چوپڑیاں تے دو دو

اک گل ہے ،ایس پوڈر ے وچ ضرور کج نہ کج ایجی چیز ہے جیڑی انسان نا باہوں ذہین بھڑا چھڑنی۔اسی وجہ نال ایجی ایجی اوپریاں گلاں انہاں پوڈریاں نیاں سننے چ آنیان جے چنگا بھلا سمجھ دار آدمی بھی حیران ہو وینا۔نالے ایجے ایجے کم کر وینے نے جیڑا نواں نرویا بھی نئیں کر سکنا ۔ہن ای مینڈے سنگی انہاں پوڈریاں نے لطیفے سنا سنا کے گائن۔۔اک پیا سنانا ہیا جے ویگنا وچ اک پوڈری بھی بیٹھا ہویا ہیا۔اک کالجی جاکت پچھنس توںجہاز کیجوں بن گیا ں۔پوڈریے جواب دتا کہ میں بننا تے پائیلٹ ہیا، برے کج زیادہ ہی پڑھ گیاں ،اس واسے جہاز بن گیاں واں ۔اک ہور سنگی سنانا پیا ہیا کہ شیدے پوڈری اس دیہاڑے ایجوں کیتا کباڑیے کول گیا۔اساں آکھنا :جلدی کر ،پچھے مینڈا ابا پیا آنا،دو سو روپیا دے تے ایہہ پانی نی موٹر چھپا کے رکھ گھن۔گھروں لاہ کے آندی اے۔وادھا گھاٹا وت کر گھنسا۔کباڑیے اس ویلے تے فٹو فٹ دو سو روپیا دے کے اس آں چھپا گھدا۔بعد وچ ویکھاس تے او دو اِٹاں ہیاں،جناں اتے وان ولیھٹا پیا ہیا ۔ہس ہس کے ٹڈھے چے کڑول کھل گئین۔او ویکھو کتنی وڈی عمر اس ۔او پیا آنا نے۔اس دیہاڑے حرامیے مینڈھے نال کیہ کیتا۔کالا شاہ رنگ۔اکھیاں پئی نوٹینیاس۔ہوٹھاں چے پپڑی جمی پئیس۔کھلیا کھلیاں دھکے پئے کھانا وے، برے لکڑ او چائی وائیس جس آں کوئی پہلوان بھی نئی چا سکنا۔پتا نئیں کساں ہتھ لائیاس۔مینڈے کول آ کھلوتا۔آکھنا:
لکڑ وکائو آ۔بالن واسطے چاہ گھن
اساں ناں بالن مکا پیا تے ہیا۔بے بے کئی وار آکھ رائی ہئی جے بالن کوئی نئیں۔میں سوچا چلو اس نال سودا مارنے آں۔
ای لکڑ کس پیو نی چا آندی آ۔گندیاں کماں توں ہتھ نہ کنڈیں۔میں اس آں اگوں ہو کے پیا ں جے لکڑ سستی مل ونجے
تداں کی وے،جس نی بھی اے ۔تدھ گھننی تے مکا ۔پیسے کڈ تے چاہ گھن ۔نئیں تے میں اگے وینا پیا وائیں۔اساں نے گاہک باہوں نی۔لگنا شیدے آں مینڈا انداز چنگا نئیں لگا،ایس واسطے باہوں اوکھا ہو کے جواب دتاس
کتنے نی ویچ سیں
ہزار روپے نی
ایویں پٹھاناں والا ریٹ نہ لا۔ویچنے نی گل کر
ہالا،پٹھاناں والا ریٹ اے تے نہ گھن،ویکھ ساںکوئی مویاں ناں مال ملا تے تینڈے واسطے گھن آن ساں۔شیدے نی ای گل سن کے لوک ہس پائین تے مانہہ غصہ آ گیا۔
تھوڑیاں گلاں کر اوئے۔چوری نا مال بھی ایجوں پیا ویچنا جیوں جاپان توں منگوایا ای۔ تدھ بھی تاں ایجا ریٹ لائیا وے جیوں میںلکڑ نئیں چھائی پیا ویچناں واں
ہالا چھوڑ یکیاں،دس کتنے نی دیسیں
تو بھرا ویں تینڈے نال سودے بازی نئیں ایں۔پنج سو چاہ دے
دوسو ()بانہوں نی۔
وت اوہا گل کرنا نا۔چل ترے سو ()دے تے لکڑ چا
ہالا ونج نا۔اساں نے گھار لکڑ سٹ آ ،تے وت آ کے اپنے پیسے چاہ گھن
یارا !تداں مینڈے تے اعتبار نئیں،اسی کوئی ٹھگ آں۔
نئیں نئیں ،پہلوں اساں نے گھار چھوڑ آ۔ تے وت آ۔تینڈا کوئی پتا نائیں
چلو ایجوں سئی۔جیجوں تینڈی مرضی
شیدے آں ٹور کے میں اپنی دکان تے آ بیٹھا واں۔مانہہ پتا اس ڈھل کوئی نئیں لانی۔چلو ،آ گیا تے بے بے آں فون کر کے پچھ گھن ساں ۔
(جاری اے)