پنجاب سرکار آزادی صحافت اتے مکمل یقین رکھدی اے ،فردو س عاشق

شیخوپورہ (بیورورپورٹ) صوبائی مشیر اطلاعات و نشریات ڈاکٹر فردوس عاشق اعوان نے آکھیا اے کہ پنجاب سرکار آزادی صحافت اتے مکمل یقین رکھدی اے ، آزاد صحافت ای آزاد قوم تے معاشرہ دی عکاس ہوندی اے۔ موجودہ سیاسی حالات وچ میڈیا نوں چاہیدا اے کہ اوہ حکومتی کارکردگی نوں وی عوام دے ساہمنے پیش کرن وچ بخل دے نال کم نہ لوے۔ فردوس عاشق ہوراں نے مزیدآکھیا اے کہ وزیر اعظم عمران خان نے ملک نوں مسائل دی دلدل تے بحراناں دے بھنور توں کڈن لئی جہڑا اپناانتھک کردار ادا کیتا اے میڈیا ایس نوں عوام ساہمنے پیش کرے۔ سرکار علاقائی پترکاراں دے مسائل دے حل لئی وی اقدامات چک رہی اے۔ ایہناں خیالات دا اظہار اوہناں نے پی ایف یو جے دے مرکزی جنرل سیکرٹری رانا محمد عظیم دی سربراہی وچ ملن والے پریس کلب شیخوپورہ دے وفددے نال گل بات کردیاں ہویاں کیتا۔ صوبائی مشیر ڈاکٹر فردوس عاشق اعوان نے پریس کلب شیخوپورہ آن دی دعوت قبول کر لئی۔ فردوس عاشق نے مزیدآکھیا اے کہ جمہوریت دی بحالی لئی میڈیا دا کردار بوہت اہم اے جس نوں کسی صورت نظراندازنہیں کیتا جا سکدا۔