نیب قنون وچ ترمیم ایگزیکٹو معاملہ اے عدالت مداخلت نہیں کرسکدی، جسٹس منصور

اسلام آباد(پنجابی میڈیا گروپ)نیب ترمیم کیس وچ جسٹس منصور علی شاہ دا اختلافی نوٹ جاری کر دتا گیا جس وچ جسٹس منصور نے لکھیا اے کہ نیب قنون وچ کیتی گئی ترمیم خالصتا ایگزیکٹو معاملہ اے لہذا عدالت مداخلت نہیں کرسکدی۔27ویں صفحے اتے اختلافی نوٹ وچ جسٹس منصور علی شاہ نے لکھیا کہ عدلیہ قنون سازی دا ایس ویلے جائزہ لے سکدی اے جد اوہ بنیادی انسانی حقوق نال متصادم ہوئے لیکن قنون سازاں دے مفاد نوں سامنے رکھ کے قنون سازی جانچنا پارلیمنٹ تے جمہوریت نوں نیچا وکھان دے مترادف اے۔اختلافی نوٹ وچ جسٹس منصور نے لکھیا کہ ہر ادارے نوں دوجے دا احترام کرنا چاہیدا اے، جمہوریت دی بقا لئی باہمی برداشت تے تحمل لازم اے۔ جسٹس منصور نے لکھیا کہ عوامی ووٹاں نال منتخب پارلیمنٹ نے نیب قنون وچ ترمیم کیتی، چیئرمین پی ٹی آئی نے نیب ترمیم دی مخالفت یا حمایت دی بجائے اوس نوں عدالت وچ چیلنج کردتا۔اختلافی نوٹ وچ جسٹس منصور نے لکھیا کہ سابق چیف جسٹس عمر عطا بندیال تے جسٹس اعجاز الاحسن دے نیب ترمیم کالعدم قرار دین دے فیصلے توں متفق نہیں کیونکہ نیب ترمیم نال بنیادی حقوق متاثر نہیں ہوئے تے اکثریتی فیصلہ پبلک سرونٹ دی درست تعریف کرن وچ نکام رہیا، تعزیرات پاکستان تحت وی پبلک آفس ہولڈر دے خلاف کارروائی ممکن اے کیونکہ تعزیرات پاکستان تحت پبلک آفس ہولڈر پبلک سرونٹ نیں۔اختلافی نوٹ وچ اونہاں نے لکھیا کہ ممبر پارلیمنٹ خلاف ٹیکس چوری، منی لانڈرنگ، کرپشن یا غیر قنونی طریقے سے دولت بنان اتے ٹیکس قنون، انسداد منی لانڈرنگ ایکٹ تے تعزیرات پاکستان تحت کارروائی ہوسکدی اے۔ نیب کِنی کرپشن اتے کارروائی کر سکدا اے ایہ معاملہ پالیسی میٹر اے، کِنی کرپشن اتے نیب کارروائی کرے ایہ تعین کرنا پارلیمنٹ دا کم اے عدلیہ دانہیں۔