اسرائیل دی غزہ وچ زمینی حملے،ہور40شہادتاں

غزہ(پنجابی میڈیا گروپ)اسرائیل نے غزہ اتے رات بھر بمباری کیتی جس وچ شمالی علاقے اندر القدس اسپتال تے انڈونیشیا دے اک اسپتال نوں نشانہ بنایا گیا جد کہ مشرقی علاقے وچ ترکیہ دے اک اسپتال تے جنوبی علاقے وچ اک یورپی اسپتال اتے وی بمباری کیتی۔عالمی خبر رساں ادارے مطابق رات بھر بمباری بعد صبح اسرائیل دی بری فوج نے غزہ وچ داخل ہون دی کوشش کیتی تے اک اسرائیلی یرغمالی خاتون فوجی اہلکار نوں بازیاب کران دا دعوی کیتا۔دوجے پاسے حماس نے ایس دعوے نوں مسترد کردیاں ہویاں دسیا کہ فوجی خاتون اہلکار اجے وی یرغمال اے البتہ اسرائیلی فوجیاں نے اک بزرگ شخص نوں گولی مار کے قتل کردتا۔حماس نے اک ویڈیو وی جاری کیتی جس وچ3 اسرائیلی یرغمالی عورتاں نوںوکھایا گیا اے جد کہ حماس87 تے 85سالہ اسرائیلی عورتاں نوں پہلاں ہی رہا کر چکیا اے جنہاں نے رہائی بعد میڈیا نال گل بات وچ حماس دے حسن سلوک دی تعریف کیتی سی۔غزہ وچ رات بھر ہون والی بمباری اندر ہور40فلسطینی شہید ہوگئے ایس طرح غزہ وچ شہید ہون والیاں دی تعداد8ہزار 50ہوگئی جد کہ21ہزار توں ودھ زخمی نیں۔غزہ وچ جنگ بندی لئی امریکی وزیر خارجہ انٹونی بلنکن نے قطر دے امیر حمد بن تمیم آل ثانی سے ٹیلی فوناتے گل بات کیتی جیہڑی اسرائیل تے حماس دے وچکار امن مذاکرات اندر ثالثی دا کردار ادا کر رہے نیں۔لیکن اسرائیلی وزیراعظم نیتن یاہو نے غزہ وچ جنگ بندی دے امکان نوں مکمل طور مسترد کردیاں ہویاں آکھیا کہ اگر ایسا کیتا گیا تے ایس دا مطلب حماس نوں ہور مضبوط کرنا ہوئیے گا۔