لہور پولیو توں پاک ہوگیا

لہور( پنجابی میڈیا گروپ)لہور پولیو توں پاک ہوگیا، ماحولیاتی نمونے نیگیٹو آگئے۔ ایس مہینے وچ پولیو دے سارے ماحولیاتی نمونہ جات نیگیٹو آئے۔
ماحولیاتی نمونہ جات دا نیگٹو ہونا پولیو مہم دی اک وڈی کامیابی دی طرف اشارہ اے۔ پچھلے کئی سالاں توں پولیو دے ماحولیاتی نمونے مثبت آ رہے سن۔ شہر دیاں پنج ڈریناں ملتان روڈ،گلشن راوی،آوٹ فال روڈ ایف،جی اور ایچ دے پولیو نمونے لئی گئے۔ چار مہیناں دے دورانیہ وچ پولیو دے سارے ماحولیاتی نمونے نیگٹو آئے ہیں۔
ڈی سی لہور مدثر ریاض دا کہنا سی کہ شہریاں لئی ایہ اک بوہت وڈی خوشخبری اے، لہور شہر نوں پولیو توں پاک برقرار رکھنا اے، شہریاں توں اپیل اے کہ پولیو ورکرز ٹیماں نال تعاون نوں یقینی بنایا جائے۔ ڈی سی لہور نے سارے انتظامیہ، ڈاکٹراں تے پولیو ورکراں نوں پولیو دے ماحولیاتی نمونہ جات نیگٹو آن اُتے مبارکباد دتی تے آکھیا کہ اسیں آئندہ وی پولیو مہم نوں ایسی طرح ایمانداری نال جاری رکھاں گے۔