کسی ایجنسی نوں شہریاں دے فون ٹیپ دی اجازت نہیں دتی، وفاقی حکومت

اسلام آباد(پنجابی میڈیا گروپ)اسلام آباد ہائیکورٹ نے آڈیو لیکس خلاف کیس دی سماعت دا تحریری حکم نامہ جاری کردتا۔وفاقی حکومت نے عدالت نوں آگاہ کر دتا کہ کسی ایجنسی نوں شہریاں دے فون ٹیپ تے ریکارڈنگ دی اجازت نہیں د تی ۔جسٹس بابر ستار نے سابق چیف جسٹس ثاقب نثار دے پتر تے بشری بی بی دی درخواست اتے تحریری حکم جاری کیتا جس دے مطابق عدالت نے پچھیا کہ شہریاں دی الیکٹرانک سرویلنس تے کالاں ریکارڈنگ دی صلاحیت کس ادارے کول اے ؟ اٹارنی جنرل نے آکھیا اوہ وزیراعظم تے وفاقی کابینہ اوس بارے مشاورت کراں گے، جس دے بعد رپورٹ عدالت وچ جمع کران گے۔حکم نامے مطابق وزیراعظم دے سیکرٹری، سیکرٹری دفاع وداخلہ تے چیرمین پی ٹی اے نے اپنا جواب جمع کرایا۔ حکومت دے جواب مطابق کسی ایجنسی نوں شہریاں دے فون ٹیپنگ تے ریکارڈنگ دی اجازت نہیں دتی تے شہریاں دے فون ٹیپ یا سرویلینس لئی جج توں وارنٹ لیا جا سکدا اے۔ہائی کورٹ نے حکم دتا کہ وزیراعظم دے پرنسپل سیکرٹری آئندہ سماعت اتے تحریری رپورٹ عدالت وچ جمع کران، وزیراعظم آفس دسے فون ٹیپنگ دی اجازت دتی گئی؟ کسی نوں اختیار دتا گیا یا وارنٹ حاصل کیتے گئے؟ وفاقی حکومت ولوں اگر اینج دا کوئی اقدام کیتا گیا تے تفصیل جمع کران۔