غیرقنونی وسن والیاں خلاف کریک ڈان شروع

اسلام آباد(پنجابی میڈیا گروپ)حکومت ولوں غیر قنونی وسن والیاں نوں پاکستان چھڈن دی مہلت آج ختم ہو گئی، جس دے بعد سارے غیرقنونی وسن والیاں خلاف کریک ڈان شروع ہوگیا ۔ پاکستان وچ غیر قنونی موجود غیر ملکیاں خلاف گرینڈ آپریشن دیاں تیاریاں مکمل ہوگئیاں ، ہن تک 1لکھ4 ہزار 481 افغانی واپس جا چکے نیں۔وزارت داخلہ ولوں صوبیاں نوں غیر قنونی طور اتے وسن والیاں دی بے دخلی دا حکم جاری کردتا گیا اے ، معمولی جرائم وچ زیر تفتیش تے سزا یافتہ غیرقنونی وسن والیاں نوں بے دخل کردتا جائے گا۔حکم مطابق کوئی پاکستانی غیرقنونی تارکین وطن نوں پناہ دین وچ ملوث ہویا تے قنونی کارروائی ہوئے گی، بے دخلی دے منصوبے دا اطلاق پاکستان وچ غیر قنونی طور اتے وسن والے ساریاں غیر ملکیاں اتے ہوئے گا، منصوبے دے اطلاق وچ کسی وی ملک یا شہریت نوں ملحوظ خاطر نہیں رکھیا جائے گا۔.سندھ وچ وسدے2لکھ غیر قنونی تارکین وطن دی نشاندہی دا عمل مکمل کیتا جا چکیا اے، ایسی طرح خیبرپختونخوا وچ وسدھے3 لکھ غیر قنونی طور اتے وسدے افغان شہریاں وچوں رضاکارانہ طور اتے واپس نہ جان والیاں نوں ہولڈنگ سنٹراں وچ منتقل کیتا جائے گا۔پنجاب تے بلوچستان وچ وی غیر قنونی طور اتے وسدے افغان باشندیاں دی بے دخلی لئی آپریشن شروع کردتا گیا اے تے اونہاں دا ڈیٹا سکیننگ ذریعے چیک کیتا جا رہیا اے۔مہلت ختم ہون بعد ملک دے مختلف شہراں توںغیر قنونی تارکین وطن نوں حراست وچ لے لئیا گیا اے جدکہ ہور آپریشن جاری اے۔