شیخ رشید نوں وڈھا ریلیف،لال حویلی سیل کرن دا فیصلہ کالعدم قرار

لہور(پنجابی میڈیا گروپ)لہور ہائی کورٹ راولپنڈی بینچ نے سابق وزیر داخلہ شیخ رشید احمد دی لال حویلی سیل کرن دا فیصلہ کالعدم قرار دے دتا۔ہائی کورٹ دے جج جسٹس مرزا وقاص رئوف نے فیصلہ سنایا۔ لال حویلی دیاں دونوں ملکیتی رجسٹریاں منسوخ کرن دا فیصلہ وی کالعدم قرار دتا گیا۔ہائیکورٹ نے حکم دتا کہ لال حویلی فوری ڈی سیل کیتی جائے، لال حویلی بابت محکمہ ریفرنس چیئرمین از سر نو سماعت کرے گا۔عدالت دے باہر میڈیا نال گل بات وچ شیخ رشید نے آکھیا کہ لال حویلی ساڈھی ملکیت اے، اسیں نسلی تے اصلی ہاں۔ سب اللہ اتے چھڈ دے ہاں۔ پاک فوج ساڈھی عظیم فوج اے، جنرل عاصم منیر نے معشیت درست کردتی۔ جنرل عاصم منیر تے جنرل ندیم ملک لئی کم کر رہے نیں۔شیخ رشید دا کہنا سی کہ 9 مئی اک لعنتی پروگرام سی، کل وی فوج دے نال ساں تے اج وی فوج دے نال ہاں۔ میرے توں کوئی غلطی ہوئی معافی منگدا ہاں۔واضح رہے کہ لال حویلی شیخ رشید احمد دی36 ورھیاں توں سیاسی بیٹھک اے۔