نعت شریف

علی احمد گجراتی

پانی اتے تردا پھردا نوح دا بیڑا نعت پڑھے
اس اس دا ہے بخت کنارہ جہڑا جہڑا نعت پڑھے
وچ خیالاں طیبہ دے ول جاندے ہوئے رستے دا
ہُسڑے ہوئے من دا پاندھی کرے نبیڑا نعت پڑھے
ازلاں توں اک رِیجھ اے سائیاں میرے من وچ پلدی پئی
دل کبوتر روضے گردے لاوے گیڑا نعت پڑھے
جیون راہ تے ٹردا ٹردا جے کوئی تھک جاوے تے
لہہ جاوے گا اس دا جھٹ وچ سبھ تھکیڑا نعت پڑھے
جگ دولت تے شاہی لوکو ناز کریندے اوہدے تے
جد وی کدھرے میرے ورگا کوئی مریڑا نعت پڑھے
شافع محشر پاک نبیۖ نیں نعت وسیلہ بخشش دا
اِس نوں آکھو نور بشر دا چھڈ کے جھیڑا نعت پڑھے
پاک عمران پڑھی اے جسراں نعت محمدۖ عربی دی
آدم توں لے عیسیٰ تائیں اسراں کیہڑا نعت پڑھے
میری ذات دا گارا احمد گجھیا عشق بلالی نال
دھڑکن کردی آقاۖ آقاۖ دل دا ویڑھا نعت پڑھے