پی آئی سی حملہ، وکیلاں دی عدالت وچ پیشی، جوڈیشل ریمانڈ تے جیل گھل دتا گیا

لہور: پنجاب انسٹی ٹیوٹ آف کارڈیالوجی تے حملے وچ ملوث وکیلاں نوں انسداد دہشت گردی عدالت نے جوڈیشل ریمانڈ تے جیل گھل دتا اے۔ پی آئی سی حملے وچ ملوث 20توں ودھ ملزمان وکیلاں نوں ایڈمن جج عبدالقیوم خان دے ساہمنے پیش کیتا گیا۔

ایس موقع تے تفتیشی افسر نے اوہناں دے 14دن دے جسمانی ریمانڈ دی استدعا کیتی۔ ملزمان وکیلاں نوں شادمان وچ درج 2ایف آئی آر وچ عدالت وچ پیش کیتا گیا۔ ملزماں ولوں غلام مرتضیٰ چودھری سینئر وائس پریذیڈنٹ سپریم کورٹ بار، ایڈوکیٹ صغراں گلزار، ایڈووکیٹ نوسین عمبر تے ایڈوکیٹ طاہر منہاس عدالت وچ پیش ہوئے۔ اودھر لہور ہائی کورٹ پی آئی سی وچ ہنگامہ آرائی کرن والے وکیلاں دی گرفتاری دے خلاف درخواست سماعت لئی مقرر کر دتی گئی ا ے۔ جسٹس انور الحق پنوں جمعے نوں درخواست تے سماعت کرن گے۔

دوجے پاسے وکیلاں دے حملے دے بعد دی صورتحال دے پیش نظر پنجاب انسٹی ٹیوٹ آف کارڈیالوجی وچ رینجرز تعینات کر دتی گئی اے۔

رینجرز دے اہلکاراں نے پی آئی سی دا چارج سنبھال لیا اے۔ پی آئی سی دی عمارتاں دے باہر رینجرزاہلکاراں نے ڈیوٹیاں دینی شروع کروع کردتیاں نیں۔