فیض آباد دھرنا فیصلے اُتے عمل ہوجانداتے9مئی دا واقع نہ ہُندا،چیف جسٹس

اسلام آباد(بیورورپورٹ)چیف جسٹس قاضی فائز عیسی نے فیض آباد دھرنا نظرثانی کیس وچ انکوائری کمیشن دی رپورٹ اُتے غصہ ظاہر کیتا تے ریمارکس دتے کہ فیض آباد دھرنا فیصلے اُتے عمل ہو جاندا تے9مئی دے واقعات نہ ہُندے۔چیف جسٹس آف پاکستان قاضی فائز عیسی دی سربراہی وچ 3 رُکنی بنچ نے کیس دی سماعت کیتی، جسٹس عرفان سعادت خان تے جسٹس نعیم اختر افغان وی بنچ دا حصہ نیں۔سماعت دے شروع اُتے چیف جسٹس نے اٹارنی جنرل توں استفسار کیتا کہ الیکشن کمیشن نے رپورٹ جمع کرائی اے تُسی اوہ رپورٹ ویکھی اے؟ جس اُتے اٹارنی جنرل نے دسیا کہ اجے الیکشن کمیشن دی رپورٹ نہیں جسٹس قاضی فائز عیسی نے آکھیا کہ تُسی اوس ویلے تک رپورٹ دا جائزہ لے لو، ایس کیس نوں آخر وچ سُن دے ہاں۔وقفے دے بعد دوبارہ سماعت شروع ہوئی تے اٹارنی جنرل نے دسیا کہ دھرنا انکوائری کمیشن دے سربراہ وی عدالت وچ موجود نیں، عدالت دا رپورٹ بارے کوئی سوال ہوئے تے کمیشن دے سربراہ توں پچھیا جا سکدا اے۔چیف جسٹس قاضی فائز عیسی نے فیض آباد دھرنا کمیشن رپورٹ دے غیر مستند ہون اُتے غصہ ظاہر کیتا۔جسٹس قاضی فائز عیسی نے ریمارکس د تے کہ کمیشن داکم انکوائری کرنا سی جیہڑی نظر نہیں آ رہی، سمجھ نہیں آ رہیاایہ کیسی رپورٹ اے، ساڈھا ویلا کیوں ضائع کیتا، انکوائری کمیشن نے کوئی فائنڈنگ نہیں دتی، نہ ہی ملک نوں ہون والے نقصان اُتے کجھ لکھیا، شہادتاں تے ثبوتاں نوں سامنے لیانا کمیشن دا کم سی۔اٹارنی جنرل نے عدالت نوںدسیا کہ جنرل(ر)فیض حمید نے کمیشن نوں دسیا کہ اَت گرداں دی مالی معاونت دے معاملات ویکھنا آئی ایس آئی دی ذمہ داری نہیں، جس اُتے چیف جسٹس قاضی فائز عیسی نے استفسار کیتا کہ اگر اونہاں دی ذمہ داری نہیں تے فیر ایہ کس دی ذمہ داری اے۔چیف جسٹس نے استفسار کیتا کہ ایہ کس طرح دی رپورٹ کمیشن نے بنائی اے، کمیشن دے ہور ممبر کیتھے نیں؟ اک پیراگراف وچ کہہ رہے نیں آئی ایس آئی دی ذمہ داری نہیں، اگے پیراگراف وچ لکھ رہے نیںکہ ٹی ایل پی دے مالی معاونت دے ثبوت نہیں ملے۔جسٹس قاضی فائز عیسی دا کہنا سی کہ پاکستان نوں فیض آباد دھرنے توں کِنے نقصان ہوئے فیصلہ کڈو، مارو، جلا گھیرا کرو تے چلے جائو ایہ کیہ طریقہ کار اے؟دوران سماعت فیض آباد دھرنا کمیشن ممبراں وچوںکوئی وی عدالت وچ پیش نہیں ہویا۔اٹارنی جنرل منصور عثمان اعوان نے دسیا کہ کمیشن دے سربراہ اختر علی شاہ نوں اج کورٹ آن دا آکھیا گیا سی، سربراہ کمیشن ولوں بیمار ہون دا دسیا گیا اے۔بعد وچ کمیشن دی رپورٹ اُتے چیف جسٹس قاضی فائز عیسی غصے وچ آگئے،اونہاں نے ریمارکس دتے کہ میں سمجھ نہیں پا رہیاکہ کس لیول دے ذہن نے ایہ رپورٹ تیار کیتی اے؟ کمیشن نوں معلوم ہی نہیں اونہاں دی ذمہ داری کیہ سی؟ کمیشن نے فیض حمید دے بیان دی بنیاد اُتے رپورٹ تیار کر دتی، پاکستان دا کِنا نقصان ہویا لیکن اوس دے نقصان دی کسی نوں پرواہ ہی نہیں، اگ لاو ،مارو ایہ حق بن گیا اے۔