لہور سنے وکھو وکھ شہراں وچ بارش، سردی دی شدت وچ وادھا

لہور: لہور، فیصل آباد، گوجرانوالہ تے پاکپتن سنے وکھو وکھ شہراں وچ بارش نال سردی دی شدت وچ وادھا ہو گیا اے۔

محکمہ موسمیات نے 24گھنٹیاں وچ بارش دی پیش گوئی کر دتی اے۔ لہور تے ایہدے آلے دوالے پچھلی رات توں بارش تے رم جھم دا سلسلہ جاری رہیا جہدے نال موسم تے ٹھنڈیا ہویا ای پر لیسکو دا ترسیلی نظام شدید متاثر ہویا۔

بارش دی وجہ توں لیسکو دے 160توں ودھ فیڈرز ٹرپ کر گئے۔ فیڈر ٹرپ کرن نال شہر دے کئی علاقیاں وچ بجلی بند ہو گئی جہدے نال شہریاں نوں شدید پریشانی دا ساہمنا رہیا۔ راوی روڈ، بادامی باغ، مصری شاہ، شاد باغ، گلشن راوی، سمن آباد، چوبرجی، نواں کوٹ، شاہدرہ، ایبٹ روڈ تے شملہ پہاڑی دے کئی علاقیاں وچ بجلی بند رہی۔اودھر فیصل آباد سنے آلے دوالے دے علاقیاں وچ تیز بارش نال سردی دی شدت وچ وادھا ہو گیا ا ے۔

محکمہ موسمیات دے مطابق ودھ توں ودھ درجہ حرارت 15تے گھٹ توں گھٹ 8ڈگری سینٹی گریڈ ریکارڈ کیتا گیا اے۔ ہوا وچ نمی دا تناسب 75فیصد ریکارڈ ہویا۔