے، دوائیاں، مٹھائی، آٹا، فرنیچر، کاپیاں، کتاباں، پٹرول، ڈیزل، مٹی دا تیل سنے کئی ضروری شیواں دے من مانے نرخ دکاندار وصول کر رہے نیں۔ حیرت والی گل اے کہ پنجاب دے ضلعیاں دی ضلعی انتظامیہ، متعلقہ ادارے عوام دی پریشانی توں آگاہ ہون دے باوجود اُتے سب چنگا دی رپورٹ کر کے خواب خرگوشی دے مزے لے رہے نیں جیہڑا کہ بوہت دکھ دی گل اے۔ انتظامیہ ناجائز منافع خوراں تے ذخیرہ اندوزاں دے خلاف ایکشن لین وچ بُری طرح ناکام ہو چکی اے۔ انتظامیہ دے اپنے قائم کردہ اکثر ماڈل بازاراں وچ شیواں صرف ناقص کوالٹی تے مہنگے داماں عوام نوں فراہم کیتیاں جا رہیاں نیں۔
دست صنعت آفریں کو مزد یوں ملتی رہی
اہل ثروت جیسے دیتے ھیں غریبوں کو زکوائی
اج کل تسیں اپنے آلے دوالے ویکھو تے شعبہ ہائے زندگی وچ مہنگائی دا طوفا ن وکھائی دیوے گا۔ گھریلو روزمرہ دیاں شیواں دی قیمتاں اسمان نال گلاں کر رہیاں نیں۔ یوٹیلٹی بلز عوام دی پہنچ توں دور نیں۔ علاج معالجہ دی بہترین سہولت توں عوام محروم نیں جد کہ دوائیاں دیاں قیمتاںدن بدن ایہناںدی پہنچ توں دور ہوندیاں جا رہیاں نیں۔ ایس مہنگائی دے جن نے عوام دا بھرکس کڈ دتا۔ اک تے مہنگائی تے دوجا ملاوٹ شدہ تے ناقص اشیائے خوردنوش دی بھرمار ،آئے دن تہاڈا الیکٹرانک و پرنٹ میڈیا اُتے انج دیاں خبراں نال واسطہ پیندا رہندا اےکہ جویں ددھ، لال مرچ، ہلدی، آئس کریم، کوکنگ آئل، گھیو، دیسی گھیو، گندے گٹراں تے نالیاں دے پانی نال کاشت شدہ فصلاں، ناقص و گھُن لگی کنک دا آٹا، گھٹیا دالاں، ناقص پٹرول، مٹی دا تیل، گلی محلیاں دے اندر ریڑھیاں، دکاناں، ڈھابیاں، ہوٹلاں اُتے وڈے دھڑھلے دے نال غیر معیاری، ناقص تے مضر صحت شیواں دی مہنگے دام فروخت اک المیہ توں گھٹ نہیں۔ ایس حوالے نال حکومتی ایواناں، محکمیاں، اداریاں دی چشم پوشی آخر کیہ گل کھلا رہی اے۔
ھم کو تو میسر نہیں مٹی کا دیا بھی
گھر پیر کا بجلی کے چراغوں سے روشن ھے
وطن عزیز دے سرکاری ہسپتالاں دا تے آوے دا آوہ ای وگڑیا ہویا اے۔ جتھے ایس غریب تے مستوط طبقے نال تعلق رکھن والی عوام دا کوئی پرسان حال نہیں۔ جتھے کوئی سفارش نہ رکھن یا پرچی وغیرہ یا نوٹاں دی چمک دے نہ ہون اُتے ایہناں نوں بُری طرح دھتکار دتا جاندا اے کیہ ایہناں دا جرم غریب ہونا اے۔ عوام لئی جنہاں سہولتاں دا دعویٰ کیتا جاندا اے اوتھے ایہناں نوں ایہناں سہولتاں دی فراہمی قطعاً نہیں دتی جاندی۔ دوائیاں دیاں قیمتاں نیں تے اسماناں نال گلاں کر رہیاں نیں۔ حکومتی ادارہ ڈریپ اکھاں بند کر کے چپ تماشائی بنیا ہویا اے۔ جس فارماسوٹیکل کمپنی دا جدوں دل چاہے دوائیاں دے ریٹ ودھا دیندے نیں۔
اُٹھو میری دنیا کے غریبوں کو جگا دو
کاخ امرا ٕ کے در و دیوار ہلا دو
اکثر فارما سیوٹیکل کمپنیاں نے ڈریپ دے وجود وچ آن توں ہن تیکر 200 فیصد توں 500 فیصد خود ساختہ وادھا کر دتا اے جیہڑا کہ غریب عوام دی کمر توڑن دے برابر اے۔ اکثر میڈیکل سٹور عوام نوں دونواں ہتھاں نال لٹ رہے نیں گلی محلیاں وچ موجود میڈیکل سٹوراں اُتے نان کوالیفائیڈ سٹاف عوام نوں اپنی پریکٹس یعنی عطائیت دی آڑ وچ مہنگے دام غیر معیاری دوائیاں ویچ رہے نیں۔ جنہاں دے خلاف محکمہ صحت، متعلقہ ادارے، پنجاب ہیلتھ کور کمیشن کسے وی قسم دی کاروائی کرن توں قاصر اے۔
ویلے دی موجودہ حکومت نال اپیل اے کہ اوہ عوام دیاں تکلیفاں، پریشاناں دا کوئی مداوا کرے تے عوام نوںآ پیش آئے مسلیاں دا کوئی پکا حل کرے تے عوام نوں صحت، تعلیم تے خوراک صحت مند تے سستی فراہم کرن۔ روٹی کپڑا تے مکان دے نعرے پہلے وی لگدے رہے پر اوہ وی صرف نعرے ای رہے۔ ہن موجودہ حکومت دے برسر اقتدار آن توں پہلاں دے کیتے گئے وعدے تے نعرے پتہ نہیں کیہ گل کھلان گے ایہناں دی تکمیل ہوئے گی یا فیر ایہہ وی اک خواب ہوئے گا کیوں جے ملک وچ ایسے ودھدی مہنگائی دی بدولت جرماں دی شرح وچ وادھا تے خود کشیاں ول رحجان ودھ رہیا اے۔
انداز بیاں گرچہ بہت شوخ نہیں ھے
شاید کہ اتر جائے ترے دل میں مری بات

اپنا تبصرہ گھلو