پی آئی سی واقعہ دے خلاف ہنگامہ آرائی، سیکرٹری اسلام آباد ہائی کورٹ دا لائسنس معطل

اسلام آباد: اسلام آباد ہائی کورٹ نے پی آئی سی واقعہ دے خلاف ہنگامہ آرائی تے نوٹس لیندیاں وکیلاں نوں زبردستی عدالت توں کڈھن تے سیکرٹری بار دا لائسنس معطل کر دتا۔ تفصیل دے مطابق اسلام آباد ہائی کورٹ نے لہور واقعہ دے خلاف وکیلاں نوں زبردستی ہڑتال تے مجبور کردیاں اوہناں نوں دوران سماعت عدالتاں توں باہر کڈھن تے عدالتی کاروائی وچ رکاوٹ بنن تے سیکرٹری ہائی کورٹ بار محمد عمیر بلوچ نوں توہین عدالت دا شوکاز نوٹس کر دتا اے۔

عدالت نے 19دسمبر نوں اگلی سماعت تک سیکرٹری بار دا ہائی کورٹ وچ پریکٹس لئی وکالت دا لائسنس وی معطل کر دتا اے۔ اسلام آباد ہائی کورٹ دے چیف جسٹس نے سیکرٹری اسلام آباد ہائی کورٹ بار ولوں عدالتی کاروائی وچ مداخلت تے غیر پیشہ وارانہ رویے دے اظہار تے توہین عدالت دا شوکاز نوٹس جاری کردیاں وکالت دا لائسنس معطل کیتا گیا۔

عدالت نے 3صفحیاں تے مشتمل تحریری حکم نامے وچ آکھیا اے سیکرٹری بار نے دوران سماعت وکیلاں نوں عدالت توں کڈھن تے مجبور کیتا۔ اوہناں نوں عدالتی وقار دا خیال رکھدیاں ہوئیاں سماعت وچ مداخلت توں باز رہن دی ہدایت کیتی گئی۔عمیر بلوچ روسٹرم تے آئے تے اجہے لہجے وچ گل کیتی جہڑا کسے وکیل دا نہیں ہو سکدا۔ عمیر بلوچ آکھیا ججاں نوں ایہناں نوں ہڑتال توں روکن دے بجائے ایہدی حوصلہ افزائی کرنی چاہیدی اے۔