پنجاب وچ سموگ ایمرجنسی نافذ، طالبعلماں لئی ماسک لازمی قرار

لہور(پنجابی میڈیا گروپ)انسداد سموگ اقدام، وزیر اعلی پنجاب محسن نقوی دی زیر صدارت کئی گھنٹے لمبا اجلاس، حکومت تے ماہرین سر جوڑ کر بیٹھ گئے۔ماہرین محولیات نے سموگ بارے اجلاس وچ بریفنگ دتی کہ سکولاں وچ چھٹی تے ٹرانسپورٹ بند کرن نال فرق نہیں پئے گا، جس اتے پنجاب بھر وچ سموگ ایمرجنسی نافذ کردیاں ہویاں 1مہینے لئی ساریاں سرکاری و نجی سکولاں وچ طلبا و طالبات لئی ماسک لازمی قرار دے دتا گیا۔نگران وزیر اعلی محسن نقوی نے آکھیا کہ طلبا و طالبات دی صحت لئی ماسک لازمی قرار دتا گیا اے، عوام توں وی اپیل اے کہ اوہ ماسک دا استعمال کرن، اونہاں نے صوبائی وزیراں لو کل تے سرکاری و نجی سکولاںدے وزٹ کرن دی ہدایت کر دتی۔محسن نقوی نے آکھیا کہ گھراں دی تعمیر دوران مٹی، ریت تے ملبہ اتے پانی دا چھڑکا نہ کرن والیاں خلاف کارروائی ہوئے گی، وزیر اعلی نے ایس ضمن وچ کمشنر لہور ڈویژن، محکمہ بلدیات تے لہور ویسٹ مینجمنٹ کمپنی نوں ہدایت جاری کر دتی، اونہاں نے سموگ دے دوران کاشتکاراں خلاف چالان واپس لین دا حکم دے دتا۔وزیر اعلی پنجاب نے ایس ضمن وچ ایڈیشنل چیف سیکرٹری داخلہ نوں ہدایت جاری کر دتی، اونہاں نے آکھیا کہ کاشتکار بھائی فصلاں دی باقیات نہ ساڑن بلکہ اونہاں نوں مناسب طریقے نال ضائع کیا جائے۔صوبائی وزیراں، ایس ایم تنویر، ڈاکٹر جاوید اکرم، عامر میر، منصور قادر، ابراہیم مراد، انسپکٹر جنرل پولیس، ایڈیشنل چیف سیکرٹری داخلہ، سیکرٹریز، زراعت، صحت، ٹرانسپورٹ، محولیات، لوکل گورنمنٹ، سکول ایجوکیشن، انڈسٹریز، چیئرمین پی آئی ٹی بی، کمشنر لہور، ڈی جی پی ڈی ایم اے، ڈی جی پی ایچ اے، ڈپٹی کمشنر، سی ٹی او لہور، سی ای او ایل ڈبلیو ایم سی تے متعلقہ محکمیاں دے سربراہواں نے اجلاس وچ رلت کیتی۔