پشاور ہائیکورٹ، پختونخوا حکومت نوں ڈاکٹراں دے مسئلے حل کرن دی ہدایت

پشاور: پشاور ہائی کورٹ نے خیبر پختونخوا حکومت نوں ڈاکٹراں دے مسئلے حل کرن دی ہدایت کر دتی۔

پشاور ہائی کورٹ وچ ڈاکٹراں بارے کیس دی سنوائی وچ عدالت نے صوبائی حکومت نوں ڈاکٹراں دے مسئلے حل کرن دی ہدایت جاری کیتی۔ جسٹس قیصر رشید دا ریمارکس وچ کہنا سی ڈاکٹر صبح توں شام تک عدالت وچ بیٹھے ہوندے نیں، حکومت مسئلے کیوں حل نہیں کردی۔ جسٹس قیصر رشید آکھیا حکومت نوں پتہ اے ہسپتالاں وچ کیہ ہو رہیا اے، ڈاکٹراں دے مسئلے حل کرنا حکومت دی ذمہ داری اے، حکومت دا صحت ایجنڈا کیہ اے تسیں ایہدے توں واقف او۔

ایڈوکیٹ جنرل نے عدالت نوں دسیا ڈاکٹر ہسپتال دی بجائے بغیر چھٹی دے ایتھے آکے دن گزاردے نیں، اجہے ڈاکٹراں دے خلاف حکومت ایکشن لوے گی۔ جسٹس قیصر آکھیا تسیں ایکشن لینا چاہندے او تے اوتھے لو، ڈاکٹر عدالت وچ سائلین بن کے آندے نیں، عدالت توں نہیں کڈھ سکدے، سارے ڈاکٹراں دے مسئلے حل کرو تاں جے اوہ ہسپتال وچ کم کرن، مسئلے حل کرنا حکومت دی ذمہ داری اے۔