بجلی55پیسے فی یونٹ مہنگی کرن دی نیپرا وچ سماعت

اسلام آباد(پنجابی میڈیا گروپ)بجلی55پیسے فی یونٹ مہنگی کرن دی سی پی پی اے دی درخواست اتے نیپرا نے سماعت بعد فیصلہ محفوظ کرلیا۔میڈیا دے مطابق سی پی پی اے ولوں بجلی55پیسے فی یونٹ تک ہور مہنگی کرن دی درخواست دتی گئی جس دی اج نیپرا ہیڈ کوارٹر وچ سماعت شروع ہوگئی۔ چیئرمین نیپرا وسیم مختار نے سماعت کیتی۔سی پی پی اے نے ماہانہ فیول پرائس ایڈجسٹمنٹ دی مد وچ ودھا دی درخواست دائر کیتی اے تے سرکاری ڈسکوز لئی بجلی دیاں قیمتاں وچ 55 پیسے فی یونٹ ودھا منگیا اے۔ منظوری دی صورت وچ صارفین اتے اک مہینے لئی8ارب37کروڑ دا ودھ بوجھ پئے گا۔سی پی پی اے نے درخواست وچ آکھیا اے کہ ماہ ستمبر وچ12ارب92کروڑ یونٹ بجلی دی فروخت ہوئی، ہائیڈل توں بجلی دی پیداوار 37.55 فیصد رہی، ستمبر وچ آر ایل این جی توں بجلی دی پیداوار15.95فیصد ہوئی تے ماہ ستمبر وچ فرنس آئل توں بجلی دی پیداوار 1.80 فیصد رہی، بجلی دے ریٹ ودھائے جان۔بعدوچ نیپرا نے سماعت مکمل کردیاں ہویاں بجلی مہنگی کرن دی سی پی پی اے دی درخواست اتے فیصلہ محفوظ کر لیا۔ اتھارٹی دا کہنا اے کہ نیپرا اعداد و شمار داجائزہ لین بعد حتمی فیصلہ جاری کرے گی۔