پلیس دے طرز عمل توں ثابت ہویا ریاست نکام ہو گئی اے،لہور ہائی کورٹ

لہور (سٹی رپورٹر) احتساب عدالت لہور نے شہبازشریف تے حمزہ شہباز دے خلاف رمضان شوگر ملز ریفرنس وچ ایس پی ہیڈ کوارٹر دی عدالت وچ پیشی دے طریقے کا ر اتے شدید برہمی دا اظہارکردیاں ہویاں استفسار کیتا اے کہ تساں پہلاں کدی کسی عدالت وچ پیش ہوئے نیں؟کیہ تساں ایتھے کوئی جھگڑا کرن آئے اوہ جہڑیاں آستیناں ٹنگیاں نیں؟جہدے اتے ایس پی ہیڈ کوارٹر نے عدالت کولوں غیر مشروط معافی منگ لئی۔ احتساب عدالت لہور وچ شہبازشریف تے حمزہ شہباز دے خلاف رمضان شوگر ملز ریفرنس اتے سماعت ہوئی۔ عدالت نے استفسار کیتا کہ دسو پچھلی سماعت اتے ملزم نوں کیوں نہیں پیش کیتا گیا؟ جہدے اتے ایس پی ہیڈ کوارٹر نے موقف اختیار کیتا کہ ملزم نے بکتر بند گڈی ویکھی تے بیٹھن نوں انکار کردتا سی۔ ایس جواب اتے عدالت نے ریمارکس دتے کہ پلیس دے طرز عمل توں ثابت ہویا ریاست نکام ہو گئی اے۔مسلم لیگ ن دے رہنما تے پنجاب اسمبلی وچ قائد حزب اختلاف حمزہ شہباز نے عدالت نوں دسیا کہ میں 17 ماہ توں عدالت دے روبرو پیش ہو رہیا واں کدی انج دا واقعہ نہیں ہویا کہ میں انکار کیتا ہوئے۔ بکتر بند گڈی وچ جمپ اتے سر چھت دے نال لگدا اے۔ جس لئی میں انکار کیتا کہ دوجی گڈی کوئی آوے گی پر انج نہیں ہویا۔ بعدازاں عدالت نے رمضان شوگر ملز ریفرنس اتے سماعت 17 نومبرتیک ملتوی کردیاں ہویاں آئندہ سماعت اتے سارے افسران نوں دوبارہ طلب کرلیا۔