جاننا چاہندے ہاں فیض آباد دھرنے دا اصل ماسٹر مائنڈ کون سی،چیف جسٹس

اسلام آباد(پنجابی میڈیا گروپ)فیض آباد دھرنا نظر ثانی کیس دی سماعت دوران چیف جسٹس نے ریمارکس دتے نیں کہ اسیںجاننا چاہندے ہاں دھرنے دااصل ماسٹر مائنڈ کون سی ۔سپریم کورٹ فیض آباد دھرنا نظر ثانی کیس دی سماعت چیف جسٹس قاضی فائز عیسی دی سربراہی وچ 3رکنی بینچ کر رہیا اے، چیئرمین پیمرا، اٹارنی جنرل بیرسٹر منصور اعوان تے ہور وکیل عدالت وچ پیش ہوئے، چیف جسٹس نے اٹارنی جنرل نوں پچھلی سماعت دا حکمنامہ پڑھن دی ہدایت کیتی۔پچھلی سماعت دا حکم نامہ سنن دے بعد چیف جسٹس نے آکھیا کہ ابصار عالم نے وزارت دفاع دے ملازماں اتے سنجیدہ الزام لائے نیں، کیا اجے وی تسی نظرثانی درخواستاں واپس لینا چاہندے او؟ایس اتے اٹارنی جنرل نے آکھیا کہ اک فیکٹ فائنڈنگ کمیٹی تشکیل دتی جا چکی اے۔چیف جسٹس نے اٹارنی جنرل نال مکالمہ کردیاں ہویاں آکھیا کہ اگر ابصار عالم دے الزام درست نیں تے ایہ معاملہ تہاڈے بارے اے، فیکٹ فائنڈنگ کمیٹی کدوں قائم ہوئی اے؟ اٹارنی جنرل نے دسیا کہ کمیٹی19اکتوبرنوں قائم کیتی گئی جس دے نال ہی اٹارنی جنرل نے فیکٹ فائنڈنگ کمیٹی دی تشکیل دا نوٹیفکیشن پڑھ دتا۔چیف جسٹس نے استفسار کیتا کہ کمیٹی اپنی رپورٹ کس نوں پیش کرے گی؟، اٹارنی جنرل نے آکھیا کہ کمیٹی اپنی رپورٹ وزارت دفاع نوں پیش کرے گی، رپورٹ فیر سپریم کورٹ سامنے پیش کیتی جائے گی۔چیف جسٹس نے ابصار عالم نوںروسٹرم اتے سدھ لیا تے آکھیا کہ تسی بیان حلفی وچ کجھ ہور گل لکھی، متفرق درخواست وچ کجھ ہور کہہ رہے نیں، تسی کجھ میڈیا وچ موجود عناصر دی گل کیتی، میڈیا اندر کجھ ایسے عناصر سن تے اوہ تہاڈے ماتحت سن، کیا تہاڈے میڈیا اندروں وی اٹیک ہو رہیا سی۔ایس اتے ابصار عالم نے آکھیا کہ میڈیا اندروں وی تے باہروں وی حملہ ہو رہیا سی، کیبل آپریٹراں کول وی انٹیلی جنس اداریاں دے لوگ جاندے سن۔ابصار عالم نے دسیا کہ اسیں اک دھمکی آمیز کال ٹیپ کیتی جیہڑی وزیر اعظم تے آرمی چیف نوں بھیجی گئی،چیف جسٹس نے آکھیا کہ ابصار عالم تہاڈی تعیناتی خلاف انٹرا کورٹ اپیل خارج ہوئی، اجے سٹاف نے دسیا کہ سپریم کورٹ توں عدم پیروی اتے تہاڈی درخواست خارج ہوئی سی، تسی فیصلیاں دا حوالہ نہ دیندے تے چنگا ہندا، تسی کہہ دتا تسی کمیشن سامنے پیش ہووگے کافی اے۔