غزل

انور ندیم علوی

چپ چپیتے نال نظراں دے اشارا ہو گیا
نوٹ ویکھے فضل ربی دا سہارا ہو گیا
ویکھ کے نوٹاں نوں اوہ نہیں کم فٹا فٹ کر دتا
کامیابی کرکے حاصل‘ خوش اوہ سارا ہو گیا
کوٹ دے وچ نوٹ پائے سن کہ چھاپا پے گیا
ظلم ویکھو پہلے سودے وچ خسارا ہو گیا
جیب خالی کر کے اوہناں جیل ول جد ٹوریا
اوہدا حلیہ قابل عبرت نظارا ہو گیا
سارے سنگی پھیر کے منہ ٹر گئے اپنے گھریں
جاپدا سی دور کشتی توں کنارا ہو گیا
حصہ اُپر وی تے دینا سی سمجھ آئی ندیم
چار دن دی جیل ویکھی سب نتارا ہو گیا