غزل

مجاہداقبال مجاہد

چپ کر جا نہ رو دلا اوہدی کوئی مجبوری ہوسی
کیتی نہیں جے یار وفا اوہدی کوئی مجبوری ہوسی
ویکھ کے تینوں ہس کے سوہنا آپ سلام بلائوندا سی
جے لئی اے اج نیویں پا اوہدی کوئی مجبوری ہوسی
تکدا سی نت تیریاں راہواں دھپاں پالے جر جر کے
گیا جے اج اوہ کنڈ ولا اوہدی کوئی مجبوری ہوسی
اج تک سے سنگھار سبھے اوس تیری خاطر کیتے سن
غیر دی لئی جے مہندی لا اوہدی کوئی مجبوری ہوسی
سنیا اے میں پیار محبت ناں دوجا قربانی دا
چھڈ دے گل توں مٹی پا اوہدی کوئی مجبوری ہوسی
کیہ ہویا جے موڑ دتے اوس تیرے چھاپاں چھلے نیں
غیر دی لئی جے مندری پا اوہدی کوئی مجبوری ہوسی
جھلیا دلا چھج وچ پا کے یاراں نوں نہیں چٹھی دا
نہ مجاہداؔ رولا پا اوہدی کوئی مجبوری ہوسی