آئی جی سندھ واقعہ ،رینجرز تے آئی ایس آئی دے ذمہ دار افسراں نوں عہدیاں توں ہٹا دتا گیا

راولپنڈی: آئی ایس پی آر دے مطابق آئی جی سندھ دے تحفظات بارے فوج دی کورٹ آف انکوائری مکمل کر لئی گئی اے جہدے تحت رینجرز تے آئی ایس آئی دے ذمہ دار افسراں نوں عہدیاں توں ہٹا دتا گیا اے۔ پاک فوج دے شعبہ تعلقات عامہ (آئی ایس پی آر) دے مطابق مزار قائد بے حرمتی دے پس نظر وچ رونما ہون والے واقعہ تے آئی جی سندھ دے تحفظات دے حوالے نال فوج دی کورٹ آف انکوائری مکمل کر لئی گئی اے، واقعہ دی انکوائری آرمی چیف دے حکم تے کیتی گئی تے رپورٹ دے پس منظر وچ رینجرز تے سیکٹر ہیڈ کوارٹر آئی ایس آئی کراچی دے افسراں نوں ذمہ داریاں توں ہٹا دتا گیا اے۔

کورٹ آف انکوائری دی تحقیقات دے مطابق 18تے 19اکتوبر دی درمیانی شام پاکستان رینجرز سندھ تے سیکٹر ہیڈ کوارٹرز آئی ایس آئی کراچی دے افسران مزار قائد دی بے حرمتی دے نتیجے وچ شدید عوامی ردعمل توں پیدا شدہ صورتحال نال نبڑن وچ مصروف سن، پاکستان رینجرز تے سیکٹر ہیڈ کوارٹرز آئی ایس آئی کراچی دے افسراں تے مزار قائد دی بے حرمتی تے قنون دے مطابق ویلے سر کاروائی لئی عوام دا شدید دباء سی۔رپورٹ دے مطابق ایہناں افسراں نے شدید عوامی ردعمل تے تیزی نال بدلدی ہوئی کشیدہ صورتحال دے مدنظر سندھ پلس دے طرز عمل نوں اپنی دانست وچ ناکافی تے سست روی دا شکار پایا۔ ایس کشیدہ مگر پُراشتعال صورتحال تے قابو پاؤن لئی ایہناں افسراں نے اپنی حیثیت وچ جس قدر جذباتی ردعمل دا مظاہرہ کیتا، ذمہ دار تے تجربہ کار افسراں دے طور تے اوہناں نوں اجہی ناپسندیدہ صورتحال توں گریز کرنا چاہیدا سی، جہدے نال ریاست دے 2اداریاں وچ غلط فہمیاں پیدا ہوئیاں۔