وکیلاں دے خلاف 302دا مقدمہ درج کراواں گے، وزیر صحت پنجاب یاسمین راشد

لہور: صوبائی وزیر صحت یاسمین راشد نے واضح موقف اختیار کردیاں آکھیا اے دل دے ہسپتال وچ توڑ بھن، ہنگامہ آرائی تے ڈاکٹراں نوں تشدد دا نشانہ بنان والے وکیلاں دے خلاف 302دا مقدمہ درج کراواں گے۔

میڈیا نال گل کردیاں یاسمین راشد آکھیا وکیلاں ولوں ہسپتال وچ توڑ بھن کیتی گئی۔ پنجاب حکومت ڈاکٹراں دا ساتھ دیوے گی۔

کسے نوں وی امن و امان خراب کرن دی اجازت نہیں دے سکدے۔ ملزماں نوں کیفر کردار تک اپڑایا جاوے گا۔

یاد رہوے ایس توں پہلاں یاسمین راشد ہسپتال اپڑیاں تے اوتھے احتجاج دے دوران ینگ ڈاکٹرز تے گرینڈ ہیلتھ الائنس نے اوہناں دا گھیراؤ کرکے اوہناں دے خلاف شدید نعرہ بازی کیتی۔ احتجاج کرن والیاں نے اوہناں دے استعفے دا مطالبہ کیتا جہدے بعد وزیر صحت اوتھوں چلی گئیاں۔