اسرائیل دی شدید بمباری ، غزہ دا پوری دنیا نال منقطع

غزہ (پنجابی میڈیا گروپ)غزہ دی پٹی اتے مسلسل 26ویں دن وی اسرائیل دی بمباری جاری اے، شدید فضائی حملے تے توپ خانے توں شیلنگ بعد علاقے وچ مواصلاتی نظام مکمل طوراتے منجمد اے تے غزہ دا ہور دنیا نال رابطہ مکمل طوراتے منقطع ہوگیا اے ۔عرب میڈیا مطابق تازہ بمباری غزہ اتے اسرائیلی جارحیت دی ہن تک دی شدید ترین کارروائی اے ، اسرائیلی فوج نے غزہ دے ساحلی شہراتے 5 محاذاں توں حملہ کیتا، شمالی غزہ دی پٹی وچ بیت حانون کراسنگ اتے اسرائیلی فوج تے فلسطینی دھڑیاں دے وچکار پرتشدد جھڑپاں وی ہویاں۔اوس دے علاوہ اسرائیلی فوج نے شمالی غزہ وچ اپنی دراندازی دے علاقیاں وچ لائٹنگ بم برسائے، عرب نامہ نگار نے دسیا کہ اسرائیلی فوج خان یونس دے مشرق وچ عبسان قصبے ول جان دی کوشش کر رہی اے۔عرب میڈیا داکہنا اے کہ غزہ دے شمال مغرب وچ کراما دے علاقے وچ وی پرتشدد جھڑپاں ہویاں، جدکہ پٹی دے جنوب مشرق وچ الزیتون محلے وچ پرتشدد اسرائیلی بمباری ویکھن وچ آئی۔ایس تے بعد فلسطینی وزارت مواصلات نے غزہ دی پٹی دے نال سارے مواصلاتی تے انٹرنیٹ سروسز نوں مکمل طوراتے بند ہون دی تصدیق کیتی اے۔واضح رہے کہ حماس ولوں 7 اکتوبر نوں اسرائیل اتے اک غیر معمولی حملہ کیتا گیا سی، اسرائیل نے حماس خلاف جوابی کارروائی کردیاں ہویاں مسلسل بمباری جاری رکھی ہوئی اے غزہ اتے اسرائیل دی وحشیانہ بمباری دے نتیجے وچ ہن تک9ہزار توں ودھ فلسطینی شہید ہوچکے نیں۔